Matthew 8

Jesus Sa Kwatanyi Yarba

(Mark 1.40-45; Luke 5.12-16)

1Na ofii koko no do sianee no, nyimpadodow pii kaa no do. 2Na ɔkwatanyi bi bae bɔkotoow no see dɛ, Mo wura, sɛ epɛ a, ibotum dɛ ema mo ho san. 3Na ɔtseen ne nsa dze kaa no see dɛ, Mepɛ, wo ho nsan. Na ntsɛmara na kwata no fii no ho. 4#Lev 14.1-32 Na Jesus see no dɛ, Hwɛ na aannka annkyerɛ obiara, mbom san kɔ, fa woho kɛkyerɛ ɔsɔfo no, na kɛma ayɛyɛdze a Moses hyɛe no fa yɛ dasedzi ma hɔn.

Jesus Sa Ɔhamupanyin N’akowaa Yarba

(Luke 7.1-10)

5Na ɔkɛhɛɛn Karpernaum no, ɔhamupanyin bi baa ne nkyɛn bɛserɛɛ no see no dɛ, 6Mo wura, m’akowaa da fie yar mbubui retseetsee dodow. 7Na Jesus see no dɛ, Mebɛba mabɛsa no yarba. 8Na ɔhamupanyin no buae see dɛ, Mo wura, mennsɛ dɛ ebɛhɛn me hatsɛw ase; na ka asɛm no nko, na m’akowaa ho bɛsan no. 9Na mo so meyɛ nyimpa a mowɔ tum ase, na mowɔ nsordaafo wɔ m’ase, na mese yi dɛ, Kɔ a, ɔkɔ; na mese obi so dɛ, Bra a, ɔba; na mese m’akowaa dɛ, Yɛ iyi a, ɔyɛ. 10Na Jesus tsee no, ɔyɛɛ no nwanwa, na ɔsee hɔn a wɔka no do no dɛ, Nokwar mese hom dɛ, Israel mu mpo munnhun gyedzi a ɔtse dɛm yi bi pɛn. 11#Luk 13.29 Na mese hom dɛ dodowara befi boka nye anee aba, na wɔnye Abraham nye Isaak nye Jakob abɛtsena ase wɔ sor ahenman no mu; 12#Mat 22.13; 25.30; Luk 13.28 ber a ahenman no ne mba no dze wɔbɔtow hɔn egu ekyirekyir sum no mu: mbrɛ osu nye asetwɛr wɔ no. 13Na Jesus see ɔhamupanyin no dɛ, Kɔ, na dɛ mbrɛ agye edzi yi, ɔnyɛ dɛmara mma wo. Na dɔn no ara mu akowaa no tsee apɔw.

Jesus Sa Nkorɔfo Pii Yarba

(Mark 1.29-34; Luke 4.38-41)

14Na Jesus baa Peter fie no, ohun n’asew basia dɛ ɔda hɔ yar papu. 15Na osuoo ne nsa mu na papu no fii no do; na ɔsoɛree na ɔsoom no. 16Na odur ewimbir no, wɔdze pii a mbɔnsam afa hɔn brɛɛ no; na ɔdze n’asɛm tuu esunsum no, na ɔsaa hɔn a wɔyar nyina yarba, 17#Isa 53.4 ama dza nkɔnhyɛnyi Isaia kae no aaba mu dɛ, Ɔno na ɔfaa hɛn ahoɔmberɛw, na ɔsoaa hɛn nyarba.

Hɔn a Wɔpɛ dɛ Wɔka Jesus do

(Luke 9.57-62)

18Na Jesus hun nyimpadodow pii wɔ no ho no, ɔhyɛɛ dɛ wɔnkɔ esuegya no ho. 19Na Ɔkyerɛwfo bi bae bɛsee no dɛ, Kyerɛkyerɛnyi, beebiara a ebɔkɔ no, mebɛka wo do. 20Na Jesus see no dɛ, Nsɔ wɔ etu, na wimu nnoma wɔ mberɛbuw, na nyimpa Ba no dze, onnyi mbrɛ ɔdze ne tsir to. 21Na n’esuafo mu bi so see no dɛ, Mo wura, ma me kwan ma monkɔ minkesie m’egya ana. 22Na Jesus see no dɛ, Ka mo do, na ma ewufo nsie hɔnara hɔn ewufo.

Jesus ma Ehum Taa Dzinn

(Mark 4.35-41; Luke 8.22-25)

23Na ɔkɔr hɛn mu no, n’esuafo no kaa no do. 24Na hwɛ, ehum kɛse tui wɔ po no mu, na asorɛkye kataa hɛn no do, nna ɔno dze, ɔada. 25Na wɔbae benyaan no see dɛ, Owura, gye hɛn, yɛrehera. 26Na ɔsee hɔn dɛ, Ebɛnadze ntsi na hom yɛ ehufo, hom a hom gyedzi suar? Nna ɔsoɛree na ɔbraa mframa nye po no, na ɔtaa dzinn. 27Na ɔyɛɛ nyimpa no nwanwa na wɔsee dɛ, Ebɛn nyimpa nye yi a mframa na po mpo wotsie no yi?

Nyimpa Beenu bi a Mbɔnsam Afa hɔn

(Mark 5.1-20; Luke 8.26-39)

28Na odur esuegya no ho wɔ Gadarafo asaase do no, nyimpa beenu bi a mbɔnsam afa hɔn behyiaa no kwan; wofi abodan mu na wɔyɛ abɔyafo mbordo dɛ, ma ntsi obi nntum nntwa mu wɔ kwan no do. 29Na hwɛ, wɔtseaa mu see dɛ, Yɛnye wo wɔ ebɛn yɛ, ɔwo, Nyankopɔn Ba? Ana ebaa ha dɛ erebɛhaw hɛn ansaana ber no edu? 30Na ofi hɔn nkyɛn kɔ ekyir kakra no, mprekokuw kɛse bi wɔ hɔ ridzidzi. 31Na mbɔnsam no serɛɛ no dɛ, Sɛ itu hɛn a, soma hɛn mprekokuw no mu. 32Na ɔsee hɔn dɛ, Hom nkɔ. Na wopuei sii mu kɔr mpreko no mu; na hwɛ, mprekokuw no nyina faa twitwi kesiaan ɔbo kronn no koguguu po no mu, na wowuwui wɔ nsu no mu. 33Na hɔn a wɔrenyɛn hɔn no guanee kɔr kurow no mu kɛkaa ne nyina nye dza ɔbaa hɔn a mbɔnsam afa hɔn no do no ho asɛm. 34Na kurow no nyina fiir edzi behyiaa Jesus, na wohun no no, wɔserɛɛ no dɛ omfi hɔn ntoaado nkɔ.

Currently Selected:

Matthew 8: MFANBRP

Highlight

Copy