MÀRUKU 9
9
1“Nàhu kai pi hahanya wànggunggai,” wàna i Yehu. “Ninja hena la hongami nyimi da manda pàdanya na meti, jàka ndedi madu daita-ya ba na-pareta wàngu kawaha-na i Ala!” wànanja.
Ba pa-mangara-nya i Miri Yehu
(Mat. 17:1-13; Luk. 9:28-36)
2Pa-làngangu nomu mbua lodu karia-nanjaka i Peturu, i Yakombu dàngu i Yuhani anguna paluhu i Yakombu paraïna i Yehu, hi da-pamehangu la hau palindi jangga. Ka pa-njilungu-nanyaka na hadana i Yehu la hanggada nyuda. 3Kanjupu bara kalilangu-ha da pakina. Nda jia ningua haàtu tau la pinu tana la honga tau ma-kalorungu la pabaha paki, mapingu pa-pahama baranja nuda. 4Tunaka nu ita-danyaka i Yehu paraï da madua haàtu-da da makiku-nya ba na-pabanjaru dànja i Elia dàngu i Muha. 5Ka panii-nanyaka i Peturu lai Yehu, “Ai Umbu Ngguru. Mahàmu langatàka-maya ba lai yiahu-ta. Màta làti ka mawulu kàmbungu tailu mbua; hau Nyumu, hau i Muha dàngu hau i Elia,” wànanya. 6Hi kiri panii tuna nu i Peturu, nda pima-ananya tubana jàka nggikina wàna bàdi, ba mangàdatu halawàla-madanya dàngu da anguna da madua.
7Tunaka nu pa-nggàbalu-nanjaka karumangu hi ronguya na ma-kareuku welingu la karumangu, “Yiana-ya duku na Ana pambuha-nggu. Patingi-nyawa Nyuna!” wàna. 8Ka ri - ringa-daka pa-pawilikungu matada, hinggilu-na i Yehu nda haàtu-apa paita-da lai nu la lihida. 9Nu ba talànga kamburungu-da welingu la pinu palindi naràndi-ha paraïna i Yehu, “Àmbu jia ningudu ngia papanii-minya na paita-mi kawai, jàka ndedi pahada-nya na Ana Tau welingu la meti,” wànanja.
10Nuna nu da-pamàndu-manya, na nyuna maràngga paàrangu-madanya dàngga anguda ba hapajia-ha, jàka nggàraya na pawuku-na i Yehu, “na luri beli welingu la meti,” ba wàna. 11Ka paàra-danyaka, “Nggikina duna namai mangilu-mapa bàdi i Elia hi kiri wàda da ngguru anggama?” wàdanya.
12Nahema i Yehu, “Deningu-mana, ba namai mangilu i Elia pa-palànyapu ndàbaya. Tàka nggiki-naka duna na ngerana na Ana Tau? Nggikina duna hi ninya la Huratu Matua, napa Nyuna na-pàdangu mayila dangu dàngu na-paaka-nya tau, ba wàna? 13Na nyuna ka kupeka-nggai: Mbàda mai-manaka i Elia, hi nawàngu eti biana na tau papalua-nya lima. Nu na pa-tangangu-ma na pa-tulihu la Huratu Matua na rukuna nyuna,’ ” wànanja.
Na pahàmu-nanya na anakeda pa-huruku wàndi akatu i Miri Yehu
(Mat. 17:14-21; Luk. 9:37-43a)
14Ba nabeli-yaka i Yehu dàngu da tau matailu papanau-na la honga papanau-na hawiangu, daita-ya ba nadangu na tau lai nu. Tàka da ngguru anggama da manda pirada da-patayaku dànja da papanau-na i Yehu. 15Ba daita-kiyaka i Yehu, ngàtaru wàna biaka na tau dangu, hi da-manyamalu palua pa-tàbuku-ya. 16“Nggàra-yaka nu na pabàti-mi dàngu da ngguru anggama?” wàna i Yehu ba na-paàra-nja da papanau-na.
17Nahema na haàtu la honga tau dangu, “Ngàndi-nggunggaunya na ananggu Umbu Ngguru. Na-kambànga paraï pa-huruku-ya wàndi akatu. 18Jàka na-ràkapu-ya wàndi, nanda - ndakilu-nya la tana, nawura na ngaruna, ke - kehuda da parua-na, hi na-halata ndàba na ihina. Kukarai-mahaka làti da papanau-mu ka dawàngga-ya na wàndi akatu, tàka nda damàka-a,” wànanya.
19Nanapa-ya i Yehu, “Ai ha lalu-mananggai nyimi yia. Kanjupu nda pawai-makai. Lundu pirangu-mapa bàdi ba kututu-kai dàngu ba ku-patoru-nggai? Ngàndiya nàmu na anakeda!” wànanja. 20Ka ngàndi-danyaka na anakeda lai Yehu.
Ba naita-kiyaka i Yehu paraïna wàndi, pa-hayinda-madua-nanyaka na anakeda hi lupa nanjoru, nanggi - nggilungu la tana ba dàngu wurana na ngaruna. 21Ka paàra-nanyaka na amana paraïna i Yehu, “Pira mandai-manaka ba tuna nu?” wànanya.
“Weli pa-anakeda-manaka,” wàna na amana. 22“Naingu-mana na-jukaru-nanya la epi jàka ndia la wai, ka pameti-ya ba wàna. Na nyuna ba tuna jàkau peku làti pa-pandulangu, mila àru-nggama eti dàngu ndula àru-kama làti Umbu,” wànanya.
23“Nggàra wàmu? Jàkau peku làti wàmungga?” wàna i Yehu. “Napeku ndàbama duna, mili pawai àru nyuna,” wànanya.
24Ka wara-madua-nanyaka na amana na anakeda, “Miri kupawai-ma duku, na nyuna najapu na pawainggu. Ndula àruka ka na-bonjangu-ki na pawainggu,” wàna.
25Ba naita-yaka maina pa-langgungguru na tau dangu paraïna i Yehu, kayàka-nanyaka na wàndi akatu, “Ha wàndi kawanga ma-kambànga, luhukau welingu la anakeda yiana, àmbu hili tama-dunyapa wànggunggau,” wànanya.
26Ka kaladaku-nanyaka na wàndi akatu hi na-pahayinda-nya na anakeda, hàla hi naluhu-ya. Hama mameti bia-yaka ba itaya na anakeda, “Meti-nanyaka,” hi wàna ndàbanya tau. 27Tàka i Yehu nayàpa-ya na limana hi na-pahada-nya. Ka hadangu-nanyaka na anakeda.
28Ba la uma-yaka i Yehu, mai meha-danyaka da papanau-na hi da-paàra-nya, “Nggikina ihu nyuma hi nda peku wàngga-manya na wàndi akatu?” wàdanya.
29Nahema i Yehu, “Nda peku-ana la pawàngga-ya na wàndi akatu tungu yia, jiapa ka nggàrakai pawàngu mbulungu wàngu hamayangu-ma-a,” wànanja.
Nahili peka-nanya na metina i Miri Yehu
(Mat. 17:22-23; Luk. 9:43b-45)
30Ka laku-nanyaka welingu lai nu i Yehu dàngu da papanau-na hi dali ningu la Nggalilia. Tàka nda nabihu-a i Yehu ka napinya tau jàka ngginiya Nyuna, 31nadu ba papeka-nanjapa da papanau-na ba tuna yia na papeka-na, “Pa-pakatangu la lima tauya napa na Ana Tau, hi da-pameti-ya, tàka la patailu wàna na lodu na-hadangu beliya,” wànanja.
32Nda da-jàngapu-aya na pa-pekangu-na i Yehu paraï da papanau-na, tàka nda datoru mbeni pa-paàra-nya.
Nggamu na marihi pa bokulu?
(Mat. 18:1-5; Luk. 9:46-48)
33Ka tàka-danyaka la Kapinaumu. Ba la uma-haka, paàrangu-nanyaka i Yehu la papanau-na, “Nggàra pàkuya na pa-palumu-mi nàmu kawai la ngarangia?” wànanja.
34Nda dahema-a, maa ba pa-lumungu-dudanya nàmu kawai la ngarangia jàka nggamu marihi. 35Mandapu-nanyaka i Yehu hi napaau-nja da ma-hakambulu madua-da da papanau-na hi napanii-nja, “Na tau na ma-mbuhangu pangia ngaba, la malamiri dehi-maya bàdi dàngu ka nalumu ndàba-manya bàdi na tau,” wànanja. 36Tunaka nu piti-nanyaka haàtu anakeda kudu i Yehu, hi na-pandolaku-ya la hanggada mbuu ndàbada. I Yehu narohu-ya na anakeda hi napanii-nja da papanau-na, 37“Na tau na mainga haàtu anakeda tungu yia lumunggu Nyungga, inga-nangga Nyunggama. Tàka na tau na mainga-ka Nyungga, nda didi meha-aka Nyungga painga-na, inga-mbunanya na ma-palewa-ka,” wànanja.
Na manda papanda nyuta angu-nanda
(Luk. 9:49-50)
38Ka panii-nanyaka i Yehu paraïna i Yuhani, “Umbu Ngguru ma-itaya na haàtu na mawàngga wàndi ba nawànya na tamumu. Tàka hi mahiri-nya maa ba nda na-paoringu-a lai nyuta,” wànanya.
39Nanapa-ya i Yehu, “Àmbi hiri-dunya, nadu ba nda jia ningua haàtu tau mawunda wànya pa-hangàtarungu na tamunggu, hi jia pulu wa ma-anangga. 40Nadu na tau na manda papanda, angu-nanda nyuta. 41Ngàda-maya! Na tau na mawua-nggai wai pa-unungu rukuna ba jiakai tauna na Hanganji Ma-pamànangu, jiangu-ma ba na-ngalangu wundana,” wànanja.
Da ma-pawitingu hi kiri njalana na tau
(Mat. 18:6-9; Luk. 17:1-2)
42“Jàka nggamu ma-pawiti-nya hi jia nda hili wai bia-nangga paraïna haàtu jua-a welingu la anakeda màrahu yiada, narihi hàmu-mapa ka hondunya watu nggihu na nggoruna ka mangu panduha-ya la tehiku. 43Jàka lima-munya na ma-pawiti-nggau panjala, kadipu biaya! Narihi hàmupa jàkau luri lai Ala dàngu nda ningu lima hapapa-mu, welingu bau tama mangu dua mbungu limamu la naraka, nu na epi lundu nu. [44Lai nu nda nambàda-a na epi dàngu nda dameti-a da kataru.] 45Jàka wihi-munya na ma-pawiti-nggau panjala, kadipu biaya. Narihi hàmu-mapa jàkau luri lai Ala dàngu nda ningu wihi hapapa-mu, welingu ba wàru mangu kadua mbungu wihinggau la naraka. [46Lai nu nda nambàda-a na epi dàngu nda dameti-a da kataru.] 47Jàka wua mata-munya na ma-pawiti-nggau panjala, ruki biaya. Narihi hàmu-mapa jàkau tamanya na Tana Bidina i Ala dàngu nda ningu wua mata hapapa-mu, welingu ba wàru mangu kadambu wua matanggau la naraka. 48Lai nu nda nambàda-a na epi dàngu nda dameti-a da kataru.
49Nimbihu biana na tau jiangu-ma napa ba paili wànya epi, hama tuna ba paili wànja mehi da kameti maraku.
50Na mehi nahàmu-ma, na nyuna jàka nalua-yaka pakàba, peku-napa nu pa-pambàru beliya? Ba tuna, màtawa nyimi ka hama tuna mehikai – màtawa kai luri mambiru dàngga angumi,” wànanja.
Currently Selected:
MÀRUKU 9: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
