ROMA 12
12
Na luri pangàdangu lai Ala
1Angu dedi! Kanjupu hàmuya i Ala lai nyuta. Tuna nuduka hi karai pambana-kai, kai maraku wànya na lurimi, ka maraku luri pa-pahinggilu-ya ndumana i Ala dàngu na maliya na etina. Tuna numa bàdi na lumungu-mi lai Ala. 2Àmbi namatu-duya na lawiti-na na pinu tana yiana. Pahia-nyawa i Ala ka na-pabidi-ya na lurimi, ka peku panjilungu-mi. Ba timi nu ingalangu papinya na pambuha-na i Ala – nu jàka nggàraya na mahàmu na maliya na etina dàngu na ma-lànyapu.
3Mbàda wua-nangga-nyaka na pana-munguna i Ala. Tuna nuduka hi kupanau ndàbanggai angu dedi: Àmbi kaka-duya na wikimi bai rihi pajangga welingu la tudana. Màtawa kai kaka wikimi ba dàngu pawa-wangumi wikimi; bai kaka wikimi ni-mbihumi pa-namatu-manya na tuda àtalu pawuana i Ala rukuna na pawai lai Yehu Karitu. 4Na ihi daanda dadangu da anggotana. Nimbihu-da nuda da anggota ni - ninguma duda wai ngerada. 5Tuna numbu nyuta. Jiapa-kai ka tadangu hau ihi daa-anda mbuu ndàbanda, maa ba ta-mbulungu-du lai Karitu. Dàngu nimbihu-nda nyuta ta-maràngga papuingu dua wikinda ba anggota la hau ihi daa-ata. 6Nyuta nimbihu-nda nda da-pahama-a da pa-wuangu-ta da palu-mungu wàngu. Nu da pa-wuangu-ta nawua-ndaha i Ala pa-namatu-nya na pa-namungu-na. Jia ba tuna lupangu talumu wànja bàdi nuda da pa-wuangu-ta. Na tau na mani-ngungu pa-wuangu-ya ka na-bobaru-ya na lii langu welingu lai Ala, lupangu-ma nabo-baruya bàdi nu na lii langu, pa-namatu-nya na tuda àtalu na maninya lai nyuna. 7Na tau na ma-ningungu pa-wuangu-ya ka na-ndula tau hawiangu, lupangu-ma naweli etingu bàdi pandula tau hawiangu. Na tau na ma-ningungu pa-wuangu-ya ka napape-kangu tau, lupangu-ma naweli etingu bàdi pa-papekangu tau. 8Na tau na ma-ningungu pa-wuangu-ya ka na pa-ringgitu tau hawiangu, lupangu-ma naweli etingu bàdi pa-paringgitu tau hawiangu. Na tau na ma-ningungu pa-wuangu-ya ka na-wuangu la tau hawiangu welingu la manguna, lupangu-ma na-wuangu wàngu màjangu-bàdi. Na tau ma-ningungu pa-wuangu-ya ka na-kapipi tau hawiangu, lupangu-ma naweli etingu bàdi pa-kapipi tau hawiangu. Na tau na ma-ningungu pa-wuangu-ya ka namila-nya eti na tau hawiangu, lupangu-ma ka dàngu mbaha etina bàdi ba nawunda-ya nuna.
9Màta ka ma-langatàka-ya na mbuhangu-mi. Karaü-nyawa eti na ma-akatu dàngu ka-dupulu-maya na mahàmu. 10Màtawa kai maràngga pambuha weli etingu dua wikimi, hama tuna ma-paangu dedingu-kai daa la hau kuru uma, dàngu kai maràngga pama-ngilungu la patembi. 11Iràmawa dàngu maràna-mi. Àmbi mayaudu. Ràmawa la ndumana i Miri ba dàngu ringgitu-mi rukuna na Ngahuna i Ala. 12Monu-nyawa i Miri ba dàngu hawola-mi, pa-torungu-ma la handukami, dàngu pamukarungu pahama-yangu. 13Màla àru kai pa-ndulangu la papa-tomaya na manjaka-nja da tau Karitu hawiangu dàngu iyema hàmu etiha la umami da ariyaa panda tandami, nu da angu dedi angu pawainda.
14Karaiwa lai Ala ka na-paliri-nja kanyuru da tau da mambana etida lai nyimi. Langatàka, karaiya i Ala ka na-pakanyuru-ha àmbu ràtungu-du. 15Hawola dànjawa da tau da ma-hawola, dàngu hii dànjawa da tau da mahii. 16Màtawa kai luri mambiru dàngga angumi. Àmbi jangga eti la nggoda nggà-dukumi, tàka màtawa kai pa-oringu la tau mangia wawa.#màtawa kai ... mangia wawa;jàka ndia: àmbu tebuku-duha da wai ngaba mangia wawa. Àmbi kakadu wikimi ba narihi na pingumi welingu la tuda pingumi.
17Na tau na mawunda ma-akatu lai nyimi, àmbi papapa wadunya ma-akatu. Wunda-yawa jàka nggàraya na mahàmu la kanandingu tau mbuu ndàbana. 18Pamukarungu-ma la pa-pawiti-nya na papeku-mi la panggolu-mi dàngu mbuu ndàbana na tauka. 19Dou da angu dedinggu duku! Màtangu langatàka àru patungu kiringu, màta bianya duna i Ala ka na-patàkangu hukungu. Nadu ba ninya na pa-tulihu la Huratu Matua, “Nyunggama ma-palimba-nya Nyunggama napa mahuku-nya, wàna i Miri,” na mawàna. 20Tàka nyimi dimi hauya duna jàka manjuu-nanya na papamu, wua-bianya ka nangangu; jàka madau-nanya, wua bianya ka na-ngunungu. Nadu ba tamunya nu tumunya na pa-makia wàna. 21Àmbu pahia-dunya na wikimu ka natalu-ya paraï ma-akatu, tàka màtawa kau talu wànya mahàmu na ma-akatu.
Currently Selected:
ROMA 12: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
