YUNDA 1
1
1Oi angu dedi pambàda paauna dàngu panamu halawàla-na i Ala na Ama, dàngu pa-manggangu ndumana i Yehu Karitu. Ba atana i Karitu-ka, nyungga yia – Yundahu – anguna paluhu i Yakombu, 2ku-monungu:
Màla àruki i Ala ka nawua-nggai kanyuru, pa-namungu-na dàngu mapeku mahàmu mabundu làndangu.
Da kamàla ngguru
3Oi angu dedi pambuha-nggu! Pamukarungu langatàka-manggunya pa-tulihu-nggai huratu rukuna na mànangu na pambàda ukuru-nda. Tàka nàhu ku-rinjungu langatàka-ma papanau-nggai la huratu yiana ka peku mbanami pa-pabera pa-ngalangu ndumana na pawaimi na pambàda handàka pakata-nanya lundu nu - nu i Ala na banjaru-na. 4Nadu nda tambuti-anya, ba ningu tau mambàda tama kangunduhu la padua-nda. Nyuda tau akatu-ha da ma-panjingu njànganya na pulungu rukuna na pa-namungu-na na Alanda, da ma-mbuhangu pahimbu ma-manggawangu la pa-tapanjiru-ya na pa-itiru toluda. Dàngu ba da-tulaku-ya i Yehu Karitu, na Ma-kuaha dàngu na Mirinda na madidi-aya. Pakiringu weli ndaingu-maka ba mbàda nyura mangilu-ya na hukungu ndumada la Huratu Matua.
5Mbuu ndàbada nuda mbàda pi-minjaka. Na nyuna ku-mbuhangu pa-panamu-nggai nggiki hama pamara-nanya paraïna i Miri#Miri; da pa-haleli ndai da manda pirada: Yehu, la hilu Yunani na pahama dàngu Yuhua. na banjaru Ihirailu welingu la tana Mehiru, tàka la malamiri-na hi na-pamolu-nja da tau da manda pawai la hongada nyuda. 6Ingàda-mbuya da papalewa da ma-làmburu-nya na hupu dira kuaha-da hi dalaku wàrunya na pangia memada. Natangga wànja nggili bàhi pa-lupangu paraïna i Ala nuda da papalewa, natuha la ma-kapàtangu la tana mangia wawa. Papàtu pangalangu-ha lai nu hi lupa tàkanya na rehi ratanja hukungu-da la Lodu na ma-mbàringu ngeru. 7Ingàda-mbuha da paraingu Hondumu dàngu Nggomora lupa da paraingu la winggiru-naka, da mawunda-ya na pawunda-da da papalewa nuda. Nyuda dawunda-ha da ma-iraku dàngu da ma-akatu hi lupa pa-mayila wànja epi ma-palupangu rukuda da njalada, ka jiaya na panamu wànya mbuu ndàbana na tauka.
8Tuna numbu nyuda ba da-manggadipangu hi lundu dawunda manjala la tolu wikida. Dalapi-ya na kuaha-na i Ala dàngu hi da-pawawa-ha da ma-bunjuku la awangu mbuta biada. 9I Mikayilu wiki, na mangora-nja da papalewa, nda natoru mbenia patiki ma-palapingu. Ba na-patayaku dànya i Kambàliku ba da-palumu-nya hi nggamu na mangala-nya na metina i Muha, nda natoru mbenia pa-patanda-nya wai ngerana i Kambàliku wàngu kareuku palapingu-na. Tuna yia-a duna na paniina i Mikayilu: “I Miri natenda-nggau napa!” wàna-a. 10Tàka wàngu palapingu-da da tau nuda, da-kaluluku ndàbanya na panda jàngapu-da. Nyuda duda hamana da banda da manda ningu pangàdangu, da mapi wànja da papàda eti-ma-ada. Jiaya nuna-maka nu na pa-molungu wàda. 11Nai a-ai nyuda! Ba da-namatu-duya na ngarangia-na i Kaïngu. Keha ka ngalangu àmahu, da-patiri nggubulungu wikida la lolangu ngia pa-njàrangu, hama tuna i Mbiliamu. Hi pamolu-nja ba da-patidungu-du hamana i Kora. 12Ba talànga nga pa-mbabungu-mi da-palabu eti da hurida la padua-mi. Nadu ba nda da-makia la panga manganga eti, dàngu kehangu-danya kangeha wiki-ma-ada. Nyuda hamana na karumangu patimbu ngilu, tàka hi nda na-papurungui urangu. Nyudambu hama pingi ai manda ningu wuangu jiapa-kai la rehi wuada; nu pingi ai pabuta mangu amungu-ha hi dameti ailulu. 13Hama tuna ngalingu ma-mbangatu la tehiku-ha ba nawàngu pawura, tuna numbu nyuda ba dawura-nja da pawunda-da da pa-makia wàngu. Nyuda jiaha da mahama tuna kandunu laku njadangu-ha da pa-pandengi-na pangia-da la kapàta wuru-yila lundu nu - nu paraïna i Ala.
14I Henuku, na ndalaru papihu wàna welingu lai Andamu, mbàda nyura-mana-njaka àmangu rukuda da tau yiada. Napanii i Henuku, “Tàngaru, napa na maiya i Miri ba na-kariangu riu rata papalewa matua-na 15la pa-patanda-nja wai ngera mbuu ndàbana na tau. I Miri narata-nja wai ngera napa da tau akatu ruku da-pawunda da ma-kajari. Dàngu natunja wai ngerada da tau njala dàngu da tau katadaku rukuda mbuu ndàbada da panii palapingu-da,” wàna.
16Nyuda tau makàli kambunguku-ha dàngu da-panjala tau hawiangu. Nyuda da luri namatu-ya na itirungu-da manjala. Nyuda da-kareuku abungu nduma wikida, dàngu dawotu kahilingu tau ka ta-ngalangu wàngu ba wàda.
Na lii kamahingu dàngu na panaungu
17Tàka nyimi dimi angu dedi pambuha-nggu, inamuha bàdi da pulungu patiki-da àmangu da pa-pahuru-na na Mirinda i Yehu Karitu. 18Nyuda dapanii mangilu-nggai, taï la mareni hupu njàpuna nàmu-njaka da tau da ma-paaka-nggai, nu da tau da maluri namatu-ya na pa-itiru eti wikida na manjala. 19Jiaha nyuda-maka da tau yiada da ma-patumbu-ya na pa-paihangu wàngu. Nda Ngahuna i Ala-a ma-kuaha-ha nyuda, na nyuna na-kuaha-ha paraï itirungu pinu tana. 20Tàka nyimi dimi angu dedi, màtawa kai opa pangala-nya na lurimi palata-nya na pawaimi lai Yehu Karitu. Nuna na pawaimi kanjupu matua-ya. Nu ba timi nu hamayangu-wa wàngu àtalu-na na Ngahuna i Ala, 21dàngu màtawa kai luri mànu la lumbu pa-namungu-na i Ala ba dàngu nedi-minya na mila etina i Yehu Karitu na Mirinda, na mawua-nggai ngeru luri langatàka dàngu ma-palupangu.
22La tau maliu laü etida, màtawa kai paita-nja namila-minja eti. 23Yilaya na tau welingu la epi ka pamara-ha. La tau hawiangu màtawa kai paita-nja na mila-minja eti pa-kariangu mangàdatu-mi, tàka màtawa kai karaü-nja eti dàngumbu da pakida da pambàda kajari wàda itirungu manjala.
Na hamaya wotungu
24I Ala, na mamàka pa-mangganggai ka àmbi injoru, dàngu na mamàka pa-karia-nggai la hanggana na ma-bunjuku dàngu mbaha etimi dàngu nda ningu nyurami, 25didi-aya Nyuna na Ala, Ma-pamàna-nda rukuna i Yehu Karitu na Mirinda. Jiaya Nyuna-maka na Ala ma-mangarangu, ma-bunjuku, ma-kuaha dàngu pa-mahumbarungu piti welingu la handàka-na lupa nàhu dàngu lundu nu - nu! Amingu.
Currently Selected:
YUNDA 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
