DIHA 24
24
1Nàhu pii-nanyaka i Mbiliamu ba na-mbuhangu i Ala ka na-pakanyuru-nya na banjaru Ihirailu. Tuna nu duka hi nda nalua pahimbu ta - tanda hama tuna na pawàna ba ndedipa nu. Na-tàngaru hanggangu la maràda telangu i Mbiliamu, 2hi naita-ya na banjaru Ihirailu la kali - libaru uma tera pa-namatu-nya na kabihu banjaru-da. Tàka na Ngahuna i Ala najuju-ya i Mbiliamu, 3hi lupa natiki-ya yiana na manyura-na,
“Yiana-ya na lii languna i Mbiliamu anana i Mbeuru,
na lii na lawiti-na na haàtu maharii matana
4na mambàda ronguha da papanii-na i Ala
dàngu na maita-ya na pa-paita-na i Mahupu Mbiha,
dàngu tanggilungu-na, tàka na nyuna wàngu mata ma-pabulangu.
5Kanjupu manandangu-ha da maümu ha Yakupu,
dàngu da ngia pa-ngiangu-mu ha Ihirailu!
6Hama tuna lolangu ma-nggailaru ba na-tawàlahu,
jàka ndia hama woka ngia pambawa la hingi luku;
hama tuna pingi homa pa-pamula-na i MIRI,
jàka ndia hama pingi ai kajiu la hingi luku.
7Da-ngalangu wai urangu mabundu làndangu,
da wini tondungu dangala padangu wai.
Na-bunjuku na hanganji-da napa, narihi-nya i Anggàku,
dàngu pa-pabokulu-ya napa na pa-hanganji-na.
8I Ala na maluhu ngàndiha nyuda welingu la Mehiru,
hama hapi mbàtingu matamba-ya ba na-pabera ndumada nyuda.
Dahoba pambuta-ha da banjaru muhuda,
da-pa-karunggutu-ha da rii kawudu-da,
da panada dapata-ha.
9Nuna na banjaru hama hinga mini dàngu bai hingaya,
na ma-pamuku dàngu na ma-manyomba.
Nggamu matoru mbeni pa-pahada-nya?
Màla àruki ka pa-kanyuru-nya na tau na ma-pakanyuru-nggau nyumu,
dàngu ka ràtunya na tau na maràtu-nggau nyumu,” wàna.
10Ba dàngu mbenina na-pakawudu-ha da limana i Mbalàku, hi napanii lai Mbiliamu, “Hi ku-paaunggau kau ràtunja da papanggu wànggu làti, tàka pa-kanyuru pàku-muha lundu pandailu wundangu. 11Laku memangu-kau nàhu kau beli la uma! Mbàda pa-njanjingu-ngguka làti la pawua-nggau wundamu, na nyuna nda na-pahiangu-a i MIRI kau ngalanja nu da wundamu,” wànanya.
12Nahema i Mbiliamu, “Ka nda mbàda panii-anggunja da papalewa-mungga, 13ka jiapa kau wua ndàba-nggahakai da àmahu bara dàngu da àmahu rara da maninja la umamu, ba nda jia pangga-anggunya na hupu liina i MIRI la pawunda-ya na pambuha eti wikinggu? Jiaya na papanii ba wànangga i MIRI-a duku na papanii-nggu,” wàna.
Da manyura panjàpu wàda
14Napanii i Mbiliamu lai Mbalàku, “Beli-nggunyaka nàhu la banjaru wikinggu. Na nyuna ba ndedi kulaku ku-mbuhangu pa-panamu haha-nggaunya jàka nggàraya napa na pawunda-na na banjaru Ihirailu la lodu malamiri hanggangu la banjaru-mu nyumu,” wànanya. 15Hàla, tiki-nahaka i Mbiliamu yiada da manyura,
“Yiana-ya na lii languna i Mbiliamu anana i Mbeuru;
na lii na lawiti-na na haàtu maharii matana
16na mambàda ronguha da papanii-na i Ala,
dàngu peku tanda-nanya i Mahupu Jangga;
na maita-ya na pa-paita-na i Mahupu Mbiha
ba dàngu tanggilungu-na tàka na nyuna wàngu mata ma-pabulangu.
17Ku-itaya nyuna, tàka na nyuna nda nàhua;
ku-tàngaru-ya nyuna, tàka na nyuna welingu la mamarau.
Na haàtu hanganji na ma-welingu la Ihirailu,
napa namaiya beri kandunu ma-handaraku-ya.
Napa na-pamuburu-ha ba hapajia-ha da liku uru Muapu
napa na-pamija-ya na banjaru-na i Hetu.
18Napa na-mandapu-nya muhuna na tana Endumu,
na nyuna na banjaru Ihirailu nawunda pawunda ma-kaborangu.
19Welingu lai Yakupu napa na-kawudaku na haàtu maningu kawaha-na,
na ma-patàlaru-ha da muhuna,” wàna.
20Tunaka nu, nu la pa-bowangu ita-nahaka da tau Amaliku i Mbiliamu. Katiki-nanyaka yiana na manyura-na,
“Welingu la mbutana na banjaru la pinu tana,
jiaya na Amaliku na marihi pa-kawaha.
Na nyuna la hupu njàpuna, yiana na banjaru,
napa na-molungu-mbu, lundu nu - nu,” wàna.
21Nu la pa-bowangu ita-nahaka da ana umbuku-na i Kaingu i Mbiliamu, hi natiki-ya yiana na manyura-na,
“Deningu-mana na pangia-mi ba na-nggàpulu-ma,
beri hibu la pinu watu pungguru majangga-ya.
22Na nyuna nyimi tau Keni, napa pa-patàlaru-kai,
nda namandai-apa napa ba na-ndundilu-kai paraï Ahuru pa-tanawa-nggai,” wàna.
23Tunaka nu natiki-mbuya yiana na manyura-na i Mbiliamu,
“Hanggàmaru-duyaka! Nggamuipa maluri, jàka nawunda-ya nuna i Ala?
24Na nyuna welingu la Hipuru nàmunja napa na hau kabàba kapalu,
na Ahuru dàngu na Hembiru, na-pakàku-ha,
tunaka nu na kabàba kapalu-mbu na-tàlaru-mbu napa,” wàna.
25Hàla kamomatu-nanyaka i Mbiliamu pabeli la pangia-na, dàngu laku-mbunanyai duna i Mbalàku.
@LAI 1995 Indonesian Bible Society (Lembaga Alkitab Indonesia)