PABOWANGU 3
3
Na lii langu ndumana la Haràndi
1“Ndumana na papalewa kabungguru la Haràndi, tulihu tumunya yia: Yiana jiaya na lii langu welingu lai Nyuna na mamangu-nja da mapihu-da da ngahu welingu lai Ala dàngu da pihu mbua kandunu. Nyungga kupi-manya jàka nggàra ulami. Miluri wàdanggai tàka hi metimi padua! 2Jia ba tuna, hadangu-wa, pa-halangatu-ya jàka nggàraya na mani-kinyapa lai nyimi, ba ndedi nameti lundungu. Nadu ba kutàka-nya jàka nggàraya na papalokumi, ndedi ana hauma ma-lànyapu la hanggana i Ala. 3Jia-duya, namu beliya jàka nggàraya na pambàda ajarungu-kai àmangu dàngu jàka nggàraya na pambàda rongumi. Laku-nyawa nuna dàngu kai panjilungu welingu la nja - njalami. Jàka ndai hadangu, napa ka kumai lai nyimi hama tuna na mamanganga; dàngu ndai pi-anya napa jàka pirangu na rehi tàkanggu. 4Ba tuna la hongami nyimi la Haràndi ningu-maipa nyuna tau ma-manggangu pakina ka da-padaingu paili. Nyuda napa da malaku karia-ngga ba dawàngu papaki paki mabara, nadu ba ràkana la patuda nu. 5Ndumada nyuda da matalu napa papaki-nja kalembi mabara. Na tamuda nda jia podahu-angguha welingu la Mbuku Tau Luri. Dàngu la hanggana na Amanggu dàngu da papalewa-na napa kupeka ba mangunggu-nja nyuda.
6Nggamu na mapeku ronguna, màtawa ka naeti wànya jàka nggàraya na papeka-na na Ngahuna i Ala la kabunggu - kabungguru!” wàna wàmu.
Na lii langu ndumana la Pilandepia
7“Ndumana na papalewa kabungguru la Pilandepia, tulihu tumunya yia:
Yiana-ya na lii langu welingu lai Nyuna na ma-matua dàngu na maweli wingungu. Nyuna na makata-nja da kuhi da pa-manguna i Ndautu; jàka na-bunggahu, nda hili ningu-apa mabita-nya, dàngu jàka na-bitangu, nda hili ningu-apa ma-bunggahu-ya. 8Nyungga kupi-manya jàka nggàra ulami. Kupi-manya ba nda pirana na màkami; nyimi mitundu-manyaka na pa-ajaru-nggu dàngu bai tuturu lai Nyungga. Ndumami nyimi mbàda bunggahu-manggu-nyaka na hau na pindu, na panda hili bitana jiapa ka nda nggamuya. 9Inamuya yiana: Da tau da matama la banjaru-na i Kambàliku, ma-kakòlulu hàlaha, da mapeka wikida ba tau Yahundi-ha tàka hi ndia-padua, napa ku-pawiti-nja hi lupa damai pa-maràbaku la hanggami. Dàngu napa nyuda dapinya, ba ku-mbuha-nggai nyimi. 10Rukuna bai tundunya na pareta-nggu la pa-patorungu, napa Nyungga kuopa-mbunggai la rehi handuka na manggàna-ya na pinu tana nggubulu-na. Hi tuna nu na matumbu kama-nanya mbuu ndàbana na tau la pinu tana. 11Napa Nyungga lu mai-manggunya! Mangga pahàmu-nya jàka nggàraya na mangumi, ka àmbu ningu haàtu ma-hànditu-ya na wunda talumi. 12Na tau na matalu, napa kutuya hama tuna kambaniru la uma lilingu-na na Alanggu, dàngu napa na-paengangu nyuna lai nu lundu nu - nu. Na tamuna na Alanggu, dàngu na paraingu-na na Alanggu – nu na Yeruhali bidi na mapuru napa welingu la awangu, welingu la Alanggu – napa ku-tulihu-ya la wikina na tau nuna. Hamanai na tamunggu na mabidi napa ku-tulihu-ya la wikina.
13Nggamuya na mapeku ronguna, màtawa ka naeti wànya jàka nggàraya na papekana na Ngahuna i Ala la kabunggu - kabungguru!” wàna wàmu.
Na lii langu ndumana la Laündikia
14“Ndumana na papalewa kabungguru la Laündikia, tulihu tumunya yia:
Yiana-ya na lii langu welingu lai Amingu, na Hakahii na ma-tuturu dàngu na ma-deningu, pingi polana#pingi polana; jàka ndia: na ma-kawaha-ya. mbuu ndàbana na pa-padika-na i Ala. 15Ku-pimanggai nyimi jàka nggàra ulami; ku-pimanggai nyimi ba ndai maringu ba ndai mbana. Làti duna ka hangia-a! 16Tàka nyimi imbana mamitu-a; nda mbanaminya, nda maringu-minyai. Tuna nuduka hi kumuta-nggai napa welingu la ngarunggu. 17Na paniimi nyimi: ‘Mawulu-ma duma nyuma dàngu na patoma ndàbama duma; nda nggàra ndokua manjaka-nggama,’ wàmi. Tàka ndai pianya ba kanjupu milakai dàngu kanjupu pamila etiya na ngerami! Nyimi mimila, mi-kalulu dàngu mipoki. 18Jia ba tuna ku-panau-nggai kai dingi lai Nyungga àmahu rara, àmahu rara ihi bàngina, ka peku wulumi. Ikeimbu lai Nyungga paki mabara, kai paki kai pandàda-nya na kalulu-mi dàngu na pa-makia wàngu. Dàngu kai keimbu tàda ai kai perinja da matami ka peku ita belimi. 19Da tau da pambuha-nggu, jia-haka da pa-kanyàngi-nggu dàngu da pa-ràmbahu-nggu. Jia-duyaka nu màta kai ringgitu dàngu kai panjilungu welingu la nja - njalami. 20Tàngaru! Nyungga ndolaku-manggunya la ngaru pindu hi ku-kandàrakungu. Jàka ningu tau marongu-ya na liinggu, ka na-bunggahu-ngga pindu, napa kutama tomaya; napa kunga dua dànya, dàngu nyuna hi nanga dua dàngga. 21Nyuda da matalu, napa ku-pahia-nja pa-mandapu dàngga la kanjàka-nggu, hama tuna Nyungga duku ba mbàda talunggu tàka nàhu hi ku-mandapu dànya na Amanggu la kanjàka-na.
22Nggamu na mapeku ronguna, màtawa ka naeti-wànya jàka nggàraya na papeka-na na Ngahuna i Ala la kabunggu - kabungguru!” wàna wàmu.
Currently Selected:
PABOWANGU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
