DIHA 25
25
Ba la Palindi Piuru-ya na banjaru Ihirailu
1Ba talànga ndàdiku-da la Lolangu Hitimu na banjaru Ihirailu pakiringu-danyaka da tau mini pakiu-kau dànja da kawini Muapu da maninja lai nu. 2Nuda da kawini dawànda-ha nyuda palua la mba - mbabu kameti maraku patembi wànja da marapu-da nyuda. Da tau Ihirailu da-kikungu-mbu panganya na kameti maraku dàngu da-marubuku-nya na marapu tau Muapu. 3Rukuna ba da-marubuku-nya na Mbaàlu la Piuru da tau Ihirailu nambeni-nja paraïna i MIRI hi napanii lai Muha, 4“Yàpa ndàbaha da tau da maliku urunya na banjaru dàngu pameti-hawa la hangga madangu ba pahàra-nya na hupu liinggu, ka na-pànjangu nambeni-nggunya yiana na banjaru,” wàna. 5Tunaka nu panii-nanjaka da hakimu Ihirailu nyuna i Muha, “Lupangu-ma nyimi imaràngga pameti-ha mbuu ndàbada da tau la kabihu-mi da mambàda marubuku-nya na Mbaàlu la Piuru,” wàna.
6Ba talànga hii padudurungu-da i Muha dàngu nggubulu-na na banjaru la pindu Maüna i MIRI, daita-ya na haàtu tau Ihirailu matama kariangu haàtu kawini Mindiangu hu daa la maüna. 7Ba naita-yaka nuna paraïna i Pineha, anana i Eliahàru, umbuku-na i Harungu, hadangu-nanyaka hi na-dunjaku-nya na pauhi. Hi napiti hapungu nimbu 8hi nalua pandàki-ha daa la maü nu na mini dàngu na kawini. Tunaka nu hi na-haronjaku wànja nimbu nuda da tau madua ka pànjangu wàngu-nanyaka na tàparu na matungu la Ihirailu. 9Na nyuna mbàda tau 24.000-yaka na tau na mameti.
10Hàla, napanii i MIRI lai Muha, 11“I Pineha anana i Eliahàru, umbuku-na i Harungu, wàngu ringgitu-na ba na-kahiri-ya na patembi wàngga la njonga tau Ihirailu, hi lupa na-wadaru na mbeninggu dàngu hi nda kutàka-nya la pa-patàlaru-ya nuna na banjaru. 12Jia ba tuna pekanya i Pineha ba tura-nggunya hau pa-njanjingu dàngu nyuna. 13Pa-padaingu-ya nyuna dàngu ana umbuku-na la paratu lundu nu - nu, nadu ba kanjupu ringgitu-ya ba na-kahiri-ka Nyungga, Alana, dàngu ba mbàda wunda-nanyaka na papeku nduma njala tau Ihirailu,” wàna.
14Na tamuna na tau pa-pameti pa-pohungu na kawini Mindiangu Himuri-ya, anana i Halu, liku uru hau kalibaru la kabihu Hamiungu. 15Na tamuna nuna na kawini Kòmbihu-ya; nyuna anana i Njuruya, na liku uru la hau kaloka kalibaru la Mindiangu-ya.
16I MIRI nawua-nya yiana na pareta i Muha, 17“Hada-nyawa na tau Mindiangu dàngu patàlaruha nyuda, 18rukuna na akatu na pambàda unada hanggangu lai nyimi la Piuru, dàngu rukuna i Kòmbihu na ana haàtu liku uru kalibaru la Mindiangu. Nu i Kòmbihu na kawini pa-pameti ba natungu na tàparu rukuna la Piuru,” wàna.
@LAI 1995 Indonesian Bible Society (Lembaga Alkitab Indonesia)