NAHUMU 3

1Nai-a-ai yiana na paraingu mambinu wàngu kambàliku dàngu bungu wai ria;

nambinu-nya malanja pa-rambangu jàka ndia pa-ribangu.

2Ronguwa kaheuku iwi dàngu kanggeriku ndutungu,

kangguruku njara mapalai dàngu kareta ma-tanggàjiru.

3Da pamba li la njara da-kaluluku wàngu ànjaru-da,

da hapanda re - rerida, dàngu da nimbu ji - jilada.

Nda pataü padiha-ha da tau mameti,

da metida dapabu - bundungu

dawàngu pa-tunjuru wànja tau.

4Na Naniwa pahunda pa-wuangu-ya padua-ka hukungu.

Na manandangu-na pa-maratangungu-ya.

Dangu banjaru pambàda palaku-na alimu,

dàngu na-pamanda-nja#na-pamanda-nja; jàka ndia: natuha atana. wàngu minangu kareuku-na.

5Napanii i MIRI Hupu Mambiha,

“Ha dumu Naniwa, ku-pamayila-kau napa!

Ku-kalàba-ya na laümu la hangga ba - banjaru,

hi daita-ya na pa-makia, wàmu.

6Ku-palua-nggau lima hama malanja pa-mayitangu,

ku-patàda-nggau ma-marihaku;

kutukau pa-imingu, wàngu.

7Na wiliru na maita-kau hi napanii napa,

‘Na Naniwa tanyungguru watu ndàba-ayaka!

Nggamu ma-handuka dànya nyuna?

Nda ningua mawua-nya omba eti,’ ” wàna.

8Ha dumu Naniwa, jia rihi hàmu-mukaka nyumu welingu la Tembi na parai puhu pareta Mehiru? Na Tembi la hingi luku-mbuya na maopa-nya beri hama kangeli. Tubangu, na Luku Nilu jiaya na tindingu ngia pa-torungu-na. 9Na Tembi na-pareta-ya na Hundangu dàngu na Mehiru, dàngu nda ningu dirana na kawaha-na; na Limbia dàngu Putu jiaha da angu pakuhingu-na. 10Jiapa-kai ba tuna, da ma-ngiangu la Tembi pa-dundilu-ha la ngia pa-tanawangu. La mbuu ndàba kahanga ànda pa-pameti-ha da anada. Ba hapajia-ha da tau bokulu-da, patuu la nggili bàhiha hi pabe - berinja la hapajia-ha da ma-tanawa-nja.

11Ha dumu Naniwa, umeti widimbu nyumu napa paraï pa-maüku. Napa nyumu upamukarungu-mbu kau mara welingu la mu - muhumu. 12Mbuu ndàba da ngia pa-torungu-mu hama tuna pingi kapilitu-ha napa, ma-kabàta wàngu wua marara-na. Jàka kàduku-nya nuna na pingi ai, napa da-kambutuku da wuana la ngaru tau ma-mbuhangu panganya. 13Da panjuri-mu da pa-maluputu tau kawiningu tàka na tanamu nda ana payatangu ndokuna, ba hangganya na muhu. Dakehi la epi da-kahoru pindu bokulu-mi. 14Taku biawa wai ka rima hahangu wàngu, pa-namatu-nya na mandaina ba nggupulu-kau, dàngu pa-kapingatu-ha da tindingu-mu! Kali - lijakungu-wa kapihaku ka pandoi watu rara, dàngu pandoi hahaha padua da maluda! 15Nggàra biaya na pawunda-mu, napa kahewa-ma-ana, nadu ba jiangu-ma bau meti la epi, jàka ndia uhanggubalu la pa-hànjalungu. Napa umolungu hama tuna ihi woka pa-pambuta kabala.

Mbàda paworu kabalangu-muka nyumu. 16Da tau danggangu-mu dalàpa-ha da dangu kandunu la awangu! Tàka nàhu da-molungu-ka, hama tuna kabala ma-wàlahu ruu kàpada hi da-hawurungu lundu munangu-da. 17Ba hapajia-ha da tau bokulu-mu dàngu da maningu wai ngabangu hama kabàba kabala-ha ma-pa-hangindingu la kangeli la rehi maringu. Tàka ba nahunga-ka na lodu lu hawurungu-danyaka hi da munangu; nda haàtu-a mapinya jàka nggiha dalaku ningu.

18Ha dumu hanganji Ahuru! Ba hapajia-ha da nggumbunuru-mu mbàda meti-daka, tàka ba hapajia-ha da mbupati-mu katuda lundu nu-danyaka. Da rayatu-mu dapai - ihangu la ma-palindingu, dàngu nda haàtu-a ma-ngalangu pa-karia-nja la pabeli. 19Na jàramu nda pa-ngalangu-a patunya muru, dàngu da manua-mu nda pa-ngalangu-a pa-pahàmu-ha. Mbuu ndàba na tau marongu-ya na kabumu da-kapokukungu lima paraï pambaha eti. Nadu mbuu ndàba na tau mbàda mayila-daka ruku akatu-mu na manda ningu dirana.

Currently Selected:

NAHUMU 3: KAM

Highlight

Compare

Copy