Zefania 2
2
Nnuho Ho Nkotoserɛ
1Hom nka hom ho mboa ano, ɛhɛɛ, hom mboa hom ho ano,
ao ɔman a hom nnyi enyito;
2ansaana mbusu da no aba,
ansaana da no asen dɛ ntsɛw,
ansaana EWURADZE n’ebufuw dzendzen no
aba hom do,
nyew, ansaana EWURADZE n’ebufuw da no
aba hom do.
3Hom nhwehwɛ Ewuradze, hom asaase do ahobrɛadzefo nyina
a hom ayɛ n’atsɛmbudze;
hom nhwehwɛ tsenenee, hom nhwehwɛ ɔdwe:
bi a wɔdze hom bosuma wɔ
EWURADZE n’ebufuw da no mu.
Aman A Woetwa Israel Ho Ehyia No Do Atsɛmbu
4 #
Isa 14.29-31; Jer 47.1-7; Eze 25.15-17; Joel 3.4-8; Amos 1.6-8; Zek 9.5-7 Na wɔbɛdan Gaza egya,
na Ashkelon ayɛ ekurofo:
wobeyi Ashdod edzi ewiaber ketee,
na woetutu Ekron ase.
5Ndom nka nsuanofo, Keretfo man no!
Ao Keenan,
Filistiafo asaase,
EWURADZE n’asɛm tsia hom:
mebɛsɛɛ wo ara ma ɔtsefo biara nnkɛka.
6Na nsuano bɛyɛ mbowa dzidzibea
a nguanhwɛfo nsuaba
na nguankuw nguamban wowɔ mu.
7Na nsuano no bɛyɛ Juda fi nkaa no dze;
wɔbɛnyɛn hɔn nguankuw no wɔ do:
wobobutubutuw Ashkelon efi
mu ewimbir;
na EWURADZE hɔn Nyankopɔn bɛsera hɔn,
na ɔdze hɔn ndɔmmumkɔ no asan aba.
8 #
Isa 15.1—16.14; 25.10-12; Jer 48.1—49.6; Eze 21.28-32; 25.1-11; Amos 1.13-15 Matse Moab nsopa,
na Ammonmba yeyaw a wɔdze asopa me man,
na wɔamema hɔnho do ahyɛ hɔn he do.
9 #
Gye 19.24
Dɛm ntsi metse ase yi,
dɔm EWURADZE Israel Nyankopɔn no, na ɔse,
Ampaara Moab bɛyɛ dɛ Sodom,
na Ammonmba ayɛ dɛ Gomora
nsason sisibea, na nkyen mona,
na daa amamfoyɛ:
mo nkorɔfo nkaase bɛfa hɔn afo,
na me man nkaa so edzi hɔn do.
10Hɔn nkontompɔ ntsi na wobenya iyi,
osiandɛ wɔasopa dɔm EWURADZE ne man
na wɔamema hɔnho do etsia hɔn.
11EWURADZE no ho bɛyɛ hu ama hɔn:
osiandɛ ɔbɛma asaase do abosom nyina asa;
na adasa bɔsom ɔno,
obiara fi ne tsenabea,
amanaman nsupruw nyina mpo.
12 #
Isa 18.1-7
Hom Etiopiafo so,
hom bɔtotɔr m’afona ano.
13 #
Isa 10.5-34; 14.24-27; Nah 1.1—3.19 Na ɔbɛtsen ne nsa wɔ kwaamu afamu,
na ɔasɛɛ Asiria;
na ɔbɛma Ninive ayɛ amamfo,
na ɔawow kɛsɛɛ dɛ sar do.
14Na mbowakuw bobutubutuw mu,
amanaman mbowadoma nyinara:
nantwinoma na kɔtɔkɔ
bɛtsena n’edum etsifi:
hɔn ndze bɔtow ndwom wɔ ntokura mu;
amamfoyɛ bɛba hɔn mbobow ano:
na ɔama kyindur ndua edwin ho ada hɔ.
15Iyi nye kurow a odzii ehurusi
a ɔtsenaa dɛ ɔmmfa hwee nnyɛ hwee no,
na ɔsee wɔ n’akoma mu dɛ,
Emi mara a, na obi nnyi hɔ ka mo ho no.
Hwɛ mbrɛ oesi adan amamfo,
mbowa ebutuwii a!
Obiara a otwa mu wɔ hɔ no,
ɔbɛsesar, na ɔawosow ne tsir.
Currently Selected:
Zefania 2: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
