HAKARIA 10
10
Na-panjanjingu i MIRI pa-pamara-ya na banjaru-na
1Jàka jia-yaka na wula pa-kameli ruu ai, karaiwa urangu lai MIRI. Ka pa-uhingu-nanyaka karumangu panggumungu i MIRI, hi na-papurungu ura kawalu hi damuru da wo - woka dàngu da-hayandalu nduma mbuu ndàba da tau. 2Dakarai pa-itangu ngera la marapu na tau, dàngu la hapajia-ha da tau ma-manyura, tàka nahema na pangala-da ma-kambàliku dàngu ma-kakòlulu ju - juaya. Ningu ma-pahabolangu manggadipangu, tàka na kalokangu-da panjàra-danggai nyimi-ma-a dàngu nda ningua ihina na omba eti pawua-da. Tuna nuduka hi na-paiha mbimbingu na rayatu. Da-mangonangu ba nda ningu liku uruda.
3Napanii i MIRI, “Kanjupu mbenika la maningu kawahangu da ma-pareta-ya na banjaru-nggu, hi kuhuku-nja napa. Na nyuna da ma-ngiangu la Yahunda jiaha da mangunggu, tàka napa Nyungga, MIRI Hupu Mambiha ku-kabubulu-ha nyuda. Napa kutuha njara pabera rihi talu ndumanggu. 4Welingu lai nyuda napa kupindi maningu kawahangu, liku uru, mini la ngora ma-pareta-ya napa na banjaru-nggu,”#Welingu lai ... banjaru-nggu; jàka ndia: Mbuu ndàbana na ma-pakapidihu, da maningu kawahangu, da liku uru, dàngu da mini la ngora – handàka dunjaku-danya napa na Yahunda. wàna. 5Napa datalu da mangia-nya na Yahunda hama tuna da mini mbeni hanggangu mataro - rohaku muhu beri kapihaku la ànda. Napa dambeni hanggangu rukuna ba kundula-ha Nyungga, MIRI dàngu da-pakàku ndàbaha napa da pamba muhu ma-kaliti njara.
6“Napa ku-paàtalu-ha da mangia-nya na Yahunda,
napa ku-pamàna-nya na banjaru Ihirailu.
Ku-karia belinja la tanada
rukuna ba kunamu-ha nyuda.
Napa ku-palua-nja lima
hama tuna banjaru pandedi jukaru ndokunggu.
Nyungga-maka Alada nyuda,
napa kuhili tanaü-ha mbuu ndàba da hamayangu-da.
7Hama mini mbeni hanggangu ma-kapàru-ya na Ihirailu,
hama tuna tau ma-unungu angguru-ha napa ba da-hawola.
Da ana umbuku-da welingu la handàdiku lundu la handàdiku
nda jia maromba-adanya yiana na talu pawua-nggunja.
Napa dambàha eti da riki mata
rukuna na pawunda-nggunja nyuda.
8Napa kupaau-nya na banjaru-nggu hi ku-pambulu-nja.
Ku-pamara-ha dàngu ku-paworu-ha hama tuna la handàka-na.
9Jiapa-kai ku-patanyala-nja la honga ba - banjaru,
pa-daingu namu-dangga lai nu.
Napa da-malundungu, hamangui da anada
hi dabeli pa-kariangu napa la tanada.
10Napa ku-karia belinja welingu la Mehiru dàngu la Ahuru.
Ku-bànjalu-ha la tana wikida.
Ku-karia-nja la Nggiliatu dàngu la Limbanongu-mbu,
hi dapinu ndàbaya na tanada.
11Jàka dapala la tehiku kalutu,
napa Nyungga MIRI, ku-nyàbaru-ha da ngalingu;
na lukuna na Luku Nilu namàdu marokutu.
Napa ku-pawawa-ya na banjaru Ahuru na ma-ngànjangu,
dàngu napa na kawaha-na na Mehiru rihi talu na-molungu.
12Na banjaru-nggu ku-pakapàru-ya napa,
napa da-karadaku dàngu da-lumungga Nyungga.
Nyungga MIRI, mambàda panii,” wàna.
Currently Selected:
HAKARIA 10: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
