DIHA 27
27
Da anana kawini i Helapehàtu
1I Helapehàtu tau malima-ha da anana kawini, nu i Màhala, i Nua, i Hòkula, i Miluka dàngu i Tiràhu. Na amana i Helapehàtu jiaya i Hepiru, na amana i Hepiru jiaya i Nggiliatu. Na amana i Nggiliatu jiaya i Makiru, na amana i Makiru jiaya i Manahi, tàka na amana i Manahi jiaya i Yuhupu. 2Da malima da anana i Helapehàtu dalua la hanggana i Muha dàngu i Ratu Eliahàru, hamangui ba hapajia-ha da liku uru dàngu nggubulu-na na banjaru na ma-pauhi la lihi pindu Maüna i MIRI. Dapanii nyuda, 3“Na amama nyuma na meti la maràda telangu dàngu nda ningua anana mini. Nda haàtu makiku-nya i Kora-aya nyuna, na ma-patula ngganggangu hangganya i MIRI. Nuna na amama nyuma, metina ruku njala wiki-mana duna. 4Tàka ka nggikina hi na-àlingu na tamuna welingu la banjaru Ihirailu rukuna ba nda ningu anana minia? Wuambu-nggàma duma nyuma tana kangeha-ma dàngu da angu dedina na amama,” wàda.
5Tunaka nu, patàka-nanyaka i Muha na palakara-da nyuda lai MIRI, 6tàka i MIRI napanii-nya i Muha, 7“Na pa-karuhi-da nuda da anana i Helapehàtu ma-paàndangu-maya. Ba tuna wua-njawa nyuda tana kangeha anguda da angu dedi amada. Na kangeha-na i Helapehàtu lupangu-ma papuru-nya la anana kawini. 8Panii-nyawa na banjaru Ihirailu jàka nameti na haàtu tau mini tàka hi nda ningui anana mini, na tana kangeha-na lupangu-ma pa-kangeha-nja da anana kawini. 9Jàka nda ningu anana kawini na tana kangeha-na pa-kangeha-nja la anguna paluhu. 10Jàka nda ningu anguna paluhu nuna na tanana ndumada da angu paluhu ama-naha. 11Jàka nda ningu anguna paluhu jàka ndia angu paluhu amana nuna na tanana mangu angu kabihu nditaku-naha,” wàna. Yiana na pawàngu lupangu-ma na-pahàra-nya paraï tau Ihirailu ka hau kalaratu ukuya ba pareta pawua-na MIRI-ya la ngaruna i Muha.
Ba pindiya i Yuhua ka nahilu-ya i Muha
(Bel. 31:1-8)
12I MIRI napanii-nya i Muha, “Heiwa la Palindi Ambarimu kau tàngaru-ya welingu lai nu na tana na pawua-nggunya napa na tau Ihirailu. 13Bau hàlaka paita-ya, napa umeti hama tuna na ayamu i Harungu, 14nadu ba mbàda ndubaku-minyaka na hupu liinggu, nyimi pa-kadua-mi, la maràda telangu Njingu. Ba na-hoputu ndàbangga rayatu la Marimba, ndai bihua nyimi papeka-nja nyuda na kawaha-nggu rukuna nuna na wai,” wàna. (Nuna nu natumbu ningu la matawai Marimba la Kandihu la maràda telangu Njingu.)
15Ka hamayangu-nanyaka i Muha, 16“Ou, MIRI Ala, mawua-nya paluri wàngu la mbuu ndàbana na maluri, ku kamahi-nggau, patuji-wa haàtu na ma-ngalangu pa-kapipi-ya yiana na banjaru; 17haàtu na ma-ngalangu panjadi mini la ngora la rehi pabera-da. Àmbu màta-dunya yiana na banjaru-mu ka hama kabàba mbimbiha manda ningu mapawa-nja,” wàna.
18Napanii i MIRI lai Muha, “Paau-nyawa i Yuhua anana i Nungu. Haàtu tau ma-hakapu-maya nyuna. Pa-dàmbaku-nya limamu la pinu katiku-na. 19Paràha-nya pa-ndolaku la hanggana i Ratu Eliahàru, dàngu na nggubulu-na na banjaru. Lupangu-ma ubobaru-ya la hanggada nyuda mbuu ndàbada ba jiaya i Yuhua na hilumu nyumu. 20Wuanya hawiangu na kawaha-mu nyumu lai nyuna, ka na-karadaku-nya banjaru Ihirailu. 21Lupangu-ma na karai timbangu lai Eliahàru i Yuhua, tàka napa i Eliahàru na-paàra-nya na pambuha-nggu Nyungga ba nawàngu Urimu dàngu Tumimu.#Urimu dàngu Tumimu; Jiaha da madàmbu-da da pawàna na ratu kapi wànya na pawuku-na i Ala. Nda papi padeni-anya jàka wàngu panggiki hamana ba wànja nuda nu. Tuna nu na pawàna i Eliahàru ba na-kapipi-ya i Yuhua dàngu nggubulu-na na banjaru la mbuu ndàba palakara pahangga-da,” wàna. 22Ka pahàra-nanyaka i Muha mbuu ndàbana na papanii-na i MIRI la hupu liina. Na-paràha-nya pa-ndolaku i Yuhua la hanggana i Eliahàru dàngu nggubulu-na na banjaru. 23Hama tuna na pambàda paniina i MIRI la hupu liina, pa-dàmbakungu-nanyaka limana i Muha la pinu katiku-na i Yuhua hi na-bobaru-ya ba jiaya i Yuhua na hiluna nyuna.
@LAI 1995 Indonesian Bible Society (Lembaga Alkitab Indonesia)