HAPANYA 3
3
Ba hukunya dàngu ba pamara-ya la Yeruhali
1Màtawa ka nanggàna-ya harangu la Yeruhali na paraingu iraku na ma-mbuhangu pa-patula ngganggangu lai MIRI dàngu na ma-kapidihu wiki-naha da mangia-nya! 2Nai-a-ai na paraingu na manda kataku-ya na lii panamu welingu lai MIRI, dàngu na manda wàrihu-mbuha da kanyàngi-na, na manda pa-jàmangu ura lai MIRI, dàngu nda nakarai pa-ndulangu lai Nyuna!
3Da tau bokulu-na na paraingu nuna hama hinga ma-kanggaüku-ha. Da hakimu-na hama ahu rumba rimbangu-ha; kanjupu malumbangu-ha, hi nda hapungu-mbu rii kawudu pabida nduma haromu. 4Da wunangu-da nda da-paweli etingu dàngu nda pamonu-anja; ba hapajia-ha da ratu da-pairaku-ya jàka nggàraya na pa-pahinggilu ndumana i MIRI dàngu da-kabeli puhaha da Ukuna i MIRI ba da-kehangu utu nduma wikida. 5Na nyuna ni-manyapa i MIRI la paraingu nuna; nawunda mànuma duna ma-padeningu dàngu ndedima manjala. Nimbihu mbaru jiangu-ma nawua-nya mamola na banjaru-na. Ba tuna, na tau na manda pinya na mamola la paraingu nuna pa-daingu bia-nanya pawunda akatu dàngu nda pinguna pa-makia wàngu.
6Napanii i MIRI, “Mbàda pa-molungu-ngguka banjaru dangu; ku-pakabu-ha da paraingu-da, dàngu kutuha watu tanyungguru da kangeli dàngu da lewatu-da. Da-malinggitu da paraingu-da ba nda ningu mangia-nja dàngu da-kahàna da àndada. 7‘Jiangu-maka nàhu datembi-ka banjaru-nggu hi da-wàrihu-ha da kanyàngi-nggu. Jiangu-maka ba danamu-ha#Da pa-haleli ndai da manda pirada: danamu-ha; Imbarani: nda jia pakabu-aha. da papekangu pawua-nggunya,’ wànggu bia la etinggu. Tàka na ma-lohangu, rihi parukangu-daipa pawunda akatu welingu la mangilu-na.
8Na nyuna pananjarungu! Patia bianya na lodu bànduku-nggu ba ku-pakàla. Ba mbàda bota-nggunyaka la pa-pauhi-nja da banjaru dàngu da pa-hanganji, ka pabuku-nja hàngganggu. Nggubulu na pinu tana napa na-pambuta-ya epi hàngganggu.
9Na nyuna tiangu taï ku-panjilu-nja da etida nyuda da banjaru, hi Nyungga-a pa-hamaya-da, nda la kamàla ala-a. Mbuu ndàbada nuda da banjaru napa da-karàdaku ndàbangga Nyungga. 10Jiapa welingu la mamarau la Hundangu, nu na banjaru-nggu na ma-paihangu napa damai hi da-wotungga Nyungga kameti maraku. 11La rehi nu, ha dimi banjaru-nggu, nda nggàra-ayapa la pa-makia rukuna ba mbàda patula ngganggangu-mi lai Nyungga. Napa kuwàngga-ya nimbihu-na na tau na ma-ngànjangu dàngu na ma-abungu, tàka nyimi ndai hili patula ngganggangu-apa lai Nyungga la tandula matua-nggu.#tandula matua-nggu: Palindi Hiungu. 12Napa kumàta-nya ka na-padaingu lai nu na hau banjaru na ma-karàda etina, mamonu-nya na pa-ndulangu-ma-anggu. Peku-mana ka da-ndàdiku lai nu. 13Da pa-manjabii da tau Ihirailu da mani-injapa, nda dahili wunda-apa ma-akatu ka lai nggamuya-kadu; nda dahili kambàliku-apa dàngu nda da-palapingu-mbupa. Napa da-mbokaru dàngu dapeku hàmu, dàngu nda nggamu-apa pa-mangàdatu-da,” wàna.
Na wiliku mbaha eti
14Ha dimi Ihirailu, miludu mi-kayaka-wa!
Ha dumu Yeruhali, hawola weli etingu-wa!
15Ba pànjangu-nanyaka i MIRI pahuku-nggai nyimi;
mbàda wàngga-nahaka da muhumi.
Naopa-nggai na MIRI wikimi, na Hanganji Ihirailu.
Nàhu nda nggàra-apa la pa-mangàdatu.
16Napa natoma na rehina ba dapanii ngeru da tau,
“Ha dumu Yeruhali, àmbu mangàdatu dàngu àmbu namàli na etimu.
17Naopa-nggai paraïna i MIRI na Alami na marihi talu.
Ruku kawaha-na Nyuna tàka hi italu.
Na-hawola dàngu nambaha eti i MIRI rukumi nyimi,
la pa-namungu-na nawua-nggai luri bidi.
18Rukumi nyimi, naludu mbaha eti
hama tuna tau na ma-talànga remi,” wàna.
Napanii i MIRI,
“Na ura mila na mabahi-nggai ku-payila-nya.
Na ngia wawami mbàda podahu-nggunyaka.#La lawiti Imbarani-na nda na-lohangu-a jàka nggàra wàna na ndalaru 18.
19Napa natàka na rehina ba ku-pakabu-ha da ma-kapidihu-kai,
dàngu ba ku-pahàla ma-kanjiku;
mbutada da ma-tanawangu dabeli ba kulonda-ha.
Na ngia wawada ku-panjilu-nya hi tembiha;
la nggi-yakadu, jiapa ka la nggubulu pinu tana,
pa-pabokulu dàngu pa-wotungu-maha napa.
20Napa natàka na rehina,
kulonda pabeli-nja da mangia-nggau da ma-i-ihada.
Ku-pawiti-nya kai kawulangu la nggubulu pinu tana,
dàngu na mbokaru-mi ku-pabeli-nya napa,” wàna.
i MIRI mambàda panii.
Currently Selected:
HAPANYA 3: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
