HAKARIA 9
9
Na patanda-nja ngera da nanggara lihina na Ihirailu
1Yiana-ya na lii languna i MIRI. Mbàda bota-nanyaka Nyuna la pahuku-nya na tana Handaràku dàngu na paraingu Ndamàhiku. Nda didi-aha da kabihu Ihirailu da manguna i MIRI, tàka na parai puhu pareta Hiria manguna i MIRI-mbuya. 2Na Hamàtu na ma-padira danya na Handaràku manguna Nyuna-mbuya, hamangui da paraingu la Tiruhu dàngu Hindungu dàngu mbuu ndàba da hupu pinguda da mangia-nya. 3Na Tiruhu mbàda pa-hadangu-naka ngia patoru - ngia patorungu nduma wikina dàngu kanjupu danguha da àmahu marara mabara pa-pauhi-na hi hama tuna ngga - nggàra pakàli wàngu bia-haka hama tuna wara dàngu kapihaku la ànda. 4Na nyuna napa na-pamila-ya paraïna i MIRI. Nggubulu-da da pawulu wàna nuna na paraingu napa nawàru-nja la tehiku tàka nuna na paraingu nambuta la epi.
5Napa daita-ya paraïna Àhakelungu dàngu Nggaha hi da mangàdatu. Naita-mbuya paraïna Ekurungu hi nda ana nggàra-apa pamonu-na. Nda ningu-apa hanganji-na na Nggaha, tàka na Àhakelungu na-malinggitu ba nda ningua mangia-nya. 6Napa nangia-nya tau welingu la banjaru pakili kuwarungu na Àndutu. Napanii i MIRI, “Napa ku-pamolu-nja da tau Pilitingu da ma-abungu. 7Nda dahili ngangu-apa tolungu maningu-ipa wai riana jàka ndia pangangu pa-hiringu hawiangu. Napa nanjadi banjaru-nggu mbuu ndàba da tau pahili dàngu hi datama la diha kabihu Yahunda. Napa na Ekurungu nanjadi-ya anggota banjaru-nggu hama tuna na tau Yembuhu#tau Yembuhu; tau mangia memanya na Yeruhali. Da njadi atana i Ndautu, ba nahàla-ka pabera-ya nuna na paraingu. la rehi la handàka-na. 8Dai-manggunya na tananggu dàngu hi pabeta-nja da pamba tau hangàdangu da ma-mbuhangu pali ningu. Nda ku-pahia-anjapa da ma-pakapidihu ka da-pareta-ya na banjaru-nggu. Maa ba mbàda ita-nggunyaka na mayila-da,” wàna.
Na Hanganji na manàmu-nya
9Ha dimi ma-ngiangu la Hiungu, hawola-wa!
Ha dimi ma-ngiangu la Yeruhali, kayaka-wa!
Tàngaru-ya! Na Hanganji-mi namai wàngu taluna!
Hanganji mamola-ya na mangàndi mànangu.
Na nyuna na tàka wàngu karàda eti
na-kaliti kalandai, heu kalandai larii.
10Napanii i MIRI,
“Da kareta pabera welingu la Epuraïmu kuwàru-nja napa,
mbuu ndàba da njara la Yeruhali ku-pamohu-ha
dàngu mbuu ndàba da pana ku-pakabu-ha napa.
Na Hanganji-mu na-bobaru-ya napa na papeku-da da banjaru-ka.
Welingu la hau tehiku lundu la tehiku hau, na-paràpangu na kawaha-na,
welingu la Luku Epuràtu lundu la hupu tana,” wàna.
Na pahàmu-ya na ngerana na banjaru-na i Ala
11La banjaru-na napanii i MIRI,
“Lumuna na pa-njanjingu patura-nggu dàngu nyimi,
na pa-njanjingu pa-karàngi wàngu ria kameti maraku,
napa ku-pahàla-ha da rayatu-mu
da ma-mayila la ngia pa-tanawangu
hama tuna tau paoka la humuru màdu.
12Ha tau tanawangu beliwa dimi,
nàhu ninguka pamonu-mi.
Beliwa la ngia pa-handera-mi,
napa ku-padaingu pakanyuru-nggai.
Ronguwa: Pandua hama daana napa ba ku-pakanyuru-nggai
rukuna mbuu ndàba da mayila pambàda denimi.
13Na Yahunda jiaya na-pawàngu beri pana ma-kaborangu,
dàngu na Ihirailu beri wua pana mawai rehingu ka pulinya.
Ku-kawana-nya beri hapanda-ya na ma-ngiangu la Hiungu;
da tau Yunani ku-kaluluku wànja nuna na hapanda,” wàna.
14Napa na-pawuwangu wiki la banjaru-na i MIRI,
hama kabilaku-ha ba napuli-nja da wua panana.
Napini taleli napa i MIRI Hupu Majangga na tanda pa-kalulukungu
hi nalaku hanggangu la làpuru weli lurungu.
15Jiangu-ma ba naopa-nya na banjaru-na,
hi peku pakàku-daha da muhu mbuu ndàbada.
Hama tuna pa-oingu tau ma-maüku la wolu,
tuna nu na-paoingu-da la pa-hànjalungu.
Beri ria kameti maraku paburi la pinu ngia pawotu maraku,
tuna nu ba nambungu na wai ria muhuda.
16Jàka jia-yaka na lodu, pahàla-nanyaka na banjaru-na i MIRI,
hama mini pawangu ma-pahàla mbimbina welingu la hanggàmaru.
Napa nyuda da-hawilangu la tanana i MIRI,
hama anahida la tubuku pareta ba da-kalilangu.
17Ai, na tanana i MIRI kanjupu hàmuya napa,
ai kanjupu hàmu dàngu kanjupu manandangu-ya!
Lai nu datumbu hàmu da angguru dàngu da uhu nggàndumu,
hi kiri àtalu-da da bidi mini da bidi kawini.
Currently Selected:
HAKARIA 9: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
