Ezekiel 41

1Man etera ba hekalu, man eporo mbegi, kalacne bot abusiel i ng’ete kucel, man kalacne bot abusiel i ng’ete mucelo, ma en e kalac mi hema. 2Man kalac mi kamondo en e bot apar; man ng’et kamondo en e bot abic i ng’ete kucel, man bot abic i ng’ete mucelo: man eporo kaborne, bot pier ang’wen, man kalacne, bot pier ario. 3Elund emondo yor i ie, man eporo mbegi kubang’e kubang’e mi kamondo, bot ario; man kamondo, bot abusiel; man kalac mi kamondo, bot abiro. 4Man eporo kaborne, bot pier ario, man kalacne, bot pier ario, i wang’ hekalu: man ewacu ira kumae, Maeni kamaleng’ m’usagu.

5Man eporo kor ode, bot abusiel; man kalac mi kusika mi ng’ete kubang’e kubang’e, bot ang’wen, kum ot gbur mi ng’ete kun ku kun. 6Man kusika mi ng’ete ni wi wadi adek, acel wi wadi acel wi wadi, man pier adek i kakare; man gimondo i kor ot ma mi ot mi kusika m’i ng’ete gbur, kara gimoki, man ku gimok i kor ode. 7Man kusika m’i ng’ete medo lacne ka gitieko ode ku malu ku malu; kum tiek mi ode cidho malu ku malu gbur kum ode: ka kumeno kalac mi ode cikumedre ku malu; e kumeno juidho malu ugambre kum kusika ma yo piny cil kum ma malu ku kusika m’i diere. 8Aneno bende nia ode bedo ku there m’utingre malu gbur: the kusika mi ng’ete en e bol dho mi bot abusiel ma dit. 9Ka thuth mi kor ode, ma en e mi kusika mi ng’ete, yo woko, en e bot abic; man maeno m’udong’ en e ka mi kusika mi ng’ete ma mi ode. 10Man i kind kusika kaka nuti mi bot pier ario m’utieko ot gbur kun ku kun. 11Man dhugola mi kusika mi ng’ete ni yo ba ka m’udong’, dhugola acel yor ariwa ma malu, man dhugola acel yor ariwa ma piny: man kalac mi ka m’udong’ en e bot abic gbur.

12Man giragoma ma ni i wang’ ka m’ukoc i ng’ete ma yo reto kalacne bot pier abiro; man kor giragomane kathuthne bot abic gbur, man kaborne bot pier abung’wen. 13Kum kumeno eporo ode, kaborne bot dak acel; man ka m’ukoc, ku giragoma, ku kore, kaborne bot dak acel; 14kalac mi nyim ode bende, man mi ka m’ukoc yo nyangu, bot dak acel.

15Man eporo kabor mi giragoma i wang’ ka m’ukoc ma ni i ng’eye, man pondo de ma ku malu i ng’ete kucel man i ng’ete mucelo, bot dak acel; man hekalu ma yor i ie, ku pondot mi lelagang’; 16riu, man wang’ot m’ubedo acika, man pondot ma ku malu gbur wi ot ma malune adek, yo kum riune, ma jumwono ku yen gbur, man ugambre i ng’om cil kum wang’ot ma malu (nie wang’otne bedo auma), 17cil kum ka ma malu wi dhugola, en e kum ot ma yor i ie, man yo woko, man kum kor ode ceke gbur yor i ie man yo woko, ku por. 18Man jutime ku kerubi man ku thith; man thith ni i kind kerubi ku kerubi, man kerubi kubang’e kubang’e man ubedo ku wang’e ario; 19ketho nia wang’ dhanu ni yo ba thith i ng’ete kucel, man wang’ nyathin umvor m’aradu ni yo ba thith i ng’ete mucelo. Jutime kumeca i ot ceke gbur: 20ugambre i ng’om utundo malu wi dhugola jutimo kerubi man thith; kor hekalu bedo kumeni.

21Pi hekalu, jutimo dhu ng’et dhugolane rom rom; man pi wang’ kamaleng’, nenne calu nen mi hekalu. 22Pemblam en e mi yen, kadongone bot adek, man kaborne bot ario; man gunde, ku kaborne, ku kore, en e mi yen: man ewacu ira kumae, Maeni mesa ma ni i wang’ Yehova. 23Man hekalu ku kamaleng’ ubedo ku dhugola ario. 24Man dhugolane bedo ku bau ario ario, bau ario ma lokre: bau ario mi dhugola kucel, man bau ario mi dhugola mucelo. 25Man jutimo i wie, i wi dhugola mi hekalu, ayi kerubi ku thith, calu ma jutimo wi kor ode; man riu mi yen ni wi wang’ pondot yo woko. 26Man wang’ot m’ubedo acika ku thith ni i ng’ete kucel man i ng’ete mucelo, i ng’et pondode: kusika mi ng’et ode, man riu ubedo kumeni.

Currently Selected:

Ezekiel 41: AB1970

Highlight

Copy

Compare