MÀRUKU 3
3
Na tau na mameti hapapa limana
(Mat. 12:9-14; Luk. 6:6-11)
1Nahili beli i Yehu la uma bungguru. Lai nu ninya na haàtu na mameti hapapa limana. 2Ninja lai nu da tau da ma-pandapu-nya na njalana i Yehu, ka kàlaya ba wàda. Tuna nuduka hi dabuti mànunya padua, jàka jia pamàlaru biana tau la lodu Hangahu. 3I Yehu napanii dànya na tau na mameti hapapa limana, “Mai kau ndolaku yiahu la ngaba,” wànanya. 4Hi na-paàra-nja da tau da maninja lai nu, “Nggikina wàna na anggama-nda? Nggàraka pawunda-nda la lodu Hangahu? Tawunda mahàmu jàka ndia manjala? La pa-pamara tau jàka ndia la pa-pameti tau?” wànanja.
Pàdi wàda bia. 5Ba dàngu mbenina i Yehu na-pawiliku-nya mata na tau ma-winggiru-nya, pa-kariangu hawina-mbuna, rukuna ba lalu katiku watuha. Hi napanii dànya nuna na tau, “Pajola-ya na limamu,” wànanya. Ka pajola-nanyaka, hi na-màlaru na limana. 6Ka yilangu-danyaka da tau Parihi welingu la uma bungguru nuna, hi daluu pahama dànja da tau da maangu-nya i Harondi, ka pameti-ya i Yehu ba wàda.
Na tau dangu la hingi tàma
7Ka pa-yilangu-nanyaka i Yehu dàngu da makiku-nya hi dalaku la tàma Nggalilia. Dira danguya na tau welingu la Nggalilia malua pakiku-nya i Yehu. Nadangu-mbu na tau na mamai welingu la Yundia, 8welingu la Yeruhali, welingu la tana Indumia, dàngu welingu la tana la pahunga loduna na Luku Yorundangu, dàngu welingu la winggiru-da da paraingu la Tiruhu dàngu Hindungu. Damai ndàbama lai Yehu, maa ba darongu-duhaka da pawunda-na. 9Dira danguya na tau, hi lupa napanii i Yehu la tau makiku-nya ka da-payema-nya padua tena, hi jia dàhiku biana-ngga tau ba wàna. 10Kanjupu danguya na tau pa-pamàlaru-na, hi na-pa-ngguharungu ndàba na tau mahidu la palihi-nya Nyuna ka peku ràma-ndanya ba wàda. 11Tàka jàka handàka ita - handàka ita-danya Nyuna paraï da tau pa-huruku wàndi akatu, ailulu marubuku-madanya la hanggana ba dàngu kaladaku-da, “Jiakau Nyumu-maka na Anana i Ala,” wàdanya.
12Na nyuna dira hiri-nanja da wàndi akatu paraïna i Yehu, ka àmbu jia paniida jàka nggamuya Nyuna.
I Miri Yehu napindi-ha da tau ha-kambulu madua da makiku-nya
(Mat. 10:1-4; Luk. 6:12-16)
13Tunaka nu hei-nanyaka i Yehu la hau tunduna, hi napaau-nja da tau da paora-na eti. Hi damai nuda da tau, 14ka pindi-nanyaka tau ha-kambulu madua welingu lai nyuda. Hi napanii-nja, “Kupindi-kai nyimi, ka hanii mànunggai la lihinggu wànggu, ka ku-palewa-kai pa-pakada-nya na Lii Mànangu welingu lai Ala, 15tàka napa ingalangu kawaha la pawàngga wàndi akatu,” wànanja.
16Yiada-ha da tamuda nuda da tau ha-kambulu madua: i Himungu (I Peturu ba wàna-mbunya), 17i Yakombu dàngu i Yuhani na anguna paluhu, nu da anana i Hambandiu (nyuda yiada na-patamu-nja Mbuanenggiru jia-duyaka “da ana kanduruku,” wàna-duka nu), 18i Andaria, i Pilipu, i Mbàratolumiu, i Matiu, i Tomahu, i Yakombu anana i Àlapiu, i Tandiu, i Himungu i Kahiri Tana, 19dàngu i Yundahu Ihikariu na ma-kaleka-nya i Yehu.
I Miri Yehu dàngu i Mbeluhembulu
(Mat. 12:22-32; Luk. 11:14-23, 12:10)
20Tunaka nu beli-nanyaka la uma i Yehu. Tàka hili mai beli-mananyai pa-pauhi na tau dangu, hi lundu nda ana peku ndokuda pangangu i Yehu dàngu da papanau-na. 21Ningu tau mapanii, “Katoba-nanyaka” wàdanya. Ba darongu-yaka nuna paraï da kalembi-na, lua-danyaka ka pitiya ba wàda.
22Dapanii da ngguru anggama da mamai welingu la Yeruhali, “Huruku-nanya paraïna i Mbeluhembulu duna! Jiaya na ngorada da wàndi akatu nuna-maka na mawua-nya kawaha la pawàngga wàndi akatu,” wàda.
23Ka paau-nanyaka na tau dangu paraïna i Yehu, hi napeka-nja lii pangerangu ba nda pirada. “Nggiki hama peku-naka dimi na wàndi akatu la pawàngga wàndi akatu,” wànanja. 24Na hau nanggara jàka na-pabàriku dua wikina, hi da pakawa - wàringu ba da-maràngga pa-muhungu, nda jia peku pa-dàdungu-ana nuna na nanggara. 25Dàngu jàka nda ningu ka-haungu-na na ihi uma daa la hau kuru uma, tàka hi maràngga pa-muhungu bia-danya, na-taweharu-ma duna napa na kuru uma nuna. 26Jàka ninya na-pakawàringu dàngu na pa-muhungu la pa-hanganji-na i Kambàliku, nda jia mandai-ana na pa-hanganji-na, jiangu-ma ba na-molungu.
27Nda jia ningua haàtu tau mapeku patama-nya na umana na haàtu tau ma-kapàru la paramba-nja da banda da malanja-na, jàka nda nahondu mangilu pàkuya nu na tau kapàru. Hàlaka nu hina-duka hi peku ramba-nanja da banda da malanja-na.
28Kai pinya! Jàka nawunda manjala na haàtu tau dàngu ka natiki-ya na pa-pawawa wànanya na tau hawiangu,#natiki-ya na pa-pawawa wànanya na tau hawiangu, jàka ndia: natiki pa-pawawa wànanya i Miri Ala. peku ngalangu-na jàmangu njala. 29Na nyuna jàka na pawawa-ya na Ngahuna i Ala, nda na-ngalangu-a jàmangu njala. Nadu na njala nuna ba njala ma-palupangu-ya wàna. ( 30Hi kiri panii tuna nu i Yehu rukuna ba ningu tau mapanii huruku-nanya wàndi akatu i Yehu ba wàda-dunya.)
Na inana dàngu da anguna paluhu i Miri Yehu
(Mat. 12:46-50; Luk. 8:19-21)
31Tunaka nu mai-nanyaka na inana i Yehu dàngu da anguna paluhu. Da-patiangu la hambeli hi da-paràhangu tau papaau-nya i Yehu. 32La rehi nu nadangu na tau ma-mandapu winggiru-nya i Yehu. Dapanii-nya, “Ninya la hambeli na inamu dàngu da angumu paluhu, dàngu da ana winimu Umbu. Himbu-danggau,” wàdanya.
33Nahema i Yehu, “Nggamuya dimi na inanggu? Nggamuha dimi da angunggu paluhu?” wàna. 34Tunaka nu pa-wiliku-nanjaka mata da tau ma-mandapu winggiru-nya hi napanii, “Hi yiada-ha duku da inanggu dàngu da angunggu paluhu! 35Na tau na mawunda-ya na pambuha-na i Ala, jiaya duku na angunggu paluhu, na ana wininggu, dàngu na inanggu,” wànanja.
Currently Selected:
MÀRUKU 3: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
