MÀRUKU 5
5
I Miri Yehu na-pahàmu-ya na tau pa-huruku wàndi akatu
(Mat. 8:28-34; Luk. 8:26-39)
1Tunaka nu tàka-nanyaka la hapapa tàma la tana Nggaraha i Yehu dàngu da papanau-na. 2Ba napuru-kiyaka welingu la tena i Yehu, mai toma-nanyaka paraïna haàtu mini na maluhu-ya welingu la li - liangu reti. 3Na tau nuna na-huruku-ya wàndi akatu dàngu la re - reti-maya duna na-ngiangu ningu. Nda peku-anapa la pahondu-ya; jiapa nda nggili bàhi kadu pahondu wànya. 4Pakàli tu-mayaka làti la tangga da wihi da limana, tàka nara - ràmbitu-maha da nggili bàhi la limana dàngu napo - poraku-maha da bàhi la wihina. Kanjupu kapàru-ya hi nda ana haàtu-ma madàdu-nya. 5Lodu rudungu ba na-njadangu la reti dàngu la tu - tunduna, ba la - ladana dàngu ba na-pamanua wikina wàngu watu.
6Ba naita marau-yaka ba nàmunya i Yehu, talanjiru-nanyaka hi na-marubuku la hanggana i Yehu. 7Ka wara pa-kodungu-nanyaka, “Ha Yehu, Anana i Ala Hupu Majangga! Uwàngu panggiki-munggaka nyungga yia? Parongu-na i Ala, ku-kamahi-nggau, àmbu pa-mayila duka,” wànanya. (8Hi kiri panii tuna nu, ba mbàda panii-dunaka i Yehu, “Ha wàndi akatu luhukau welingu la tau yiana!” ba wàna-dunyaka.)
9Hi na-paàra-nya paraïna i Yehu, “Nggamuya na tamumu?” wànanya.
Nahema na tau, “Lenggiungu-ya na tamunggu, maa ba dira dangudu-kama,” wàna. 10Na-tiangu pamanda - tiangu pamanda-manya i Yehu ka àmbu na-paluhu-ha da wàndi akatu welingu la tana lai nu.
11Ninja da wei ba dira danguha da ma-manguringu la karaha tunduna la lihina lai nu. 12Tàka da wàndi akatu hi da-kamahi-nya i Yehu, “Paràha àru-nggama la wei ka matama ningu,” wàdanya. 13Na-patunju-ya nuna i Yehu. Ka luhu-danyaka da wàndi akatu welingu la tau nuna hi datama ninguha la wei. Ka talanjiru ndàba-danyaka mangu bàbangu da wei hi da-linjungu welingu la ngambangu hu daa la tàma hi dameti mumuhu – ba ràkangu 2.000 ngiuda nggubuluda.
14Ka palai-danyaka da madai wei, hi da-pakada-nya nuna la paraingu dàngu la ndeha winggiru-na. Ka luhu-nanyaka na tau palua pa-tàngaru-ya nu na matumbu. 15Mai-danyaka lai Yehu, hi daita-ya na tau na pa-huruku wàndi làti, ba mandapu-na padua lai nu. Ninguka pakina, dàngu nahàmu-mbuka na kanandingu-na. Ka mangàdatu wàngu-danyaka mbuu ndàbada. 16Da tau da maita mataya nu na matumbu dapanii-ya jàka nggikina nuna na tau dàngu nuda da wei. 17Ka kamahi-danyaka i Yehu paraï da mangu tanangu ka na-yilangu-ya welingu la tana nuna.
18Ba nahei la tena i Yehu, karai-nanyaka paraïna tau pa-huruku wàndi nu kawai la pakiku-nya i Yehu.
19Tàka nda na-pahia-anya paraïna i Yehu, “Beliwa kau paniinja da kalembi-mu jàka nggàraya na pawunda-nanggau i Miri dàngu ba dira hàmu-nanggau eti!” wànanya.
20Ka laku-nanyaka nuna na tau, hi napanii-ya la ngabana la Paraingu Hakambulu, jàka nggàraya na pambàda wundana i Yehu lai nyuna. Na-hangàtaru ndàba na tau ba darongu-yaka.
Na anana i Yairu – Na kawini na ma-jonggaru-ya na kalembi malaina i Miri Yehu
(Mat. 9:18-26; Luk. 8:40-56)
21Nahili pala beli la hapapa tàma i Yehu. Nu la hingi tàma, nadangu na tau mamai pa-langgungguru winggiru-nya i Yehu. 22Mai-nanyaka na haàtu na ma-tamungu Yairu. Nyuna haàtu liku uru uma bungguru-ya la paraingu lai nu. Ba naita-yaka i Yehu marubuku-nanyaka la hanggana, 23hi nakarai pambana-ya, “Umbu, na ananggu kawini hidu mbotu-mananya nàmu. Jiaya jàka wàmu mai àru làti kau ràmaya ka na-màlaru dàngu ka àmbu nameti!” wàna.
24Nu ka lua karia-nanyaka i Yairu. Nadangu na tau matundu-nya i Yehu hi lupa da-dohaku mbeli mbapaya.
25La honga tau dangu ninya na haàtu kawini na mambàda ha-kambulu dàmbu ndaunaka pahidu mbungu ria ma - mànu, nuana natàka-nanya ariyaa-na. 26Dambuta ndàbaka da pawulu-na pa-mbayaru wànja da ndotiru, tàka nda ningu mamàka pa-pamàlaru-ya, tàka hama huka mbotu biana na hiduna. 27Dangu-maka pambàda ronguna nuna na kawini na rukuna i Yehu. Pali kajiangu-nanyaka palihi-nya i Yehu nu la njonga tau dangu, 28nadu, “Mili ku-jonggaru-ya na kalembi malai-ana, napa ku-màlaru-ma duku,” ba wànadu la etina.
29Ka jonggaru-nanyaka na kalembi malaina i Yehu, ndedi mbàdiku-na la rehi numa ba najiaka pambungu na riana. Hi na-pàdangu wikina ba mbàda màlaru-naka. 30Ka pàdangu madua-nanyaka wikina i Yehu ba ningu mbihana ma-haleli welingu lai Nyuna. Hi na-wilaku la tau dangu hi na-paàrangu, “Nggamu ma-jonggaru-ya na kalembi malainggu,” wàna.
31Dapanii da papanau-na, “Ai ha Umbu, hi ita wikima-dumunya ni ba dira danguya na tau na ma-dohaku-kau. Kanii, Nggamu ma-jonggaru-ya na kalembi malainggu, hi hili wàmui bau paàrangu?” wàdanya.
32Tàka i Yehu pangalangu bia-nanya pa-pawilikungu matana pahimbu-ya na tau mambàda jonggaru-ya. 33Nuna na kawini ba pi-mana-nyaka na papàda-na la ihina, nda - ndànda-naka paraï pa-mangàdatu, hi na-hurungu pa-marubuku la hanggana i Yehu hi napanii hàlaya nuna kawai. 34Tàka hi napanii-nya na kawini i Yehu, “Ai, na ananggu rukuna bau waika Nyungga màlaru-munyaka nàhu welingu la hidumu! Beli mànjaku-wa dumu. Hayandalu hàmu-munyaka,” wànanya.
35Nu ba talànga paniina i Yehu tàka-danyaka da tau papalewa welingu la uamana i Yairu. “Nameti-ka na anamu umbu,” wàdanya i Yairu. “Àmbu hili pa-handuka-duyapa i Umbu Ngguru,” wàdanya.
36Tàka i Yehu duna nda na-kawela-anya#nda na-kawela-anya: jàka ndia: nda na-patingi-anya. na papanii-da nuda da tau, hi napanii-nya i Yairu, “Àmbu mangàdatu du, pawaiwa nyuna,” wànanya. 37Laku pangalangu-nanyaka i Yehu, na nyuna nda haàtu-a pa-pahia-na la patundu-nya, hinggilu-da i Peturu, dàngu i Yakombu, i Yuhani na anguna paluhu. 38Ba datàka-ka la umana i Yairu, ita-nanyaka na ma-kanyaüru, malai ba narongu mahii dàngu ma-padudurungu. 39Hàla tama-nanyaka la uma i Yehu hi napanii-nja. “Ka nggikina hi ikanyaüru dàngu hii hii? Nda meti-ananya na anakeda; katuda-ananya duna!” wànanja.
40Nu ka riki-danyaka i Yehu paraï da tau dangu lai nu. Ka paràha-nanjaka paluhu ndàba la hambeli. Tàka da ina amana na anakeda dàngu da tau matailu da makiku-nya, natama karia-nja la kuru pangia-na na anakeda. 41Hi nayàpa-ya na limana na anakeda paraïna i Yehu, “Talitakum,” wànanya, jia-duyaka, “Ràmbu, hadangu-wa, wànggunggau,” ba wànda.
42Ka hada memangu madua-nanyaka nu na anakeda kawini hi napangga. (Hakambulu dàmbu-naka na ndaungu lurina). Dira hangàtaru-ha mbuu ndàbada da maita-ya nuna. 43Na nyuna hiri nda uku-nanja paraïna i Yehu, ka àmbu ningudu haàtu ngia papanii-da na rukuna nuna. Hàlaka nu, “Wuanya pangangu na anakeda,” hi hili wànanja.
Currently Selected:
MÀRUKU 5: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
