HAKARIA 8

Na-panjanjingu i MIRI pa-pahada belinya napa na Yeruhali

1I MIRI Hupu Mambiha nawua-ngganya yiana na lii langu, 2“Kanjupu rinjungu-ka pandula-ya na Yeruhali ba kanjupu mbuha-nggunja da mangia-nya, dàngu rukuna na mbuha-nggunja nu, na mbana na etinggu hanggangu la mu - muhuna nuna na paraingu. 3Napa kubeli la Yeruhali, na paraingu matua-nggu, hi kundàdiku lai nu. Napa patanda-ya na Yeruhali ba paraingu ma-tuturu-ya dàngu na Tandula-na i MIRI Hupu Mambiha,#Tandula-na i MIRI Hupu Mambiha: Tandula Hiungu. Tandula Matua-ya wàdanya. 4La mambila la paraingu Yeruhali, napa dahili mandapu da boku dàngu da àpu ma-kanjupu kaweda-da hi lupangu da pangga wàngu tokungu. 5Napa dahili mbinu wàngu anakeda ma-pajulu la ànda la paraingu.

6Nuna nu hada manda peku-maya la tau - tau maluri welingu la banjaru yiana, ba tuna nda jia nda peku-ana duku lai Nyungga. 7Napa ku-pamara-ya na banjaru-nggu welingu la ta - tana ngia pa-dundilu-ha, 8hi hili ngàndi beliha welingu la pahunga dàngu welingu la patama, hi dahili ndàdiku la Yeruhali. Napa nyuda banjaru-ngguha tàka Nyungga Ala-dangga. Napa ku-pareta-ha dàngu tuturu dàngu mola,” wàna.

9Napanii i MIRI la banjaru-na, “Pa-màndungu etimi! Nàhu hili rongu-minyaka na kareuku da pambàda tiki-mbuda ba hapajia-ha da wunangu ba tuya na lata ka pahada belinya na Umanggu. 10Ba ndedi patàka-nya na rehi nuna nda ningua mamàka pahewa tau jàka dia bandakai, dàngu nda ningua ma-mambiru welingu la pa-kuwaru-na na muhu. Ku-tunyaka pa-palumungu wàna dua wikina na tau. 11Tàka nàhu nda hama tuna àmangu-apa na pawunda-nggunja da tau da maluri-ipa welingu la banjaru yiana. 12Napa dàngu mambiru-da ba da hàbarungu wini. Napa da wua da pingi angguru-da, napa na-wuangu ihina na tana, dàngu napa napuru dàngu làndangu na urangu. Mbuu ndàbada nuda da kanyuru kuwua-nja da tau da maluri-ipa welingu la banjaru yiana. 13Ha dimi ma-ngiangu la Yahunda dàngu la Ihirailu! Jàka da-paràtungu dua wikida da tau hangàdangu la rehi na ma-làpahu, dapanii, ‘Màla àruki ka nanggàna-mbukau tàparu manggàna-ya na Yahunda dàngu na Ihirailu!’ wàda. Na nyuna napa ku-pahàla-kai, hi dapanii dua wikida napa da tau hangàdangu, ‘Màla àruki ka napuru-mbunggau kanyuru mapuru-nya na Yahunda dàngu na Ihirailu!’ wàda. Jia ba tuna, pa-màndungu etimi dàngu àmbi mangàdatu-du!” wàna.

14Napanii i MIRI Hupu Mambiha, “Ba dawunda-ya na pambeni wànggu da boku la mangilu-mi, kubota-ya la pahuku pambotu-nja. Nda ku-panjilu-anya na botangu-nggu, ku-pahàra-manya duku. 15Tàka nàhu pakanyuru-nggunyaka na ma-ngiangu la Yeruhali dàngu na ma-ngiangu la Yahunda. Jia ba tuna, àmbi mangàdatu. 16Yiada-ha bàdi da hupu liinggu da pawunda-mi: Jàkai kareuku, pekawa ma-padeningu la angumi. Da ma-patandangu ngera ka da-wuangu botangu mamola dàngu matuya na peku. 17Àmbu wukuya na ma-akatu hanggangu la angumu. Àmbu wundadu harangu kambàliku. Huda eti-manggunya na kambàliku dàngu na nda mola dàngu na pa-janggilu,” wàna.

18I MIRI Hupu Mambiha nawua-ngganya yiana na lii langu nduma banjaru-na, 19“Da puaha da pawàngu la wulangu patu, lima, pihu dàngu hakambulu napa danjadi-ha mbabu ma-kanjupu mbàha eti riki mata nduma ma-ngiangu la Yahunda. Mbuha-nyawa na pa-deningu dàngu na peku!” wàmu wànangga.

20Napanii i MIRI Hupu Mambiha, “Napa natoma na rehina ba damaiha la Yeruhali da ma-ngiangu la paraingu dangu.#paraingu dangu; jàka ndia: da paraingu bokulu. 21Napa da ma-ngiangu la hau paraingu dapanii-nja da ma-ngiangu la hili hau paraingu, ‘Màla ka talua pa-marubuku-nya i MIRI Hupu Mambiha dàngu ka-takamahi-nya na kanyuru-na. Kikunggamawa nyuma!’ wàda. 22Ka dangu-nanyaka na tau, dàngu dangu-nanyaka na banjaru na ma-kapingatu mamai la Yeruhali pa-marubuku-ngga Nyungga MIRI Hupu Mambiha dàngu pa-kamahi-nya na kanyuru-nggu. 23La lo - lodu nu napa damaiha da hakambulu tau hangàdangu la haàtu tau Yahundi hi dapanii, ‘Ma-rinjungu-mai duma nyuma pa-ondungu hàma tuna nyimi; nadu ba marongu-ya na-pakanyuru-nanggai nyimi i Ala,’ ” wàda. I MIRI Hupu Mambiha mambàda panii, wàna.

Currently Selected:

HAKARIA 8: KAM

Highlight

Compare

Copy