MÀRUKU 4
4
Na lii pangerangu rukuna na ma-hàbarungu wini
(Mat. 13:1-9; Luk. 8:4-8)
1Ka hili pa-pekangu-nanyaka tau i Yehu la hingi Tàma Nggalilia. Dira danguya na tau na ma-kambukuru-ya. Tuna nuduka hi na-mandapu ningu la hau tena la wai, tàka hi na-ndolaku la hingi tàma na tau dangu. 2Dadangu-ma na pa-papeka nanja paraïna i Yehu ba nawànja lii pangerangu. Tuna yia na papeka-nanja.
3“Ipatingingu! Ninya na haàtu mini raïngu na malua pa-hàbarungu wini. 4Nu ba na-hàbarungu, ningu wini ma-kanabu la ngarangia. Ka mai-danyaka da ma-hawurungu hi da-nàhiku pambuta-ya. 5Ningumbu ma-kanabu la ma-pawatungu la ma-manipa tanana. Ka rengga tumbu-danyaka nuda da wini ba nda natimbi-du na tanana. 6Tàka ba najangga-ka na lodu, malaï-danyaka da tumbuda tàka ba nda da-tanjiku hàmu da amuda ka meti ma-rokutu-danyaka. 7Ningumbu wini ma-kanabu la wuku rii madàka. Ka tumbu-danyaka da rii madàka hi da-kapidihu-ha da tumbu wini hi lupa nda dawua. 8Tàka ningumbu wini ma-kanabu la tana mboka. Ka tumbu-nanyaka na wini, hi na-bokulu hi nawua, ningu ma-patailu kambulungu, ningu ma-panomu kambulungu, dàngu ma-pahangahungu,” wànanja.
9Ba nahàla-ka papeka-ya na lii pangerangu nuna, napanii i Yehu, “Ningu madu kahilu-mi màtawa kai rongu,” wànanja.
Nggikina hi nawàngu lii pangerangu i Miri Yehu
(Mat. 13:10-17; Luk. 8:9-10)
10Ba didi-kiyaka i Yehu, mai-danyaka da tau da mambàda pamàndu-nya na pa-papeka wànanja, karia-da da ha-kambulu madua da papanau-na. Da karaiya ka na-kaloka-ya na ihina na lii pangerangu. 11Ka panii-nanjaka nyuda paraïna i Yehu, “Nyimi dimi pawua juangu-kaika la papinya na pa-winingu jàka nggiki hamana ba na-pareta i Ala. Tàka da tau la hambeli, wàngu lii pangerangu bia ba papeka-nja, 12màtawa,
‘Napa da-nutakungu pa-patarakungu matada,
tàka nda daera-a la papinya jàka nggàraya na manjadi,
napa da-nutakungu pa-talelingu kahilu-da,
tàka nda daera-a pa-jàngapu-ya la kanandingu-da,
nu hi tuna nu ka àmbu daita dàngu ka àmbu da-jàngapu-ya la kanandingu-da
dàngu ka àmbu da-hurungu lai Ala
hi najàma-nja da njalada paraïna i Ala,’ ” wànanja.
I Miri Yehu na-kaloka-ya na lii pangerangu rukuna na ma-hàbarungu wini
(Mat. 13:18-23; Luk. 8:11-15)
13Tunaka nu hi napanii-nja paraïna i Yehu, “Jàka ndai jàngapu-ya na lii pangerangu kawai nggiki hama pi-minjaka da pangerangu hawiangu? 14Na ma-hàbarungu wini jiaya na tau na ma-pakada-nya na lii langu welingu lai Ala. 15Na wini na ma-kanabu la ngarangia, beri jia-duhaka da tau da marongu-ya na lii langu jàka nggiki hamana ba na-pareta i Ala. Ba darongu-kiyaka, mai-nanyaka i Kambàliku hi napiti-ya na pambàda hàbaru daa la etida. 16Na wini na ma-kanabu la ma-pawatungu beri jia-duhaka da tau da marongu-ya na lii langu, hi ailulu kataku mbaha eti-madanya. 17Na nyuna nda na-paamu-a na lii langu daa la etida, hi nda ana torungu-na. Ba da-pàdangu-kika mayila jàka ndia jàka na-pajàra-ha tau lumuna na lii langu, ailulu kandulingu-ma-adanya. 18Na wini na ma-kanabu la wuku rii madàka beri jia-duhaka da tau da marongu-ya na lii langu, 19tàka na nyuna da kaduku-nya na ngera lurida dàngu da-mbuhangu paluri borakungu. Na-itirungu-da hangia - hangia natama-nja da etida. Rukuna nuna pa-kapidihu-yaka na lii langu welingu lai Ala daa la etida, hi nda nawua. 20Tàka na wini na ma-kanabu la tana kamboka, beri jia-duhaka da tau da marongu-ya na lii langu hi da-kataku-ya, dawua padangu, ningu ma-patailu kambulungu, ningu ma-panomu kambulungu, dàngu ningu ma-pahangahu wundangu ihina.”
Na palita pa-panggurungu mbàlu
(Luk. 8:16-18)
21Ka hili panii-nanyaka i Yehu, “Màla ninguka nu tau ma-paketingu palita hi na-pangguru-nya mbàlu jàka ndia hi na-bànjalu-ya la lumbu nggala? Ka nda natuu-aya na palita la tandai palita? 22Nda ningua ma-kawiningu na majia nda wuwa; dàngu nda ningua pa-kàpingu na majia nda luaya pa-habukaru. 23Ba tuna, jàka ningu kahilu-mi, màtawa kai rongu,” wànanja.
24Hi nahili panii i Yehu, “Tuu eti-maya jàka nggàraya ni na parongu-mi. Na hukutu na pa-hukutu wàminya na angumi jia-maya napa na pawàna i Ala ba na-hukutu kai nyimi – jiapa narihi dangu kipa. 25Nadu na tau na mambàda ningungu, napa pahili wua padangu-mayaipa; tàka na manda ningungu, tuda na mani-inyapa lai nyuna napa pahili piti-mbuyaipa,” wànanja.
Na lii pangerangu rukuna na wini na matumbu
26Nahili panua-nya na kareuku-na i Yehu, “Ba na-pareta i Ala ba Hanganji-ya beri hamana na tau ma-hàbarungu wini la wokana. 27Na-katuda la rudungu; na-pawàla la lodu. Nu ba tuna tumbu pangalangu-madanya duda da wini hi lupa dajangga. Na nyuna jàka nggiki hama tumbuda nuda da wini hi lupa dajangga nda napi-anya paraïna nuna na tau. 28Na tanama duna na ma-paluhu wikiya na ihina: na pa-mangilu-ya na kaleki-na, hi na-pandàki-nya na wilina, hi lupa natunya wuana. 29Tàka jàka naihi-ka na uhu nggàndumu, kaü-duna-nyaka, maa ba rehi muti-mayaka,” wànanja.
Na lii pangerangu karohu hawi
(Mat. 13:31-32, 34; Luk. 13:18-19)
30“Nggàra-aka pa-pangera wàndanya ba na-pareta i Ala?” hili wàna ba na-paàrangu i Yehu. “Nggàra ngerangu-ka ihu pawànda ba ta-pakaloka-nya? 31Jàka na-pareta i Ala hama tuna na lii pangerangu yiana: Na hau karohu hawi#hawi; hawi ba wàna lai yia jiaya na hangia ngara rii pangangu matoma ràkangu tailu metiru janggana. napiti-ya tau hi natuya la tana. Marihi màrahu halawàla-maya na karohu hawi welingu la mbuu ndàba winika la pinu tana. 32Na nyuna jàka na bànda tumbuka, marihi halawàla-maya welingu la maninja la woka. Paraï pambewa dàngu marumbingu-da da kahanga-na, lupa damai pawulu hibuda da ma-hawurungu la laina da ma-pawukungu,” wànanja.
33Tuna nudu ba na-papekangu tau i Yehu ba dadangu da lii pangerangu tungu nu pawàna, tuda ràka pa-jàngapu-da la kanandingu-da. 34Lii pangerangu mànuma pawàna jàka na pa-pekangu tau i Yehu. Tàka jàka didi meha-ahaka dàngu da papanau-na pa-kaloka hàla-duna-njaka.
I Miri Yehu ba na-pakahàna-ya na ngilu mbangatu
(Mat. 8:23-27; Luk. 8:22-25)
35La malingu lodu nuna, napanii-nja da makiku-nya paraïna i Yehu, “Màla-ndawa ka tapala la hapapa tàma,” wànanja.
36Ka hei-nanyaka i Yehu la tena, tàka da papanau-na puli-danyapa na tau dangu la hingi tàma, hàlaka hi damangu pahei la tena nunambu. Nimbunja da tena hawiangu lai nu. Tunaka nu ka pa-lirungu-danyaka Nyuna i Yehu dàngu da papanau-na. 37Ndedi nggi mandai tungu-nanyaka na ngilu mbangatu. Nàhaku-nanyaka ngalingu na tena hi natama-nya wai lupa natika pambinu-ka-amangu. 38Tàka i Yehu duna mahuru pàku-ananya la kamuri tena ba na-nulangu nulangu. Ka bengi-danyaka paraï da papanau-na. Dapanii, “Umbu Ngguru, ka ni hi ndau kawelangu bia? Tambulu-ndanyaka ni,” wàdanya.
39Ka hadangu-madua-nanyaka i Yehu, hi na-kayàmbaku-nya na ngilu, tàka hi napanii dànya na tàma, “Kandii kahàna-wa,” wànanya. Ka wadaru-madua-nanyaka na ngilu, dàngu dira kahàna-ya na tàma. 40Hi napanii dànja da papanau-na, “Nggikina dimi hi imangàdatu? Nggikina hi ndai waika Nyungga?” wànanja.
41Ka mangàdatu wàngu-danyaka hi dapanii dàngga anguda, “Nggamu-mayaka ihi yia na tau yiana, hi lupa na-karadaku-nya ngalingu dàngu ngilu,” wàda.
Currently Selected:
MÀRUKU 4: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
