DIHA 30
30
Na kalaratu la ngera paràkingu
1I Muha nawua-ha yiada da kalaratu la hapajia-ha da liku uruda da kabihu banjaru Ihirailu. 2Jàka na-paràkingu na haàtu mini jàka ndia na-panjanjingu wàngu harangu-na lai MIRI, hi lupa napaka-nya na wikina la hau lii pa-njanjingu, lupangu-ma na-pahàranja mbuu ndàbada nuda da panjanji-na dàngu àmbu jia pandia-nanya na patiki-na.
3-4Jàka na paràkingu lai MIRI na haàtu ana karia na ma-ndàdiku-ipa la uma amana, dàngu napaka-nya na wikina la hau lii pa-njanjingu, tàka na amana nda nambotu eti wa-anya ba narongu-ya nuna, nuna na ana karia lupangu-ma na-padeni-nya mbuu ndàbana na paràkingu dàngu na pa-njanjingu-na. 5Na nyuna ba narongu-ya na ngerana nuna paraïna amana, tàka hi nambotu eti wànya, nuna na ana karia nda napaka-anya paràkingu dàngu pa-njanjingu-na. I MIRI najàma-nya napa rukuna ba nahiri-nya amana.
6-7Jàka na paràkingu na haàtu kawini na mandedi mangoma, jàka ndia ka napaka-nya na wikina la hau lii pa-njanjingu, ka mbàda padiha haha-nanya la mangilu jàka ndiakai ka àtalu biana, jiangu-ma ba napaka-nya paràkingu jàka ndia pa-njanjingu-na. Jàka na-mangoma-ka la lodu malamiri, pa-daingu paka-mana-nyapa paràkingu jàka ndia pa-njanjingu-na mili àru nyuna nda nambotu eti wa-anya na leina ba narongu-ya nuna. 8Na nyuna jàka narongu-ka na leina na ngerana nuna, tàka hi na hirinya paraïna leina la pa-pahàra-nya nu na paràkingu, nda napaka-anya paràkingu dàngu pa-njanjingu-na nyuna. Napa na njàmanya nyuna paraïna i MIRI.
9Jàka na-paràkingu jàka ndia pa-njanjingu-nanyakai na haàtu kawini meti lei jàka ndia kawini pambàda wàrungu-kai na mapaka-nya na wikina, napaka-nya paràkingu jàka ndia na pa-njanjingu-na dàngu lupangu-ma na-padeni-nya.
10Jàka na-paràkingu na haàtu kawini mambàda mangoma jàka ndia ka pa-njanjingu-nanyakai na mapaka-nya na wikina, 11lupangu-ma na-pahàra-ndàbanja nu da panjanji-na, jàka ndiadu nambotu eti wànya na leina ba narongu-ya nuna. 12Na nyuna ba narongu-ya na ngerana nuna paraïna leina, tàka hi nahiri-nya, nda napaka-anyapa paràkingu jàka ndia pa-njanjingu-na. I MIRI najàma-nya napa rukuna ba nahiri-nya leina. 13Ningu hàkuna na mini leina la pa-patunju jàka ndia la pa-pabeta-nya nimbihu-na na paràkingu jàka ndia na pa-njanjingu panjanji-na na papaha-na. 14Na nyuna ba narongu-ya na ngerana nuna paraïna leina, tàka hi nda nambotu eti wànya, lupangu-ma nu na kawini na-padeni ndàbanya na paràkingu-na jàka ndia na pa-njanjingu-na. Mbàda patunju-nanyaka leina nu na paràkingu jàka ndia na pa-njanjingu, nadu ba nda napeka-du mbotu etina ba narongu-ya nuna. 15Jàka na-pabeta-nya la lodu malamiri na paràkingu jàka ndia na pa-njanjingu-na na papaha-na paraïna nu na mini leina, lupangu-ma na mini leina na ma-handepa-ya na injana rukuna nu na pabetangu-na.
16Nudaha da kalaratu pawua-na i MIRI lai Muha rukuna na paràkingu dàngu na pa-njanjingu na pa-kawuku-na na haàtu ana karia na ma-ngiangu-ipa la uma amana, jàka ndia paraïna na haàtu kawini na mambàda mangoma.
Currently Selected:
DIHA 30: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)