MÀRUKU 10
10
Na pa-pekangu-na i Miri Yehu rukuna na pahewa-da da mapalei pa-pahangu
(Mat. 19:1-12; Luk. 16:18)
1Tunaka nu hadangu-nanyaka i Yehu welingu lai nu, hi nalaku la tana Yundia dàngu la tana hapapa Luku Yorundangu. Ka hili mai-mananyai na tau dangu pa langgungguru-nya i Yehu. Ka papeka-nanjaka hama tuna na pakàli wàna.
2Damaimbu da manda pirada da tau Parihi la pa-kahili-ya i Yehu, hi da-paàra-nya, “Pekuna ihu la uku anggama-nda la pa-wàrungu papaha?” wàdanya.
3Nanapa-ya i Yehu, “Nggikina wànanggai i Muha la hupu liina?” wànanja.
4“Na-pahiangu-ma i Muha la pa-wàrungu papaha mili tulihu mangilu pàku huratu pahewa,” wàda ba dahema-ya.
5Tàka i Yehu, “Ruku katiku watu dimi hi na-tulihu-nggainya nu na hupu liina i Muha,” wànanja. 6Tàka weli mulangu-ma duna, ba nawulu tau i Ala, ‘mini kawini-maha ba nawulu-ha paraïna i Ala. 7Tuna nu duka na mini ka na-dunjakungu inana amana, hi na-pambulu dànya na papaha-na,#La lawiti ndai da manda pirada nda ningua kareuku tungu yia: hi na-pambulu dànya na papaha-na. 8hi hau tolu-ahaka pa-kadua-da,’ ba wàna daa. Ba tuna, nda tau madua-ahapa, tàka haàtu-ahaka. 9Nuna-duyaka na pakiri-na, jàka nggàraya na pambàda pambulu-na i Ala, nda peku-ana ka na-pahewa-nja tau!” hi wànanja.
10Ba datama-ka la uma, paàrangu-danyaka da papanau-na na rukuna nuna. 11I Yehu napanii-nja, “Jàka nggamu ma-wàrungu papaha-na hi nahili pahai haàtu, njuraku-nanya ba ni-dunyapa na papaha memana.#na papaha memana: jàka ndia: na kawini nuna. 12Tuna numbui na kawini na ma-wàrungu leina hi na-leingui haàtu, njuraku-mbunanya,” wànanja.
Na peka-nanja mahàmu da anakeda i Miri Yehu
(Mat. 19:13-15; Luk. 18:15-17)
13Ninja da tau da mangàndi anada lai Yehu ka naràma-ha dàngu ka napeka-nja mahàmu. Tàka hi dambeni-nja paraï da papanau-na i Yehu. 14Ba naita-ya nu, mbeni-nanjaka paraïna i Yehu hi napanii-nja, “Puli bianja da anakeda ka damai lai Nyungga. Àmbi hiri-dunja, maa ba tau tungu yiadu manjadi ana banjaru-na i Ala. 15Ngàdaya yiana! Jàka nggàmuya na manda hurungu hama tuna haàtu anakeda la hanggana i Ala, nda jia njadi-ana ana banjaru-na i Ala,” wànanja. 16Ba panii tunaka nu, rohu-nahaka da anakeda i Yehu, hi na pa-dambaku-nja lima, hi napeka-nja mahàmu.
Na mini wùlu
(Mat. 19:16-30; Luk. 18:18-30)
17Ba nahili laku i Yehu, manyamalu-nanyaka na haàtu nàhu la ngarangia, hi na-marubuku la hanggana i Yehu hi na-paàra-nya, “Màla nu Umbu Ngguru mahàmu, nggàraka bàdi pawunda-nggu ka peku ngala-nggunya na luri ma-langatàka dàngu na ma-palupangu?” wànanya.
18Nanapa-ya i Yehu, “Ka nggikina mahàmu hi wàmungga? Nda ningua mahàmu, hinggilu-na i Ala-a. 19Ba pi-madumu-nja da hupu liina i Ala, ‘Àmbu pameti tau, àmbu njuraku, àmbu manganga, àmbu hakahii kambàliku, àmbu palapingu, tembiha da amamu da inamu,’ da mawàda,” wànanya.
20“Umbu Ngguru,” wàna nu na tau, “mbuu ndàbada nuda da hupu lii mbàda nunju weli pa-anakeda-ma-nggunjaka,” wànanya.
21Tàka i Yehu hi napanau-ya ba dàngu mila-nanya eti, “Hangia-anaka na majapu-nggau. Luawa kau dangga ndàbanja da pawùlu-mu; da àmahu wilida kau wuanja da mamila, napa ungalangu banda la awangu. Hàlaka nu, maiwa kau kikungga,” wànanya. 22Ba narongu-yaka panii tuna nu i Yehu, hala-nanyaka na etina, hi nabeli mangu handukangu, maa ba dira wùlu-duya.
23Tàka i Yehu, hi napanau-ha da papanau-na hi napanii-nja, “Lalu nda mudaya na tau mawùlu panjadi ana banjaru-na i Ala.
24Ngàtaru wàda biaka da papanau-na ba darongu-ya nu na paniina i Yehu. Tàka hi nahili panii i Yehu, “Ai, dimi ananggu, manda muda-maya duna panjadi ana banjaru-na i Ala. 25Narihi muda ningu-mapa na heu ota patama la mambowa utu welingu la haàtu mawùlu patama la Tana Bidina i Ala,” wànanja.
26Nu da papanii-na i Yehu na pa-hangàtaru-ha da papanau-na, hi da-maràngga paàrangu dàngga anguda, “Jàka tuna nu nggamu-ayaka ihu na mamara?” wàda.
27Ka panau-nahaka paraïna i Yehu hi nahema, “Nda peku-manaka duna la tau, tàka nda ningua manda peku lai Ala; napeku ndàbama duna lai Ala,” wànanja.
28Hi napanii i Peturu, “Màla nyuma yia, mbàda dunjaku ndàba-manjaka hi makiku-nggau Nyumu,” wànanya.
29Nanapa-ya i Yehu, “Langatàka-manggunya ka kupeka-nggai, na tau na mambàda dunjakungu umana, jàka ndia anguna paluhu, jàka ndia ana winina, jàka ndia inana, jàka ndia amana, jàka ndia anana, jàka ndia làtangu-na, wokana, lumunggu Nyungga, dàngu lumuna na Lii Mànangu welingu lai Ala, 30narihi dangu na pangala-na na tau nuna la rehi nàhu. Na pa-hangahu wundangu parihi dangu ba na-ngalangu uma, angu paluhu, ana wini, ina, ana, làtangu woka, – dàngu mayila-mbu. Tàka napa la rehi na manàmu-nya, nangala-nya na luri na ma-langatàka dàngu na malundu nu. 31Na nyuna nadangu na tau na ma-mangilu la rehi nàhu, napa na-malamiri-ya; dàngu nadangu na tau na ma-malamiri la rehi nàhu, napa na-mangilu-ya,” wànanja.
Na pa-pandilungu wàna ba napeka-ya na metina i Miri Yehu
(Mat. 20:17-19; Luk. 18:31-34)
32Hanàhu-da la Yeruhali i Yehu dàngu da papanau-na. Nàhuya la mangilu i Yehu, tàka da-hondaru ndàba da papanau-na. Tàka na tau dangu da makiku-nja da ma-malamiri da-mangàdatu-mbu. Tunaka nu hili paau pameha-nanjaka da papanau-na i Yehu, hi napanii-nja jàka nggàraya napa na manggàna-ya Nyuna. 33“Kai rongu,” wànanja, “nàhu lua-ndanya la Yeruhali. Napa lai nu pa-pakatangu la ra - ratu pangora dàngu la nggu - ngguru anggama-ya na Ana Tau. Napa darata-nya hukungu-na la pa-pameti-ya, hi damangu pa-pakata-nya la tau nda Yahundi. 34Napa da-paaka-nya, da-pangànji-ya, da pajàra-ya, dàngu hi da-harika-nya. Tàka la patailu wàna na lodu hi na-hadangu beli,” wànanja.
Na pakarai-da i Yakombu dàngu i Yuhani
(Mat. 20:20-28)
35Ka hurungu-danyaka lai Yehu i Yakombu dàngu i Yuhani da anana i Hambandiu, “Umbu Ngguru,” wàda, “hangia-na na-pakarai-ma, ka tuna-nggama nu i Umbu Ngguru, wàmanggau làti,” wàdanya.
36“Ka nggàraya-nu na parinju-mi, màta ka tunanda nu, ba wàmi,” hi wàna i Yehu ba na-paàra-nja.
37Danapa-ya nyuda, “Ma-mbuhangu pa-mandapu la kawana la kalaimu, jàkau mandapu-ka la ngia pa-bunjuku-mu, Umbu,” wàdanya.
38Nanapa-ya i Yehu, “Ndai pi-anya jàka nggàra-ya na pakarai-mi,” wànanja. “Itorungu-du pa-unungu la kaba wai mayila na paunu-nggu napa dàngu la patama-nya na mayila nda najaru na ngia patama-nggu napa?” wànanja.
39“Ma-torungu,” wàda ba dahema. Nahili paninja i Yehu, “Iunungu-ma nyuna la kaba wai mayila na paunu-nggu napa, dàngu itamama nyuna la mayila nda najaru na ngia patama-nggu napa. 40Na nyuna, jàka nggamu napa ma-mandapu la kawana la kalainggu, nda ngabanggu Nyungga-aya duku la pa-kawuku-ya. I Ala duna na ma-kawuku-ya nuna jàka nggamuha napa da ma-mandapu-nja nuda,” wànanja.
41Ba darongu-yaka nu paraï da pa-panaungu hawiangu nu da ma-hakambulu-da, hoputu-danjaka i Yakombu dàngu i Yuhani. 42Tuna nuduka hi kiri paau ndàba-nanja paraïna i Yehu, hi napanii-nja, “Bai pi-madunja da liku uruda da banjaru manda tandaya i Ala ba da kapidihu rayatu-da. Tàka da tau boku - tau bokulu-da jia mayai duda ba da-roduku-nja nyuda. 43Na nyuna àmbi timi nudu nyimi! Hauya duna, na tau na ma-mbuhangu pa-bokulu lai nyimi jia-maya bàdi na malumu-nggai. 44Tàka na tau na ma-mbuhangu pangia ngaba lai nyimi jia-maya bàdi na ata ndàbami. 45Nadu na Ana Taumbu, hi kiri maina nda jia-aya keha ka nalumu-nya tau. Tàka mainanya pa-lumungu tau duna dàngu mainanya pa-pajàma-nya na lurina keha ka pahàla tau madangu,” wànanja.
I Miri Yehu na-pahàmu-ya i Mbàratimiu na mapoki
(Mat. 20:29-34; Luk. 18:35-43)
46Ka tàka-danyaka la Yeriku. Ba daluhu-haka welingu la paraingu nuna i Yehu dàngu da papanau-na hamanai na tau dangu, ninya na haàtu tau poki mandapu-na padua pakarai pandemangu la hingi ànda. Na tamuna Mbàratimiu-ya anana i Timeu. 47Ba narongu-yaka ba jiaya i Yehu tau Naharitu na manàhu-nya, ka wara-madua-nanyaka, “Dou Umbu Yehu, anana i Ndautu! Namu àruka!” wàna.
48Ka mbeni-danyaka paraï tau dangu, kandii ba wàdanya. Ba tuna hama huka pa-kodungu-mana ba nawara, “Dou anana i Ndautu namu àru-kika,” wàna.
49Ka pànjangu-nanyaka i Yehu, “Paaunya,” hi wàna.
Ba tuna paau-danyaka nu na mapoki. Hi dapanii-nya, “Kamàndalu-wa nu! Paau-nanggau i Yehu, hadangu-wa!” wàdanya.
50Lumbatu wàna-ma-duaka ba na-dunjaku-nyaka na kalembi malaina, hi nalua lai Yehu.
51Hi na-paàrangu i Yehu, “Màla, nggàraka pambuha-mu nu pawunda-nggunggau?” wànanya.
Nahema na mapoki, “Màta ka kungita wànggu làti, Umbu Ngguru,” wàna.
52“Lakuwa,” wàna i Yehu, “rukuna bau pawai lai Nyungga, hàmu-munyaka,” wànanya.
Ka ngita-madua-nanyaka la rehi nu. Hi natundu-nya i Yehu la ngarangia.
Currently Selected:
MÀRUKU 10: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
