HAKARIA 4
4
Na harii mata rukuna na tandai palita
1Na papalewa na mambàda panii dàngga nahili maiya hi na bengingga hama tuna ma-bengingu tau ma-katuda. 2“Nggàra paita-mu?” wàna ba na-paàrangu.
“Hapungu tandai palita àmahu rara,” wànggu ba kuhema. “La kapuka-na ningu kanai wai palita-na, la winggiru-na ningu pihu mbua palita maningu pihu pangia humbuda nimbihu-da. 3La kalai la kawana-na na tandai palita ninja da dua reti pingi haitungu,” wànggu.
4Tunaka nu ku-paàra-nya na papalewa, “Nggàra pa-paninu maüda nida ni, umbu?” wànggunya.
5“Ka ndau pianya?” wàna ba na-paàra-ngga.
“Ndia-a dumu umbu,” wànggu ba kuhema.
10bNapanii-ngga na papalewa, “Ba pihuda da palita jiaha da pihu wua matana i MIRI da ma-hamata-ya nggubulu-na na pinu tana,”#Na ndalaru 10b lundu la ndalaru 14 pa-palelingu-ya la ndàkina na ndalaru 5 ka peku pandutu hàmungu-na na lii na papeka. wàna.
11Hàlaka nu kuhili paàra-nya, “Nggàraya na ihina da dua reti pingi haitungu la kalai la kawana-na na tandai palita? 12Hili nggàrayai duna na ihina da dua mbungu kahanga haitungu la pera hola àmahu rara da madua mbunguda da ma-pakajijiru-ya na wai mina haitungu?” wànggu.
13Nahema-ka, “Ka ndau pianya?” wànangga.
“Ndia dumu umbu,” wànggu ba kuhema.
14“Nida jiaha da tau madua da pambàda pindina i MIRI na MIRI panggubulu awangu dàngu da pa-pandumangu la palumu-nya Nyuna,” wàna.
Na njanjina i MIRI lai Herumbambilu
6Na-paràha-ngga paraïna papalewa pa-patàka-nya yiana na lii languna i MIRI lai Herumbambilu, “Nda wàngu màka tanatara-a dàngu nda wàngu màka wiki-mbumu bau madàpangu napa, tàka wàngu Ngahunggu. 7Na ma-palimbangu mahama palindi-mbuya pa-payilangu-ya napa welingu la hanggamu. Napa upahada belinya na Umanggu, tàka la rehi bànjalu-munya na watu ma-manuha la pangia-na, ‘Ai, kanjupu manandangu-ya!’ wàda napa da tau,” wàmu wànangga.
8Hili tàka-nanyai na hili hau lii langu welingu lai MIRI, 9“Mbàda bànjalu-nanyaka na lata Umanggu i Herumbambilu, dàngu napa na-palundu-manya duna mbuu ndàbana nuna na pahadangu. Jàka na-hàrangu-ka nu pi-nanyaka banjaru-nggu, ba Nyungga-maka ma-palewa-kau nyumu, Hakaria lai nyuda. 10aNingu manda kawela-nya nuna nu. Tàka napa daita-ya i Herumbambilu ba na-pahada pangala-nya na Umanggu, hi da-hawola napa,” wàna.
Currently Selected:
HAKARIA 4: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
