HAPANYA 1
1
1I Hapanya anana i Kuhiya. Na ndalaru dedina weli wawangu hu dita tuna nu, Kuhi, Nggandalia, Amanjia dàngu Hanganji Hihikia. Yiana-ya na lii languna i MIRI lai Hapanya la rehi pareta-nanya na Yahunda paraïna i Hanganji Yuhia anana i Amungu.
Na lodu patandangu-na ngera i MIRI
2Napanii i MIRI, “Napa ku-pamolu-nya mbuu ndàba-naka na maninya la pinu tana: 3mbuu ndàba na tau dàngu banda jia ndàbaha da ma-hawurungu dàngu da iyangu. Na tau akatu ku-pamànji-ya napa.#Talànga wanguna na-njenjangu ningu-mapa ba tuna yia na ihina: ku-pamànji-ya napa; Imbarani: watu tunjuru. Napa ku-patàlaru-ya mbutana na banjaru tau pinu tana, nda haàtu-a pa-pahia-nggu paluri. Nyungga yia, MIRI, mambàda panii, wàna.
4Napa kuhuku-nya na ma-ngiangu la Yeruhali dàngu nggubulu-na na Yahunda. Da mani-njapa la ngera lumungu Mbaàlu ku-pamolu-nja napa welingu la pangia - pangia lai nu. Da ratu da malumu-nya na Mbaàlu pa-maromba halawàlangu-mahaka napa. 5Napa kuwari pambuta-ya nggamu biaya na mahei la toku ndidungu pa-marubukungu mata lodu, wulangu dàngu kandunu. Napa ku-pamolu-mbunja da malumu-ngga dàngu da ma-harangu pa-tuturu lai Nyungga, tàka hara wa-mbudanya na tamu marapu Milikumu. 6Napa ku-patàlaru-ha da manda mai lai Nyungga jàka ndia da manda karai ka kulonda-ha dàngu da mambàda dunjaku-ngga tàka hi nda dahili mbuhangu patundu-ngga Nyungga,” wàna.
7Mareni-nanyaka na Loduna i MIRI, napa na-paluangu limana i Ala la lodu nuna; jia ba tuna, kandiiwa la hanggana. Ehingu-nanyaka padua i MIRI pa-hambàli-ya na banjaru-na hama tuna kameti maraku dàngu mbàda dunda-nanjaka da muhu Yahunda. 8“Nu la lodu hambàli,” napanii i MIRI, “Napa kuhuku-nja ba hapajia-ha da tau bokulu, ba hapajia-ha da ana hanganji, dàngu mbuu ndàba na ma-kikungu kangguti-kalaratu tau hangàdangu. 9Napa kuhuku-nja da tau da ma-lumungu hama tuna tau manda tandaka Nyungga, dàngu da ma-manganga pa-kariangu da ma-pameti tau ka pinu wànya malanja pa-rambangu na umana na pa-tangara-da,”#na umana na pa-tangara-da; jàka ndia: na uma marapu-da. wàna.
10“La lodu nuna,” napanii i MIRI, “napa parongu mahii la Pindu Bokulu Iyangu. Napa parongu-mbu padudurungu welingu la kotaku bidi, dàngu lingu tanyungguru nda najaru nalàngi napa welingu la tandula - tandula. 11Padudurungu-wa dàngu hiiwa jàkai ronguha nuda, ha dimi ma-ngiangu la mbara wawa paraingu, nadu ba mbàda pameti-haka mbuu ndàba da tau danggangu dàngu da tau mawua parutangu àmahu!
12Napa la rehi nu kupiti hulu, hi ku-kanihiku-ya na paraingu Yeruhali. Napa kuhuku-nja da mangia-nya da manda kawelangu dàngu da ma-hamemungu wikida, dàngu da ma-pangàdangu la etida ba ndedima Nyungga yia MIRI, ku-paluangu limanggu tungu nu tungu ni. 13Napa pawàhi-ha da pawulu-da hi pakabu-ha da umada. Napa dawulu uma, tàka nda dangia-anya. Napa dapoka woka angguru tàka nda daunu-anya na wai angguru-na,” wàna.
14Mareni-nanyaka na lodu pa-tandangu-na ngera i MIRI, tubangu, mareni halawàla-mana-nyaka, jiapa lu tàka-ama-nanyaka. Na lodu nu nambinu wàngu harui rara, hi lupa la - lada-mbuda napa da panjuri ma-kanjupu kaborangu#Na lodu nu ... kaborangu; jàka ndia: Ronguwa! Napa natàka nuna na lodu ma-pa-haringgingu hamangu, jiapa da panjuri da ma-kanjupu kaborangu kadu la - ladada-mbuda parai .... paraï pambota monungu! 15Na lodu nu lodu mbeniya, lodu kalutu dàngu handuka-ya, lodu tanyungguru dàngu pa-kabungu-ya, lodu kapàtangu dàngu la maruya, lodu panggumungu dàngu pahambongungu-ya. 16Lundu njàpuna na lodu nuna ba rongu lingu taropitu dàngu wara pa-hànjalungu-da da mini mbeni hanggangu da ma-kaluluku-nja da paraingu maningu tindingu-da dàngu maningu lewatu - lewatu janggada.
17Napanii i MIRI, “Napa ku-patàka-nya tàparu dangu na banjaru tau pinu tana, hi lupa dàmaku - dàmaku-da napa hama tuna tau mapoki. Mbàda njala-daka lai Nyungga, tàka nàhu hama tuna wai paràba-ya na riada, tàka da metida da-mbubuku la pinu tana,” wàna.
18Nu la lodu na ma-mbàringu na pa-itangu-ya napa na mbenina i MIRI, mbuu ndàba da àmahu marara mabara-da nda da-ngalangu-a pa-pamara-ha nyuda. Napa nakabu na-karunggutu nggubulu-na na pinu tana ba natunu-ya paraï epi hànggana Nyuna. Wàngu harabàndangu napa ba na-butuhu-ya na lurina mbuu ndàba na maluri-ka la pinu tana yiana.
Currently Selected:
HAPANYA 1: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
