MÀRUKU 8
8
Nawua-nya pangangu na tau patu rata i Miri Yehu
(Mat. 15:32-39)
1Ndedi nggi tuna mandaina, hili nàmungu-mai tau dangu mamai pa-pauhi. Ba nda ningu pangaada ka paau-nanjaka da papanau-na paraïna i Yehu hi napanii-nja. 2“Kumila-nya eti yia na tau dangu. Mbàda tailu mbua lodu-daka ba lai Nyunggaha, tàka nàhu nda ningua pangaada. 3Jàka ku-paràha-nja dàngu manjuuda da-haluputu-ka napa la ngarangia. Tàka hi ningumbu ma-welingu la mamarau,” wànanja.
4Dahema da papanau-na, “Ka nggii biaka ta-ngalangu ningu pangangu lai yiahu la ma-malinggitu tuda ngangu ndàbana yiana na tau?” wàdanya.
5“Pira mbuada hena da roti lai nyimi,” hi wàna i Yehu ba na-paàra-nja.
“Pihuda,” wàda ba dahema.
6Ka paràha-nanyaka na tau dangu i Yehu pa-mandapu la tana hi napiti-ha da roti da mapihu-da hi na-pamalangu-nya i Ala. Hàlaka hi nakawi - wita wànja limana da roti hi napakei-nja da papanau-na ka paberi-nja da tau. Ka pa-beringu-danyaka da papanau-na. 7Ningumbui ana iyangu da manda pira ngiuda; hi na-pamalangungu lai Ala i Yehu rukuda nuda, hi na paràha-nja da papanau-na ka dapabe - beri-mbunja da iyangu. 8-9Ka ngangu-danyaka lundu mbihuda – ba ràkangu tau 4.000-ya na mangangu. Hàlaka pauhi-danjaka da rihida paraï da papanau-na i Yehu – pihu mbua mbola mbinuda. Hi napuli-nya pabeli na tau i Yehu, 10tàka Nyuna dàngu da papanau-na ailulu hei-danyaka la tena hi dapala la Ndàlumanuta.
Na karaida tanda pa-hangàtarungu da tau Parihi
(Mat. 16:1-4)
11Ninja da tau Parihi da mamai lai Yehu, hi da-patayaku-dànya ka ta-kahili wànya ba wàda. Dakarai-ya i Yehu ka ningu pa-hangàtarungu pawunda-na ka hau tandaya ba welina lai Ala.
12Ka ringu langu-nanyaka la eti i Yehu hi nahema, “Ka nggikina ihu na banjaru handàni nàhu hi nakarai-ka la patuu tanda pa-hangàtarungu? Ndia-a! Nda jia wua-anggunja tanda tungu nu!” wàna.
13Ka laku wàru-nanjaka paraïna i Yehu, hi nahei la tena; nu pala-nanyaka la hapapa tàma.
Tai wolu tau Parihi dàngu i Harondi
(Mat. 16:5-12)
14Da ma-rombangu pangàndi roti tudana da papanau-na i Yehu. Hau-ana na roti la tena. 15“Ipananjarungu-ma la tai woluda da tau Parihi dàngu la tai woluna i Harondi,” wànanja paraïna i Yehu.
16Ka pa-banjaru wàda-nyaka nuna da papanau-na i Yehu, “Hi kiri panii tuna nu, jiaya ba nda ningu rotinda,” wàda.
17Ba pi-mananya paraïna i Yehu nu na papanii-da, ka paàra-du-nanjaka, “Ka nggikina dimi hii panii wànya ba nda ningu roti? Ka ndedi-mapa mipinya dàngu ndedi-mbupa mi-jàngapu-ya? Kanduba halawàla-mananyaka na kanandingu-mi? 18Hi ningu madu matami – ka nggikina hi ndai ita? Hi ningu-madu kahilu-mi – ka nggikina hi ndai rongu? Ka ndai namu-ahapa 19da lima mbua roti da pakawi - witanggu nduma tau 5.000? Pira mbua mbola mbinuda da pangangu da marihi da pa-pauhi-mi?” wànanja.
“Ha-kambulu dàmbuda,” wàda.
20“Dàngu ba jiaya nakawi - witanggu roti pihu mbua nduma tau 4.000 pira mbua mbolada da pangangu da marihi da pa-pauhi-mi?” hi hili wàna i Yehu.
“Pihuda,” wàda.
21“Màla ndedi-mbupa nu ijàngapu-ya?” hi hili wànanja.
Na pahàmu-na tau mapoki i Miri Yehu la Mbetuhaida
22Tàkangu ba wàdaka la Mbetuhaida, lua ngàndi-nanyaka tau lai Yehu na haàtu tau mapoki hi dakarai-ya ka naràma àruya la pa-pahàmu-ya. 23Ka londa-nanyaka na mapoki paraïna i Yehu hi na-karia-nya la hambeli paraingu, hi na-pangànji-ha da wua matana na mapoki. Hàlaka hi na-padambaku-nja limana, “Ninguka nu pangita-mu?” wàna ba na-paàra-nya.
24Ka pawula-nanyaka nu na tau hi napanii, “U-u ku-itangu tau malaku; tàka hama tuna pingi ai biaha ba itaha,” wàna.
25Tàka i Yehu nahili pa-dambaku-njai lima da wua matana nu na tau. La rehi nu pa-mukarungu-nanyaka pa-tàngaru. Ka hàmu-danyaka da wua matana hi na-habola ndàba ba naita-ya. 26Hi napanii-nya paraïna i Yehu, “Beliwa àmbu hili tama dupa ni la paraingu,” wànanya.
Na pekana i Peturu rukuna i Yehu
(Mat. 16:13-20; Luk. 9:18-21)
27Lua-nanyaka i Yehu dàngu da papanau-na la nde - ndeha winggiru-na na Kaiharia Pilipi. Ka paàra-nanjaka nàhu la ngarangia da papanau-na, “Màla dimi, nggamuya wànangga nu tau?” wànanja.
28Dahema nyuda, “Jiaya i Yuhani Ma-parunungu wàda hawiangu, tàka hawiangui jiaya i Elia wàdanggau, hili ninyai hawiangu haàtu wunangu-ya hama tuna da wunangu-ka,” wàdanggau, wàdanya.
29“Tàka nyimi dimi nggamuya wàmingga?” hili wànanja ba na-paàra-nja.
Nahema i Peturu, “Hanganji Ma-pamànangu-kau wàma Umbu,” wànanya.
30Ka ràndi-nahaka paraïna i Yehu, ka àmbu ningudu ngia papanii-da na rukuna Nyuna.
I Miri Yehu napanii-ya na mayila dàngu na metina
(Mat. 16:21-28; Luk. 9:22-27)
31Tunaka nu, pa-kiringu-nanyaka i Yehu papanii-nja da papanau-na, ba lupangu-ma bàdi na-pàdangu mayila dangu na Ana Tau, dàngu ba da-rawaku-ya napa paraï da liku uru da ratu pangora, dàngu da ngguru anggama. Napa pa-pameti-ya, tàka la patailu wàna na lodu pa-pahadangu beliya. 32Na-lohangu hàmuma ba napeka-ya nuna i Yehu la papanau-na. Ka lawihiru ngàndi-nanyaka i Yehu paraïna i Peturu, hi na-paratahu-nya. 33Ka pambelingu-nanyaka i Yehu hi na-pawiliku-nja mata da papanau-na, hi napalu wadaya i Peturu, “Yilangu-kau, ha Ma-pakamangu! Na pangàdangu-mu pangàdangu tau-ma-aya dumu; nda pangàdangu-na i Ala-aya,” wànanya.
34Tunaka nu paau-nanyaka na tau dangu na maninya lai nu dàngu da papanau-na paraïna i Yehu. Hi napanii-nja, “Na tau na ma-mbuhangu pakiku-ngga, na-maromba pàkunya bàdi na nduma wikina, hàla ka naduku-ya na harika-na, ka namangu pakiku-ngga. 35Nadu na tau na ma-mbuhangu pa-pamàndu-nya na lurina, na-yàmihu-maya napa na lurina. Tàka na tau na ma-pamàja-nya na lurina lumunggu Nyungga dàngu lumuna na Lii Mànangu welingu lai Ala pamara-mananya duna napa na lurina. 36Nggàraka utuna na haàtu tau, jàka namangu ndàbanya yia na pinu tana, tàka hi yàmihu bia-nanya na lurina? 37Peku-naka nu pa-panjepa wànya ana ngga - nggàra na lurina?
38Na tau na ma-makia wàngga Nyungga dàngu na ma-makia wànya na lii pa-pekangu-nggu la hangga tau handàni nàhu nu na ma-katadaku dàngu na ma-akatu, na-makia-mbu napa na Ana Tau la papeka-ya na tau nuna, la rehi mai ngàndi-nanya na kawaha Amana ngeru, ba na-karia-nja da papalewa matua-na,” wànanja.
Currently Selected:
MÀRUKU 8: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
