HAKARIA 7
7
I MIRI na-paaka-nya na puaha manda weli wingungu
1La tànggalu patu wulangu Kihiliu, nu na wulangu hiwa, la ndaungu papatu wàna, ba na-pareta i Hanganji Ndariu, nahili wuangga lii langu i MIRI.
2Da ma-ngiangu la Mbetilu mbàda palewa-danyaka i Harehiru dàngu i Renggimu-Meliku dàngu da tauda palua la Umana i MIRI Hupu Mambiha pakarai kanyuru-na. 3Pa-paràhangu-mbuha ka tuna yia ba paàra-nja da ratu dàngu da wunangu, “Lupangu-mapa ihi bàdi ma-paduduru-nya na kabuna na Umana i MIRI wàngu puaha la nimbihu wulangu lima hama tuna na pambàda wàma la dangu ndaungu mandaina?” wàmi wàdanja.
4Yiana-ya na lii languna i MIRI na matàka-ngga, 5“Patàka-nyawa nggubulu-na na ma-ngiangu la paraingu yiana dàngu ba hapajia-ha da ratuka, na puaha dàngu na padudurungu pawunda-da la wulangu lima dàngu pihu na mapihu kambulu ndaungu mandaina nda patembi wàngu-aya lai Nyungga. 6Hamangui ba dangangu ba da-ngunungu, keha ka nahoda-ta wàdama-a,” wàmu wànangga.
7Nunaya na papanii-na i MIRI la ngaruda da wunangu la rehina na ma-làpahu ba ngia-nyapa na Yeruhali dàngu ba daluri mbokaru-pa da mangia-nya. La rehi nu nda mbulungu-bia la nde - ndeha winggiru-na na paraingu na-ndàdiku ningu na tau, tàka lupa la ngaba mbara luruya dàngu la hi - hingi tandula la patama lodu-mbuya.
Na malihu na pawiti-nya na tanawangu
8I MIRI Hupu Mambiha nawua-ngganya yiana na lii langu, 9“La ndau - ndaungu na ma-làpahu kuwua-njaha yiada da pareta la banjaru-nggu, ‘Lupangu-ma ipahuri ma-molangu, ipa-namungu, dàngu ihàmu eti hanggangu la angumi. 10Àmbu kapidihu-ha da kawini meti lei, da ana mamila, da tau hangàdangu da ma-padaingu la hongami, jàka ndia nggàmu biaya na panggàna handuka. Dàngu àmbu wuku-mbuya na ma-akatu hanggangu la angumi,’ wàmunja wànangga.
11Tàka na-malihu na banjaru-nggu dàngu nda ana bihu-màda parongu; dahulu-nja da kahilu-da ka àmbu peku ronguda. 12Da-patongguru-ha da etida hi lupa da-patongguru watungu. Kanjupu mbenika ba nda dakiku-nja da pa-pekangu da pambàda wua-nggunja, la ngaruda da wunangu àmangu. 13Nda kuhema-aha da hamayangu-da, nadu ba nda darongu-mbui ba kupanii Nyungga. 14Hama tuna na làpuru, mbàda wari-ngguhaka hi lupa da-ndàdiku lerangu la ta - tana tau hangàdangu. Yiana na tana ma-kamboka mbàda malinggitu halawàla-naka nda ningu mangia-nya dàngu nabulu jua,” wàna.
Currently Selected:
HAKARIA 7: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
