ROMA 14
14
Àmbu panjala angu dedimu
1Na tau na manda màndungu hàmu la etina na pawaina lupangu-ma inggepi pahàmu-nya la hongada da angu dedi. Àmbi pahema ngaru dànya rukuna na pa-pamàndu-na. 2Ningu tau ma-pamàndu-nya ba pekuna la pa-àtalu ngangu biana jàka nggàraya. Tàka ninya hawiangu na ma-maluputu pawaina; pa-namatu-nya na papàda etina, mbulungu rii jua-a-duku panganggu wàna. 3Na tau na ma-àtalu nganguna jàka nggàra biaya àmbu napawa-waduya na tau na mangangu tuda papindi-ma-ana; dàngu na tau mangangu tuda papindi-ma-ana, àmbu na-panjala-yai na tau na ma-àtalu nganguna jàka nggàra biaya, nadu ba mbàda kataku-nanyaka paraïna i Ala. 4Màla ka nggamu-kauka dumu nyumu hiu tanggu patanda-nya ngera na ata tau hawiangu? Jàka njoru-nanya jàka hadangu-nanya, hi papina na miri-mananya duna. Dàngu na-ndolaku bà-ndukuma duna napa nuna na ata, ba na-ngalangu-ma duna i Miri pa-pandolaku bànduku-ya.
5Ninya hawiangu na tau na mapeka-nja rihida da lodu hawiangu welingu la lodu da - dangu, tàka na tau hawiangu hama ndàba biada da loduka wàda. Màta-nyaka duna nimbihu-na na tau ka nawàngu etina la papindi-ya na pa-pamàndu-na. 6Na tau na mapeka-nja rihida da lodu hawiangu, nu ba tuna nu tembi wànanya i Miri. Na tau na ma-àtalu nganguna jàka nggàra biaya, nu ba tuna nu tembi wànanya i Miri, nadu ba na-pamalangungu-du lai Miri ba jiaha nuda da pangangu. Hama-manai duna na tau na mangangu tuda papindi-ma-ana; na tau nuna tembi-mbunanya i Miri dàngu napa-malangungu lai Ala. 7Nda ana haàtu-a lai nyuta na maluri nduma wiki-ma-ana; dàngu nda ana haàtu-mbu lai nyuta na mameti nduma wikina. 8Jàka luri-ndanya ba luri-ndanya ndumana i Miri. Dàngu jàka meti-ndanya, ba meti-ndanya ndumana i Miri. Jia ba tuna, ka luri-ndanya, ka meti-ndanyakai, manguna i Miri-mata. 9I Karitu mbàda meti-naka hi naluri beli. Tuna nuduka hi nduma tau luriya Miri dàngu ndumada da tau da mambàda meti-mbuya. 10Jia ba tuna angu dedi! Ka nggikina duna hiu panjala-ya na angu dedimu, nu na angumu papawai? Dàngu ka nggikina duna hiu pawawa-ya nyuna? Napa nyuta mbuu ndàbanda tatàka la hanggana i Ala ka pata-ndanda ngeranda. 11Pa-tulihu-ya la Huratu Matua,
“Langatàka-ma,” wàna i Miri,
“nimbihu-na na tau napa na-marubuku la hangganggu;
dàngu nimbihu-na na tau napa
napeka ba Alaka Nyungga,” wàna.
12Jia ba tuna, nimbihu-nda nyuta papaà-ranguta la hanggana i Ala rukuna na pawu-ndanda.
Àmbu pawiti-nya na pa-njàrangu wàna na angu dedimu
13Jia ba tuna, àmbu ta-maràngga panjala dua wikinda. Na nyuna pamukarungu-ma ka àmbu nggàradu pawunda-mi, na ma-pawiti-nya hi kiri kahala tundungu-na pawunda manjala na angu dedimu, nu na angumu pa-pawai. 14Rukuna ba ku-mbulungu dàngu i Miri Yehu, màndungu-mananya duku la etinggu ba nda ningua ngga - nggàra ma-iraku wikina; na nyuna nuna na-ngalangu pa-iraku la haàtu tau, na ma-pekanya iraku-na. 15Na nyuna jàka na handuka wànya na etina na haàtu angu dedi angu pawaimu rukuna nu jàka nggàraya na pangamu, ka nda palata-amu-nyapa la pa-namungu nu na nggàduku lurimu. Jàka mbàda meti-madu-naka i Karitu lumuna na haàtu tau, àmbu màta-dunya pa-hanggàmaru na tau nuna rukuna jàka nggàraya na pangamu. 16Jia ba tuna pamàndu-manya dimi na mahàmu ba wàmi nyimi nda nahàmu-a ba wànanya paraï tau hawiangu. 17Nadu jàka na pareta-mayaka paraïna i Ala na lurina na haàtu tau, nda na-papingi ningu-apa jàka nggàraya bàdi na pangana dàngu na pangunu-na. Na mapa-pingi jiaya ba nanunju-ya duna na pambuha-na i Ala, napàda-nya na mambiru la etina dàngu ba na-kataku-ya na mbaha eti pawua-na na Ngahuna i Ala. 18Na tau na malumu tunanya nu i Karitu, jiaya duna na maliya na etina i Ala, dàngu hi na-pawili-nya tau hawiangu.
19Jia ba tuna na paora-nda lupangu-maka bàdi ka jia mànuha#na paora-nda lupangu-maka bàdi ka jia mànuha;da lawiti ndai da manda pirada: nyuta ta-yaulu mànuha. da ma-pawiti-nya na mambiru dàngu ka ta-maràngga pa-màndungu pawainda dua wikinda. 20Jàka nggàraya na pambàda paloku-na i Ala àmbu paruha-duya lumuna na pangangu. Mbuu ndàbada da pangangu mahida-maha ka nganja; na nyuna jàka na-pawiti-nya panjala wàngu na tau hawiangu mulana nu na pangamu, njala-munya nyumu. 21Narihi hàmu-mapa àmbu ngangudu tolungu, àmbu ngu-nungudu wai angguru, jàka ndia àmbu nggàradu pawunda-mu jàka panjala wànanya na haàtu angu dedi angu pawaimu. 22Màta kau wunda meha biaya dumu la hanggana i Ala nduma wikimu nu jàka nggàraya dumu na pa-pamàndu-mu. Oha-anaka na tau na manda panjala wikina ba nda napala-tangu-a nanjala-na la ngera jàka nggàraya na mahàmu ba wàna. 23Tàka na tau na maka-nodaru la panganya jàka nggàraya, hàlaka hi nga bia-nanyai, na-panjala-ya paraïna i Ala; nadu nu na paula-na, nda panama-tuanya na ma-màndungu la etina jàka nggàraya na mahàmu dàngu na manjala ba wàna. Dàngu jàka nggàra biaya na pawunda dàngu nda màndungu eti, manjala-maya.
Currently Selected:
ROMA 14: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
