Matthew 16

Nsɛnkyerɛdze no Nhwehwɛɛ

(Mark 8.11-13; Luke 12.54-56)

1Farisiifo nye Sadusiifo bi bae bɔsɔɔ Jesus hwɛe bisaa no dɛ ɔnkyerɛ hɔn asɛnkyerɛdze a ofi sor. 2Na obuae see hɔn dɛ, Odu ewimbir a, hom ka dɛ, Wimu bɛtsew, osiandɛ sor aber. 3Na anapa hom se dɛ, Ndɛ ehum botu, osiandɛ sor ayɛ kowioo na oemuna. Hom tum hwɛ wimu kyerɛ dza obesi, na mber ho nsɛnkyerɛdze dze, hom nntum nnkyerɛ ase. 4#Mat 12.39; Luk 11.29 Ɔsantsen bɔn a wonndzi nokwar rohwehwɛ asɛnkyerɛdze, na wɔremma hɔn asɛnkyerɛdze bi dɛ Jona dze no. Na ogyaa hɔn hɔ kɔree.

Farisiifo nye Sadusiifo Mbɔrkaw no

(Mark 8.14-21)

5Na esuafo no dur esuegya noho no, nna hɔn werɛ efir dɛ wɔfa paanoo. 6#Luk 12.1 Na Jesus see hɔn dɛ, Hom nhwɛ, na hom nhwɛ yie wɔ Farisiifo nye Sadusiifo mbɔrkaw no ho. 7Na wosusui wɔ hɔn tsirmu dɛ, Yɛammfa paanoo ntsi a. 8Na Jesus hunii no, ɔsee dɛ, Hom a hom gyedzi suar, ɔyɛ dɛn na hom susu se wɔ hom mu dɛ osiandɛ hom ammfa paanoo ntsi a? 9Ana hom nnyae nnhunii, anaa hom nnkaa nyimpa mpemenum paanoo enum no, nye nkɛntsɛn dodow a hom fae no? 10Anaadɛ mpemanan paanoo esuon no, nye mbirefi dodow a hom fae no? 11Ɔyɛ dɛn na hom nnhu dɛ nnyɛ paanoo ho asɛm bi na mereka? Na hom nhwɛ yie wɔ Farisiifo nye Sadusiifo mbɔrkaw ho. 12Nna wohun dɛ ɔannse hɔn dɛ wɔnhwɛ yie wɔ paanoo mbɔrkaw ho, na Farisiifo nye Sadusiifo nkyerɛkyerɛ ho a.

Peter ne Gyedzi wɔ Jesus ho

(Mark 8.27-30; Luke 9.18-21)

13Na Jesus dur Kaesarea Filipi afamu no, obisaa n’esuafo dɛ, Nyimpa se dɛ nyimpa Ba no nye woana? 14Na wɔsee dɛ, Binom se John Onumanyi no a; binom se Elija a; na binom so se Jeremia anaa nkɔnhyɛfo no mu baako a. 15Ɔsee hɔn dɛ, Na hom dze, hom se dɛ woana nye me? 16Na Simon Peter buae see dɛ, Ɔwo nye Kraest no, Nyankopɔn tseasefo no ne Ba no. 17Na Jesus buae see no dɛ, Nhyira aka wo, Simon, Jona ba; na nnyɛ honam nye bɔgya na woeyi akyerɛ wo, na m’Egya a ɔwɔ sor no a. 18Na mo so mese wo dɛ, Ɔwo nye Peter, na ɔbotan yi do na medze m’asɔr besi; na samanadze aponkɛse rinndzi do nyim. 19#Mat 18.18; Joh 20.23 Medze sor ahenman ne nsaafee mebɛma wo: na biribiara a ebɛkyekyer wɔ asaase do no, wɔbɛkyekyer wɔ sor; na biribiara a ebɛsan wɔ asaase do no, wɔbɛsan wɔ sor. 20Nna ɔbraa n’esuafo no dɛ mma wɔnnka nnkyerɛ obiara dɛ ɔno nye Kraest no.

Jesus Ka N’amandzehu na no Wu ho Asɛm

(Mark 8.31—9.1; Luke 9.22-27)

21Na ofitsi aber no na Jesus hyɛɛ ase kyerɛɛ n’esuafo dɛ ɔsɛ dɛ ɔkɔ Jerusalɛm, na okohu amandze pii wɔ mpanyimfo nye asɔfompanyin, nye kyerɛwfo nsa, na woeku no, na da a otsia ebiasa no ɔasoɛr. 22Na Peter dze no kɔr nkyɛn, na ɔhyɛɛ ase twuuw n’enyim, dɛ, Wɔmma ɔmpar wo, Ewuradze: iyi remmba wo do da. 23Na ɔdaan noho see Peter dɛ, Fi mo do, Satan: eyɛ fintsidua ma me; osiandɛ enndwen Nyankopɔn dze, na edwen nyimpa dze. 24Nna Jesus see n’esuafo no dɛ, Sɛ obi pɛ dɛ odzi m’ekyir a, ma ɔmpa noho, na ompegya ne mbeamudua na ɔnka mo do. 25Na obiara a ɔpɛ dɛ ɔgye no nkwa no, ɔbɛyew no, na obiara a emi ntsi ɔbɛyew no nkwa no, obohu. 26Na sɛ nyimpa nya wiadze nyina ma ntsi ɔhwer no nkwa a, ebɛn mfaso na obenya? Anaa ebɛnadze na nyimpa bɛma dze asesa no nkwa? 27Na nyimpa Ba no dze n’Egya n’enyimnyam nye n’abɔfoe bɛba; na aber no na obotua nyimpa nyina kaw dɛ mbrɛ hɔn ndzeyɛɛ tse. 28Nokwar mese hom dɛ, Hɔn a wogyina ha yi, binom wɔ hɔ a wɔronnsɔ owu nnhwɛ ansaana woehu nyimpa Ba dɛ ɔreba wɔ n’ahendzi mu.

Currently Selected:

Matthew 16: MFANBRP

Highlight

Copy