ROMA 13
13
Na wai ngera hanggangu la ma-pareta
1Nimbihu-na na tau lupangu-ma na-karadaku bàdi la ma-pareta. Maa ba nda ningua ma-pareta manda ngalangu kawahana welingu lai Ala. Dàngu da ma-pareta la rehi nàhu da-pahàra-nja da kawaha-da la hupu liina i Ala. 2Tuna nuduka na tau na manduba-ku ma-pareta hama biana ba ndubaku-nanya na pa-kawuku-na i Ala. Dàngu na tau na matu-na nu napa na-ngalangu hukungu. 3Nadu na tau na mawunda mahàmu nda nggàra naihi wàngua ka na-mangàdatangu ma-pareta. Mbulungu na tau na mawunda ma-akatu-a duna na ma-mangàdatu. Ka àmbu ku-mangàda-tungu ma-pareta jàka wàmu lupangu-maka bàdi uwunda mahàmu napa pa-wotungu-kau. 4Nadu ba atana i Alaha da ma-pareta da-maràma-ya na pahàmu wàmu nyumu. Na nyuna jàkau wunda ma-akatu, lupangu-maka duna umangàdatu-nja, ba nda kahewa-ana naka-tanguda kawaha la pa-hukungu tau. Atana Alamaha duda, da ma-pàtaka-nya na hukunggu welingu lai Ala la tau da mawunda ma-akatu. 5Tuna nuduka hi lupangu umangàdatu-manja bàdi da ma-pareta – nda mbulungu biana ka àmbu ku-hukungu ba wàmu, tàka rukuna na papàda-mu la eti diha kanandingu-mbumu.
6Nuna-mbuya na latana hi kiri wuangu-mu hilu katiku, nadu da ma-pareta ba pa-nggawina i Alaha da ma-pahàra-nya yiana na wai ngera ma-paihikungu. 7Jia ba tuna mbayaru-hawa la ma-pareta jàka nggàraha nu da pa-mbayaru. Mbayaru-wa hilu katiku jàku lupangu umbayaru hilu katiku; dàngu mbayaru-wa mbewa, jàka lupangu umbayaru mbewa. Mahumbaru-njawa da paràka pa-mahumbarungu dàngu tembi-hawa da paràka patembi.
Na wai ngera la dàngga angu
8Àmbu nggàradu pawuta-mi ka lai nggamu-yakadu, mbulungu-ana bai maràngga pa-wutangu la ngera pa-mbuhangu dàngga angumi. Nadu na mambuha-nya na anguna patau, mbàda pahàra ndàba-nanjaka da ukuna i Muha. 9Nadu na uku anggama Yahundi, nu: àmbu njuraku, àmbu pameti tau, àmbu manganga, àmbu rinjungu pamangu-nya jàka nggàraya na mangu tau hawiangu; ba wàna, mbuu ndàbada nuda anguda da uku hawiangu, mbàda pa-pambulungu-haka mbuu ndàbada hi hau uku-ahaka, “Mbuha-nyawa na angumu patau, hama tuna bau mbuhangu wikimu,” ba wàna. 10Na tau na mambuha-nya na tau hawiangu, nda jia wunda-ana ma-akatu la tau nuna. Jia ba tuna na tau na ma-mbuhangu anguna, jiaya nyunaka na ma-pahàra ndàbanja da-pakaruhi-na na uku anggama-ka.
11Hinggilu-da nuda mbuu ndàbada, pimaminya na rehi nàhu ba jiaya na rehi pawàla-mi welingu la katuda-mi. Nadu na rehi pamàna-nda, narihi mareni-ka nàhu welingu ba hina tapawai. 12Mareni làpahu-nanyaka na rudungu; tiangu-ki harii-nanyaka. Jia ba tuna, ta-pànjangu-maka bàdi pawundaha da pawunda kapàtangu. Mbinu madàka-mandaka bàdi, nu da madàka nduma harii. 13Tawunda-mahaka bàdi da pawunda ma-matua, hama tuna da pakàli wunda tau la harii lodu; àmbu ta-borakungu ba ta-mbabu pa-làpahu-nya na tudana, àmbu ta-maüku. Àmbu ta-njuraku, àmbu tahuri-nya na manda hàmu la nggoda nggàduku-nda. Àmbu ta-pahànggangu, oha-nakai nyuna àmbu jia wàndadu. 14Màtawa ka jiaya i Miri Yehu Karitu na mapeka-nggainya jàka nggàraya bàdi na pawunda-mi. Dàngu àmbu namatu-ya na pambuha tolu na manjala la panunju-ya na itirungu.
Currently Selected:
ROMA 13: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
