DIHA 29
29
Na hunggu maraku la rehi Remi Ndaungu Bidi
(Part. 23:23-25)
1La tànggalu hau wulangu pihu lupangu-ma ipauhi kai lumungu, dàngu àmbi ràmadu paràma mambotu. La lodu nu lupangu-ma palingu-ha da taropitu. 2Wotuwa lai MIRI kameti maraku patunu heu hapi mini, heu mbimbi bumbu, dàngu pihu ngiu ana mbimbi bumbu mahau ndauda, nimbihu-da àmbu ningudu nyurada. Na wau hiritu-da nuda da kameti maraku naliya na etina i MIRI. 3Wotu-mbuha da hunggu maraku pa-karuhi, nu da kanguta, pa-haürungu mina haitungu: tailu mbua kilu ndumana na hapi mini, dàmbu kilu ndumana na mbimbi bumbu, 4dàngu hau kilu nduma nimbihu-da da ana mbimbi. 5Wotumbu heu kamàmbi bumbu ka kameti maraku jàmangu njalaya. Tuna nu na pawàngu bai wundaya na lii podahu njala ndumana na banjaru. 6Yiada da hunggu maraku jiaha da ndàpilu kameti maraku patunu da pawotu pa-kariangu dàngu hunggu maraku mangejingu-na, la tànggalu hau nimbihu wulangu. Dàngu jia-mbuha da ndàpilu kameti maraku patunu nimbihu lodu da pawotu pa-kariangu dàngu hunggu maraku mangejingu dàngu hunggu maraku wai angguru-na. Na wau hiritu-da nuda da hunggu maraku patunu naliya na etina i MIRI.
Na hunggu maraku la Lodu Jàmangu Njala
(Part. 23:26-32)
7La tànggalu hakambulu wulangu pihu lupangu-ma ipauhi kai lumungu. Lupangu-ma ipuaha la lodu nuna dàngu àmbi ràmadu. 8Wotuwa lai MIRI kameti maraku patunu heu kamboka hapi mini, heu mbimbi bumbu dàngu pihu ngiu ana mbimbi mbumbu mahau ndauda, nimbihu-da àmbu ningudu nyurada. Na wau hiritu-da nuda da kameti maraku naliya na etina i MIRI. 9Wotu-hawa da hunggu maraku mangejingu pa-karuhi, nu da kanguta pa-haürungu mina haitungu: tailu mbua kilu ndumana na hapi mini, dàmbu kilu ndumana na mbimbi bumbu, 10dàngu hau kilu nduma nimbihu-da da ana mbimbi. 11Wotumbu heu kamàmbi bumbu nduma lii podahu njalana na banjaru hinggilu-da da kameti maraku jàmangu njala dàngu da kameti maraku patunu nimbihu lodu pa-kariangu hunggu maraku mangejingu dàngu na hunggu maraku wai angguru-na da pawotu la lodu nuna.
Na hunggu maraku la rehi Remi Maü Ma-paraungu
(Part. 23:33-44)
12La tànggalu hakambulu lima wulangu pihu lupangu-ma ipauhi kai lumungu, dàngu àmbi ràmadu paràma mambotu. Pihu mbua lodu mandaina bàdi bai wunda mbabu ka tembi wànya i MIRI. 13La lodu kawunga-na, wotuwa lai MIRI kameti maraku patunu ba jiaha da hakambulu tailu ngiu kamboka hapi mini, dua ngiu kamboka mbimbi bumbu dàngu hakambulu patu ngiu ana mbimbi bumbu mahau ndauda, nimbihu-da àmbu ningudu nyurada. Na wau hiritu-da nuda da hunggu maraku naliya na etina i MIRI. 14Wotu-mbuha da hunggu maraku mangejingu pa-karuhi kanguta pa-haürungu mina haitungu: tailu mbua kilu nduma nimbihu-da da hapi mini, dàmbu kilu nduma nimbihu-da da mbimbi bumbu, 15dàngu hau kilu nduma nimbihu-da da ana mbimbi. Karia-da nuda da hunggu maraku mangejingu, lupangu wotu-mbuha bàdi da hunggu maraku wai angguru da pawàngu. 16Hinggilu-da nuda, wotumbu heu kamàmbi bumbu ka kameti maraku jàmangu njalaya. Nuna na kameti maraku, jiaya na ndàpilu kameti maraku nimbihu lodu dàngu na hunggu maraku mangejingu dàngu hunggu maraku wai angguru-na.
17La lodu padàmbu wàna hunggu marakungu-wa hakambulu dua ngiu kamboka hapi mini, dua ngiu mbimbi bumbu, dàngu hakambulu patu ngiu ana mbimbi bumbu mahau ndauda, nimbihu-da manda ningu nyurangu-ha. 18-19Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
20La lodu patailu wàna hunggu marakungu-wa hakambulu heu kamboka hapi mini, dua ngiu mbimbi bumbu, dàngu hakambulu patu ngiu ana mbimbi bumbu mahau ndauda, nimbihu-da manda ningu nyurangu-ha. 21-22Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
23La lodu papatu wàna hunggu marakungu-wa hakambulu kamboka hapi mini, dua ngiu mbimbi bumbu, dàngu hakambulu patu ngiu ana mbimbi bumbu mahau ndauda, nimbihu-da manda ningu nyurangu-ha. 24-25Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
26La lodu palima wàna hunggu marakungu-wa hiwa ngiu kamboka hapi mini, dua ngiu mbimbi bumbu, dàngu hakambulu patu ngiu ana mbimbi bumbu mahau ndauda, nimbihu-da manda ningu nyurangu-ha. 27-28Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
29La lodu panomu wàna hunggu marakungu-wa walu ngiu kamboka hapi mini, dua ngiu mbimbi bumbu, dàngu hakambulu patu ngiu ana mbimbi bumbu mahau ndauda, nimbihu-da manda ningu nyurangu-ha. 30-31Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
32La lodu papihu wàna hunggu marakungu-wa pihu ngiu kamboka hapi mini, dua ngiu mbimbi bumbu, dàngu hakambulu patu ngiu ana mbimbi bumbu mahau ndauda, nimbihu-da manda ningu nyurangu-ha. 33-34Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
35La lodu pawalu wàna lupangu-ma ipauhi kai lumungu dàngu àmbi ràmadu paràma mambotu. 36Wotuwa lai MIRI kameti maraku patunu heu kamboka hapi mini, heu mbimbi bumbu, dàngu pihu ngiu ana mbimbi bumbu mahau ndauda, nimbihu-da manda ningu nyurangu-ha. Na wau hiritu-da nuda da kameti maraku naliya na etina i MIRI. 37-38Hunggu maraku pa-karia-njawa nuda, mbuu ndàbada da hunggu maraku hawiangu da pawàngu la lodu kawunga-na.
39Nudaha da kalaratu rukuda da kameti maraku patunu, da hunggu maraku mangejingu, da hunggu maraku wai angguru, dàngu da hunggu maraku papeku ba lupangu-ma ihunggu maraku-nja lai MIRI la mba - mbabumi da pambàda kawuku. Nuda da kameti maraku jiaha da ndàpilu-da da kameti maraku da pawotu-mi nduma pa-mbayaru wàngu paràkingu-mi jàka ndia da kameti maraku pawàngu eti wikimi.
40Ka patàka-nanjaka la banjaru Ihirailu i Muha, mbuu ndàbada da papanii-nanya i MIRI la hupu liina.
@LAI 1995 Indonesian Bible Society (Lembaga Alkitab Indonesia)