HAPANYA 2

Na kamahingu ka dunjakungu njala

1Ha dimi banjaru manda pingu pa-makia, pàdangu-wa wikimi 2ba ndedipa imalaï dàngu ipamàdu wàla aingu!#Na hau pa-haleli ndai: ba ndedipa imalaï dàngu ipamàdu wàla aingu. Pinyawa ba ndedipa natàka na lodu hànggana i MIRI, hi nanggàna-kai hàngga mbàringu-na i MIRI na makandu - ndulangu. 3Beliwa lai MIRI, ha dimi mbuu ndàbami tau ma-karàda eti la tana yiana, dàngu mbuu ndàbami tau manunju-ha da hupu liina. Pa-luangu-wa lima nunjuya na pambuha-na i MIRI dàngu pa-wawangu-wa wikimi la hanggana. Nda tapinya hi imara bia napa welingu la hukungu la lodu pawuwa-nanya i MIRI na hànggana.

Na ràtungu ndumada da banjaru la winggiru-na na Ihirailu

4Nda haàtu-a napa pa-pamara la parai Nggaha. Na-malinggitu napa na Àhakelungu ba nda ningu mangia-nya. Pawàngga-ha napa da ma-ngiangu la Àndutu ba kaluluku harabànda-nja la lodu rarana tàka pa-ràhangu-ha pa-yilangu welingu la paraida da ma-ngiangu la Ekurungu. 5Nanggàna-kai ràtungu, ha dimi tau Pilitingu, banjaru ma-ngiangu la hi - hingina na tehiku. Mbàda kawuku-nanyaka i MIRI na-hukungu ndumami nyimi. Napa na-patàlaru-kai, nda haàtu-a mapeka welingu lai nyimi. 6Na tana ngabami la lihi tehiku nanjadi-ya maràda rumba; da kàmbungu mini pawangu dàngu da oka mbimbi pawulu lai nuha. 7Da ma-ngalangu paluhu welingu da ma-ngiangu la Yahunda, da-mandapu-nya napa nuna na tana ngabami. Napa da-pawangu bandada la tana nuna, tàka la rudungu da-katuda la u - uma tau Àhakelungu. Nadu napa i MIRI, na Alada naopa belinja dàngu na-pambokaru beliha.

8Napanii i MIRI Hupu Mambiha, “Mbàda rongu-ngguhaka ba da-pawawa dàngu ba da-paaka-nya na banjaru-nggu paraï banjaru Muapu dàngu Amungu. Dapanii abungu ba wàhi-danya napa na tana banjaru-nggu. 9Parongu-na na wikinggu ba maluri-ka, Alana na banjaru Ihirailu, napa kuwari pambuta-ya na Muapu dàngu na Amungu hama tuna na Hondumu dàngu na Nggomora. Napa dambinu-nja humuru mehi nuda da paraingu dàngu tanyungguru watu ma-palupangu ma-pawuku rumba dàngu ma-pajemingu. Da pa-manjabii welingu la banjaru-nggu da mamara napa daramba-nja da mangia-nja, hi dawàhi-ha da tanada,” wàna.

10Tuna nuduka napa ba hukunya na Muapu dàngu na Amungu ruku ngànjangu dàngu abungu-da, dàngu ba mbàda pawawa-mbuda-nyaka na banjaru-na i MIRI Hupu Mambiha. 11Napa i MIRI na-pamangàdatu-ha. Napa na-pakabu-ha da marapu - marapu la pinu tana. Hàla hi dalumu-nya napa i MIRI paraï mbuu ndàba na banjaru, nimbihu-da la tana wikida.

12Napa na-panggàna-mbunja hukungu meti da ma-ngiangu la Hundangu paraïna i MIRI.

13Hàlaka nu wàngu-nanyaka napa kawaha-na i MIRI la pa-pakabu-ya na Ahuru. Napa na-pamalinggitu-ya dàngu panjadi-ya maràda telangu katukuru na paraingu Naniwa. 14Lai nuha napa da-tanggilungu dàngu da-hangahu ningu da kabàba banda dàngu mbuu ndàba da ngara bandaka. Da wàngi datuu hibuda napa la tanyungguru watu nuda hi kia - kiada welingu la katonga - katonga. Napa ngga - nggaa-da da nggangga welingu la patenga - patenga pindu. Da ai kajiuda da uma la paraingu nuna dambuta napa pa-pukalu-ha. 15Nuna-duyaka napa na matàka-nya nuna na paraingu na mambaha eti riki mata dàngu na makaka-ya la wikina ba mambiru hàmu-danya. Dakaka-ya paraï da mangia-nya ba jiaya na paraingu-da nyuda-maka na paraingu marihi halawàla pa-bokulu la pinu tana. Ai, kanjupu malinggitu-ya la ngaba lai nu, nda ningua mangia-nya hinggilu-da da banda omangu da ma-pahibungu lai nu! Nimbihu-na na tau na mali ningu la paraingu nuna da-katàtaku dàngu da-haringgingu da hamangu-da.

Currently Selected:

HAPANYA 2: KAM

Highlight

Compare

Copy