HANGGAI 1

Na hupu liina i MIRI ka pahada belinya na Umana i MIRI

1La padàmbu wàna na ndaungu pareta-na i Hanganji Ndariu la Perihia, la tànggalu hau la wulangu panomu wàna, napanii i MIRI la ngaruna i Wunangu Hanggai. Nuna na lii languna i MIRI pa-patàkangu lai Herumbambilu-ya na anana i Halatialu, na nggumbunuru Yahunda, dàngu lai Ratu Bokulu Yuhua anana i Yuhandàku.

2I MIRI Hupu Mambiha napanii-nya i Hanggai, “Napanii yiana na banjaru, ba ndedi jia-aya na rehina ka pahada belinya na Umanggu,” wànanya. 3Tunaka nu wàngu ngaruna i Wunangu Hanggai, napanii i MIRI la banjaru-na, 4“Ha dimi banjaru-nggu, rehi-nanyaka ndumami nyimi pa-ngiangu la uma ma-kapingatu kapànduku, tàka na Umanggu hi jia bia-yapa ba pabundu watu tanyungguru-ya? 5Kamangu nu, kai pangàda-nya na ngerami! 6Nyimi ihàbaru padangu wini, jiapa-kai ba tuna, hakudu-a pangalami. Ningu pangangu-mi, tàka nda natoma-a kai mbihu. Ningu angguru-mi, tàka nda natoma-a ka naliya na etimi. Ningu pakimi, tàka nda natoma-a kai mamitu. Dàngu da wunda da pangala-da da tau mangangu ngganji lodu nda datoma-a pa-panua wànja da lurida. 7Ndai pàda-anya dimi, nggikina hi tuna nu? 8Nàhu kandekalu-wa la tandula papiti ai, kai pahada-nya na Umanggu; ka nahàmu na etinggu, dàngu ka marubuku-ngga hama tuna na pawàngu-ma duna. Kamangu-ma nu, kai pangàda-nya na ngerami! 9Nyimi imonungu pangala padangu ihi paraï-mi, tàka da pangala-mi ana hakudu-ma-ada; ibeli ngàndiha, tàka nu da ihi paraï-mi kuhapui-ha hi danjàpu ba nangàndi-ha ngilu.#kuhapui-ha ... ngilu; jàka ndia: ku-pawiti-nja ka da-muhungu. Ka nggikina hi tunggu nu? Na hemana: Rukuna ba tanyungguru watu-yapa na Umanggu, tàka nyimi mbuu ndàbami pa-ringgitungu pàku-aminya pawulu umami nimbihu-mi. 10Nuna-duyaka na ma-pawitingu hi nda napuru ndoku na urangu, hi nda peku tumbuda da pa-tondungu. 11Mbàda patàka-nggunyaka pamàdu wàngu na tana dàngu da tandula, da woka dàngu da woka angguru hamangui da woka haitungu, dàngu da ngara matumbu-ka la tana yiana, dàngumbu la tau dàngu la banda hamanai la mbuu ndàba da ngara patondu-mika,” wàna.

Na banjaru Ihirailu na-panamatungu la hupu liina i MIRI

12Tunaka nu i Herumbambilu dàngu i Yuhua hamanai nggubulu-na na banjaru Ihirailu da mambàda beli welingu la tanawangu#da mambàda beli welingu la tanawangu; jàka ndia: da panda dundilu la ngia pa-tanawangu. la Mbambilu, danunju-ya na kareuku-na i Hanggai, na papalewa-na i MIRI. Dawunda-ya jàka nggàraya na hupu liina i MIRI lai nyuda paraï pa-mangàdatu-nya i MIRI.

13Tàka i Hanggai na-patàka-nya na lii languna i MIRI la rayatu, ba mbàda njanji-nanya paraïna i MIRI paopa-nja nyuda.

14Tuna nuka i MIRI ba najuju-ya na etina i Nggumbunuru Herumbambilu, i Ratu Bokulu Yuhua dàngu mbuu ndàba da mambàda beli welingu la tanawangu, ka daràma nyuda mbuu ndàbada pa-pahada-nya na Umana i MIRI Hupu Mambiha, na Alada. 15Nyuda da-pakiringu paràma la tànggalu dua kambulu patu, wulangu nomu la padàmbu wàna na ndaungu pareta-na i Hanganji Ndariu.

Currently Selected:

HANGGAI 1: KAM

Highlight

Compare

Copy