PABOWANGU 1
1
1Na ihina yiana na mbuku jiaha jàka nggàraha da pa-pawuwa-na i Yehu Karitu rukuda napa da matumbu - matumbu. I Ala napeka-nya i Karitu, ka na-paita-nja da atana i Ala jàka nggàraha tiangu da madedi. I Karitu na-paràhangu papalewa-na lai Yuhani atana, ka napeka-nya nyuna nuda da matumbu - matumbu. 2Ka wàlahu-nanjaka paraïna i Yuhani mbuu ndàbada da paitana; dàngu yiada-haka da pa-patàka-na na ngera hupu liina i Ala, da pa-pakaràngi-na i Karitu la pahakahiina. 3Oha-naka na tau na mambaha-ya dàngu na marongu-ya na lii pa-wunangu la mbuku yiana hamanai na matundu-nya jàka nggàraya na pa-tulihu nu daa. Nadu ba nda na-mandai-apa napa padedi nuna mbuu ndàbana.
Na lii malangu la pihu mbua kabungguru
4Angu dedi maninggai la pihu mbua kabungguru la tana Ahia! Nyungga, Yuhani, ku-monungu ka nawua juanggai kanyuru dàngu mànjaku nyimi mbuu ndàbami paraïna i Ala – ni Nyuna na maninya, na mambàda ninya dàngu na mahili ni pangalanya – dàngu welingu la pihu ngahu da maninja la hangga kanjàka-na i Ala, 5dàngu welingu lai Yehu Karitu, na hakahii na ma-tuturu. Nyuna na ma-kawunga hadangu paluri beli welingu la meti dàngu Nyuna-maka na ma-kuaha-ha da hanganji la pinu tana.
I Yehu nambuha-nda, dàngu ruku metina Nyuna na-pahàla-ta welingu la nja - njalandaka, 6dàngu hi natuta nyuta hau banjaru ratu - ratu paleha la palumu-nya i Ala, na Amana. I Yehu Karitu nuna-duka na ma-bokulu dàngu na ma-kuaha lundu nu - nu. Amingu!
7Tàngaru, nàmunya Nyuna ba na palumburunya karumangu! Mbuu ndàbana na tau napa naita hàlaya Nyuna, lupa nyudambu da mambàda haronjaku-ya. Mbuu ndàbana na banjaru la pinu tana napa da-padudurungu lumuna Nyuna. Deningu-mana, ma-langatàka-ya! Amingu!
8“Nyungga ma-wungangu dàngu mamalamiri,” wàna i Miri Ala, na maninya, na mambàda ninya, dàngu na mahilu ni pangalanya, Mahupu-mbihaya.
Na harii mata rukuna i Karitu
9Nyungga Yuhani, angu dedimi na hama ndewa hama urami la pa-pàdangu mayila, na pahunggu-na nimbihu-na na makiku-nya i Karitu. Nyuta ka ta-patoru-nya la pa-handepa-ya ma ba mangu-dunanda. Nyungga pawàrunguka la nuha Pàtumu, nadu ba ku-bobaru-ya na hupu liina i Ala, na pa-pakaràngi-na i Yehu, ba nawàngu pa-hakahii-nya. 10La loduna i Miri, nyungga naharua-ka paraïna Ngahuna i Ala, ka rongu-nggunyaka talia lii ma-pakodungu – ba hama tuna lingu taropitu-ya – na kareuku la kajia-nggu. 11Na talia lii nuna napanii, “Tulihu-ya jàka nggàraya na paita-mu, dàngu kau pangàndi-nja na mbukuna la pihu mbua kabungguru, yiada da ma-pandàkingu: Epihu, Hamiruna, Peranggamu, Tiatira, Haràndi, Pilandepia, dàngu Laündikia,” wàna.
12Ku-nggilaku la kajia-nggu, ka kuita-ya jàka nggamuya na mapanii dàngga, wànggu. Ka ita-nggunjaka ba pihu mbunguda da tandai palita da pa-pandoi welingu la àmahu rara. 13La padua-da nuda da tandai palita na-ndolaku na haàtu ba hama tuna tauya. Nyuna napaki kalembi bokulu malai lundu la wihina. La kuruna napaki ndàbi kuru àmahu rara. 14Na lunggina nabara hama tuna wulu mbimbi, bara hama kambaya. Da wua matana hama tuna handaraku epiha; 15da wihina da-kareriku hama tuna wudu patunu. Na talia nggoruna hama kawoku wai harangi bokulu-ya. 16Na lima kawana-na na-katangu pihu mbua kandunu, dàngu welingu la ngaruna naluhu na hapungu hapanda dàka mbeli mbapa. Na matana na-kajilaku hama tuna mata lodu la harii mbila. 17Ba kuita-yaka nuna, ka njoru panggubu-nggunyaka la hanggana hama tuna tau metika. Tàka na-padambaku-ngga lima kawana-na, hi napanii, “Àmbu mangàdatu! Nyungga na ma-wungangu dàngu ma-malamiri. 18Nyungga-maka yia maluri! Mbàda meti-ngguka, tàka tàngaru, Nyungga luri-nggunyaka lundu nu - nu. Nyungga ma-kuaha-ya na meti, dàngu na pangia tau meti.#na pangia tau meti; panamatu-nya na pakaka-na na tau la rehi nu, da tau mameti da-ngiangu la pangia ma-kapàtangu la unu tana. 19Jia ba tuna, tulihu-hawa mbuu ndàbada da paita-mu, nu jàka nggàraha da maninja nàhu, dàngu jàka nggàraha napa da manàmu-nja. 20Yiada-haka da panda pingu rukuda da kandunu pihu mbua da paita-mu la lima kawana-nggu, dàngu rukuda da pihu tandai palita àmahu rara: Da pihu mbua kandunu jia-duhaka da papalewa pihu mbua kabungguru, tàka da pihu mbungu tandai palita jia-duhaka da pihu mbua kabungguru,” wàna.
Currently Selected:
PABOWANGU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
