Zefania 3
3
Jerusalɛm No Bɔn Na No Mponee
1Due, etuatsew kurow a no ho egu fi,
nhyɛdo kurow no!
2Oenntsie EWURADZE ndze;
ɔanngye ntsea;
ɔammfa no werɛ annhyɛ EWURADZE mu;
na ɔanntwe ammbɛn ne Nyankopɔn.
3N’asafohemfo
yɛ ngyata a wɔpɔw wɔ no mu;
n’atsɛmbuafo yɛ ewimbir mpataku;
wonngya biribi ma ɔnnka mma adzekyee.
4No nkɔnhyɛfo yɛ ahopɔwfo, ndabrabafo ara nko:
n’asɔfoe egu krɔnkrɔn bea no ho fi na,
woedzi mbra no emim koraa.
5EWURADZE a ɔwɔ no mu no ɔtsen;
ɔrennyɛ emumuyɛ;
daa n’atsɛmbu da edzi pefee,
onngyaa da;
naaso nyia ɔnntsen dze, onnyim enyito.
6Metwitwa amanaman egu,
hɔn akoban ayeyɛ afoafo;
mama hɔn abrɔn atotɔ pan,
ma obi nntwa mu wɔ do:
wɔasɛɛ hɔn nkurow,
ma nyimpa bi nnyi hɔ, ɔtsefo bi nnyi do.
7Mekaa dɛ, suro mara,
gye ntsea;
na worunntwa wo tsenabea nnkyen,
dɛ mbrɛ dza mahyɛ wɔ wo ho nyina tse:
naaso wɔsoɛr ahema
na wɔsɛɛ wo ndzeyɛɛ nyina.
8Dɛm ntsi hom ntweɔn me, EWURADZE na ɔse,
nkodu da a mobɔsoɛr aba afonam do:
na mo sua nye dɛ mibehyia amanaman ano,
na mehyia ahenman,
dɛ mubohue m’ebufuw egu hɔn do,
m’ebufuhyew dzendzen nyina;
na me nyinkun gya no
bɛmen asaase no nyina.
9Ɔno na mebɛma aman no
ano krɔnkrɔn,
ama hɔn nyinara wɔaabɔ EWURADZE ne dzin,
dɛ wɔdze koryɛ bɔsom no.
10Etiopia esutsen egya
na mo nkorɔfo a wɔapetse no
fi dze ayɛyɛdze bɛba.
11Da no mu na mibeyi w’enyimguase ndzeyɛɛ
a edze ato me mbra
no nyina efi hɔ:
na ber no mu no na mibeyi hɔn
a wɔdze wo hyehyɛ hɔnho no efi wo mu,
na ennkɛda ho etuw woho wɔ
me bepɔw krɔnkrɔn no do.
12Na mibegya amandzehufo na abɔbɔfo
wɔ wo mu,
na wɔdze hɔn werɛ bɛhyɛ EWURADZE ne dzin mu.
13 #
Nyi 14.5
Na Israel nkaa
nnkɛyɛ emumuyɛ,
eso worinndzi atorsɛm;
eso worunnhu
ndaadaa gyirama wɔ hɔn anomu:
na wɔbɛnyɛn hɔnho na woebutubutuw hɔ,
na obi rinnyi hɔn hu.
Nkwagye Ho Ayɛyindwom
14Ao Zion babaa, tow ndwom;
ao Israel, bɔ ose;
ao Jerusalɛm babaa,
ma w’enyi ngye na fa w’akoma nyina dzi ehurusi.
15EWURADZE eyi w’atsɛmbu kɔ,
ɔatow w’atamfo akyen:
Israelhen EWURADZE no, wɔ wo finimfin:
erennda ho nnsuro mbusu bio.
16Da no mu no wɔbɛse Jerusalɛm dɛ,
Mma nnsuro:
ao Zion, mma w’abaw mu mmbu.
17EWURADZE wo Nyankopɔn wɔ wo finimfin,
ɔkatakyi a ɔbɛgye nkwa no a:
ɔdze enyigye bedzi wo ho ehurusi,
ɔdze dɔ bɛyɛ wo fofor,
ɔdze ndwom bɔbɔ wo ho ose.
18Mobɔboaboa hom ano na na hom asan ebedzi afahyɛ
a hom dzii ho awerɛhow no bio,
amma hom anntseetsee bio.
19Hwɛ, ber no
menye hɔn a wohiahia wo ho no nyina bedzi:
na mebɛgye osiifo no nkwa,
na matase hɔn a wɔapam hɔn no;
na mebɛhyɛ hɔn enyimnyam na mama hɔn dzin,
hɔn a hɔn enyimguase aba asaase nyina do no a.
20Ber no mu na medze hom bɛba,
na ber no mu na mobɔboa hom ano:
na mebɛma hom enya dzin
na enyimnyam wɔ asaase do aman nyinara mu,
ber a medze hom ndɔmmumfo bɛsan aba bio no,
na hom dze hom enyiwa bohu. EWURADZE na ɔse.
Currently Selected:
Zefania 3: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
