PABOWANGU 2
2
Na lii langu ndumana la Epihu
1“Ndumana na papalewa kabungguru la Epihu, tulihu tumunya yia: Yiana-ya na lii langu welingu lai Nyuna na ma-kawana-nja da pihu mbua kandunu, dàngu na maluanggamai la njongada da pihu mbungu tandai palita àmahu rara. 2Kupi-manya jàka nggàra ulami: Bai mbangatu la paràma dàngu bai torungu langatàka. Kupinya ba ndai wai angu-anya na tau akatu. Dàngu ba mbàda kama-minjaka da tau, pa-pahurungu-kama ba wàda tàka hi ndia biai, dàngu mi-hàluku-mahaka ba tau kambàliku-ha. 3Mi-torungu-ma dàngu mi-mayila-maka lumunggu Nyungga, dàngu ba ndai mbota monungu-mi. 4Tàka na nyuna yiana-ya na mbotu etinggu hanggangu lai nyimi: Nda tunapa na mbuha-mingga la kawungana. 5Jia ba tuna, pangàda-nya jàka nggi tuna marau-naka na ngia pa-kanabu-mi! Dàngu panjilungu-wa welingu la nja - njalami, dàngu paloku-yawa na paràma-mi la wungana. Jàka ndia, napa mai-nggunyaka lai nyumu, hi ku-butuhu-ya na tandai palita-mu welingu la pangia-na. 6Na nyuna ningu-madu hangia mahàmu lai nyumu, nu: ba ndau mbuhanja da paruku-da da tau da ma-kikungu lai Nikulaü, Nyungga nda kumbuha-manyai duku.
7Nggamuya na mapeku ronguna, màtawa ka naeti wànya jàka nggàraya na papeka-na na Ngahuna i Ala la kabunggu - kabungguru!
Nyuda da matalu, napa ku-pahia-nja panganya na wuana na pingi ai luri na maninya la Pirandau, Wokana i Ala,” wàna ka wàmu.
Na lii langu ndumana la Hamiruna
8“Ndumana na papalewa kabungguru la Hamiruna, tulihu tumunya yia: Yiana-ya na lii langu welingu lai Nyuna na mawungangu dàngu ma-malamiri – mambàda meti tàka na maluri beli. 9Kupi-manja da handukami mbuu ndàbami; kupi-manggai bai mila – tàka làti duna wulumi-padua! Kupimanya ba dapu - pulunggai paraï da mapeka wikida ba tau Yahundi-ha, tàka hi ndia paduai; nyuda banjaru-na i Kambàliku-ha! 10Àmbi mangàdatu napa nda pira-anapa na mayila na papàda-mi. Namu-maya, napa i Kambàliku na-patama-nggai hawiangu la uma kapàtangu la pakama-nggai. Nyimi napa mi-pàdangu mayila hakambulu lodu mandaina. Màtawa nyimi kai tuturu lai Nyungga lundu meti, napa duku Nyungga hi kuwua-nggainya na luri langatàka na mapalupangu ba jiaya na pawua jua-nggunggai ba italu.
11Nggamuya na mapeku ronguna, màtawa ka naeti wànya jàka nggàraya na papekana na Ngahuna i Ala la kabunggu - kabungguru!
Nyuda da matalu, nda ana nggàra-apa napa papàda-da paraïna meti pa-panduangu wàna,” wàna ka wàmu.
Na lii langu ndumana la Peranggamu
12“Ndumana na papalewa kabungguru la Peranggamu, tulihu tumunya yia: Yiana-ya na lii langu welingu lai Nyuna na makatangu hapanda dàka mbeli mbapa. 13Kupinya na ngia pa-ngiangu-mi, nu la pangia kanjàka-na i Kambàliku. Nyimi mi-tuturu lai Nyungga. Jiapa ba jiaya i Ànatipa, na hakahii-nggu na ma-tuturu, ba pameti-ya la hanggami, la hibuna i Kambàliku, nyimi ndai pahiningu-a, ba mapawai lai Nyunggakai. 14Jiapa ka tuna nu ninja ba pira batada da panda mbuhanggu lai nyimi: Ninja hawiangu da tau la hongami da matundu-nya na pa-ajaru-na i Mbiliamu. I Mbiliamu na-ajaru-ya i Mbalàku jàka nggiki wàna ba napuha-ya na tau Ihirailu la manjala; ba nawàngu pa-titiru-ha panganja da pangangu pambàda mangejingu la marapu dàngu la pawunda-ha da ma-kajari. 15Tuna numbu lai nyimi, ningumbu tau makata undunya na pa-ajaru-da da makiku-nya i Nikulaü. 16Jiaya ba tuna nu, mi-panjilungu-wa welingu la nja - njalami! Jàka ndia, tiangu-ki mai-nggunyaka lai nyimi hi kubera-ha da tau nuda ba kuwànya na hapanda na maninya la ngarunggu.
17Nggamuya na mapeku ronguna, matàwa ka naeti wànya jàka nggàraya na papeka-na na Ngahuna i Ala la kabunggu - kabungguru!
Nyuda da matalu, napa ku-pahia-nja pangangu roti màna na pa-kàpingu, dàngu napa nimbihu-da da-ngalangu hau watu bara welingu lai Nyungga. Lai nu la watu pa-tulihu-ya na hau tamu bidi, na panda pi tau hawiangu, mbulungu-ana duna na tau na mangala-nya,” wàna wàmu.
Na lii langu ndumana la Tiatira
18“Ndumana na papalewa kabungguru la Tiatira, tulihu tumunya yia:
Yiana-ya na lii langu welingu la Ana Ala, da wua matana hama tuna handaraku epiha, dàngu da wihina da-kareriku hama tuna na wudu patunu. 19Nyungga kupi hàla-manja da pa-rukumi – kupinggai bai mbuhangu angumi patau, bai tuturu, bai ràma, dàngu bai torungu la pa-pàdangu mayila. Kupimanggai bai ràma nàhu narihi dangupa welingu la wungana. 20Tàka na nyuna yiana-ya na mbotu etinggu hanggangu lai nyimi: Nu bai patundu bianya i Ihembilu, na kawini na mapanii pa-paràha-na i Alaka ba wàna. Dadangu-maka da atanggu da pa-panyonga-na dàngu da pa-ajaru-na la pawunda ma-kajari dàngu la panganja da pangangu pambàda mangejingu la marapu. 21Mbàda wuamanggunyaka manggawangu la pa-panjilungu welingu la njalana, tàka nyuna nda nimanya na pànjangu-na pawunda-ha da ma-kajari. 22Pangàda-nya! Napa ku-parahu-nya ka lupa nahidu la ngia pa-katuda-na. Lai nu nyuna dàngu da tau da ma-njuraku dànya napa da-pàdangu mayila dira matiki. Mbuu ndàbada nuda palaku-nggunja nàhuma – hinggilu-na jàka da-pànjangu pa-palaku-ha da ma-akatu dàngu nyuna. 23Ba hapajia-ha da makiku-nya napa ku-pameti-mbuha, ka dapàda-nya paraï da mbuu ndàba kabungguru ba Nyunggama duku maita pa-ràpangu kanandingu eti tau. Napa kutunggai himbalu nunjuya na paruku-mi haàtu - haàtu.
24Tàka nyimi dimi hawiangu la Tiatira ndai tundu-anya nuna na pa-ajaru na ma-akatu, dàngu ndai ajaru-aha da alimu-na i kambàliku. Ka kupeka-nggai nda jia bonja-anggunggai buku ma-pambotu. 25Tàka lupa la rehi tàkanggu napa, màtawa kai pa-daingu la patundu-nya jàka nggàraya na pambàda mangumi. 26-27Nyuda da matalu, dàngu da mawunda pangala-nja da pambuha-nggu lundu hupu njàpuna, napa kuwua-nja kuaha hama tuna na pangala-nggu welingu la Amanggu. Napa nyuda da-ngalangu kuaha welingu lai Nyungga la pa-pareta-ha da banjaru ba dawàngu tokungu bàhi, dàngu la pa-palàjaru-ha da banjaru hama tuna na wuru tana. 28Napa nyuda da-ngalangu kandunu marai romu welingu lai Nyungga.
29Nggamuya na mapeku ronguna, màtawa ka naeti wànya jàka nggàraya na papekana na Ngahuna i Ala la kabunggu - kabungguru!” wàna wàmu.
Currently Selected:
PABOWANGU 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
