DIHA 28
28
Da maraku da pakàli wàngu
(Lu. 29:38-46)
1I MIRI na-paràha-nya i Muha 2pa-patàka-nya na banjaru Ihirailu ba lupangu-ma da-kanuturu pahàmu-nja da re - rehi pa-kawuku ka dawotu-ha da hunggu maraku pangangu na maliya na etina i MIRI.
3Yiada-ha da kameti maraku da pawotu-mi bàdi lai MIRI: Nduma kameti maraku nimbihu lodu, dua ngiu ana mbimbi bumbu mahau ndauda manda ningu nyurada, 4na ana mbimbi na ma-wungangu lupangu-ma ka tuya kameti maraku la mbaru, tàka na padua ngiu wàda la malingu. 5Anguna nuna na ana mbimbi lupangu hunggu marakungu-mbu hau kilu kanguta pa-haürungu hau litaru mina haitungu mahàmu halawàla. 6Yiada-duhaka da kameti maraku patunu ma-padaingu da pa-kawunga wotu la Palindi Hinai. Na wau hiritu-na naliya na etina i MIRI. 7Anguna nuna na ana mbimbi, lupangu-ma wotu hunggu maraku hau litaru angguru na paburi la pinu ngia pawotu maraku. 8Ba hunggu maraku wànya na ana mbimbi na padua ngiu wàda la malingu, lupangu-ma hama tuna na pawàngu la hunggu maraku mbaru, pa-karia-nya wai angguru. Na wau hiritu-na nuna na kameti maraku naliya na etina i MIRI.
Na hunggu maraku la lodu Hangahu
9La lodu Hangahu lupangu-ma hunggu marakungu dua ngiu ana mbimbi bumbu mahau ndauda manda ningu nyurada, dàmbu kilu kanguta pa-haürungu mina haitungu ka hunggu maraku mangejingu dàngu hunggu maraku wai angguru-ha. 10Yiana na kameti maraku patunu lupangu-ma pawotu-ya la nimbihu lodu Hangahu, ka ndàpilu kameti maraku nimbihu loduya dàngu na hunggu maraku wai angguru-na.
Na hunggu maraku la tànggalu hau nimbihu wulangu
11La kawunga nimbihu wulangu lupangu-ma hunggu maraku-nya kameti maraku patunu i MIRI wàngu dua ngiu kamboka hapi mini, heu mbimbi bumbu, pihu ngiu ana mbimbi bumbu mahau ndauda, nimbihu-da manda ningu nyurangu-ha. 12Nduma hunggu maraku mangejingu lupangu wotuma bàdi kanguta pa-haürungu mina haitungu; tailu kilu kanguta nduma nimbihu hapi mini; dàmbu kilu kanguta nduma mbimbi bumbu, 13dàngu hau kilu kanguta nduma nimbihu ana mbimbi bumbu. Yiana na kameti maraku patunu, kameti maraku pangangu-ya, tàka na wàu hiritu-na naliya na etina i MIRI. 14Anguda nuda da kameti maraku patunu wotumbu hunggu maraku wai angguru, dua litaru nduma nimbihu hapi mini, hau paradua litaru nduma mbimbi bumbu, dàngu hau litaru nduma nimbihu ana mbimbi. Nuna duyaka na kalaratu la ngera kameti maraku patunu da pawotu mànu la tànggalu hau nimbihu wulangu lundu kanjupu-ya na ndaungu. 15Nduma ndàpilu kameti maraku nimbihu lodu dàngu na hunggu maraku wai angguru-na, lupangu-ma ihunggu marakungu-mbu heu kamàmbi bumbu nduma kameti maraku jàmangu njala.
Na hunggu maraku la Lodu Remi Roti Nda Patai Wolungu
(Part. 23:5-14)
16La tànggalu hakambulu patu la wulangu hau, jia-yaka na Lodu Paha ndumana i MIRI. 17Na lodu ndàkina la tànggalu hakambulu lima pakiringu-nanyaka na Remi Roti Nda Patai Wolungu na mapihu mbua loduna mandaina. Nu la pihu mbua lodu àmbi ngangudu roti pa-pandoi wàngu tai wolu. 18La lodu kawunga-na na mbabu, lupangu-ma ipauhi kai lumungu dàngu àmbu ràmadu paràma mambotu. 19Wotuwa lai MIRI kameti maraku patunu dua ngiu kamboka hapi mini, heu mbimbi bumbu dàngu pihu ngiu ana mbimbi bumbu mahau ndauda, nimbihu-da àmbu ningudu nyurada. 20Wotu-hawa da hunggu maraku mangejingu pa-karuhi, nu da kanguta pa-haürungu mina haitungu: tailu mbua kilu kanguta nduma nimbihu-da da hapi mini, dàmbu kilu ndumana na mbimbi bumbu, 21dàngu hau kilu nduma nimbihu-da da ana mbimbi bumbu. 22Wotumbu heu kamàmbi bumbu ka kameti maraku jàmangu njalaya. Tuna nu na pawàngu bai wundaya na lii podahu njala ndumana na banjaru. 23Mbuu ndàbada da kameti maraku yiada jiaha da ndàpilu maraku patunu mbaru da pakàli wàngu. 24Ba hamana nuna na pawàngu lupangu-ma iwotu lai MIRI kameti maraku patunu lundu kanjupu-ya na pihu mbua lodu. Na kameti maraku yiana jiaya na ndàpilu kameti maraku nimbihu lodu dàngu na hunggu maraku wai angguru-na. Na wau hiritu-na nuna na kameti maraku naliya na etina i MIRI. 25La lodu papihu wàna lupangu-ma ipauhi kai lumungu, dàngu àmbi ràmadu paràma mambotu.
Na hunggu maraku la rehi Remi Muti
(Part. 23:15-22)
26La lodu kawunga-na na Remi Muti, na lodu mbabu ba hàla papihu mbua minggu, la rehi hunggu maraku-minja lai MIRI da uhu nggàndumu mabidi, lupangu-ma ipauhi kai lumungu dàngu àmbi ràmadu paràma mambotu. 27Wotuwa lai MIRI kameti maraku patunu dua ngiu hapi mini, heu kamboka mbimbi bumbu dàngu pihu ngiu ana mbimbi bumbu mahau ndauda, nimbihu-da àmbu ningudu nyurada. Na wau hiritu-na nuna na kameti maraku patunu naliya na etina i MIRI. 28Wotu-hawa da hunggu maraku mangejingu pa-karuhi, nu da kanguta pa-haürungu mina haitungu: tailu mbua kilu nduma nimbihu-da da hapi mini, dàmbu kilu ndumada da mbimbi bumbu, 29dàngu hau kilu nduma nimbihu-da da ana mbimbi. 30Wotumbu heu kamàmbi bumbu ka kameti maraku jàmangu njalaya. Tuna nu na pawàngu bai wundaya na lii podahu njala ndumana na banjaru. 31Da kameti maraku yiada dàngu da hunggu maraku angguru-na, jiaha da ndàpilu kameti maraku nimbihu lodu dàngu da hunggu maraku mangejingu.
Currently Selected:
DIHA 28: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)