MÀRUKU 15
15
I Miri Yehu la hanggana i Pilatu
(Mat. 27:1-2, 11-14; Luk. 23:1-5; Yuhn. 18:28-38)
1La mba - mbaru hada rudungu, ri - ringa-daka ba da-pahamangu nggubulu-na na Timbangu Anggama papohu-nja da ratu pangora, da liku uru Yahundi dàngu da ngguru anggama. Dahondu-ya i Yehu, hi dalaku ngàndiya, hi da-pakata-nya lai Pilatu. 2Na-paàra-nya i Yehu paraïna i Pilatu, “Deningu-na dumu ba Hanganji tau Yahundi-kau?” wànanya.
Nanapa-ya i Yehu, “Hama tuna ba wàmu, jia-makaka,” wànanya.
3Dadangu-ma da pa-panjala wàdanya i Yehu na pa-patàka-da da ratu pangora. 4Hi nahili paàrangu i Pilatu lai Yehu, “Ndau bihua pahema? Tàngaru dira dangu-maha da pa-panjala wàdanggau!” wànanya.
5Tàka nda ana hili hema-manapa i Yehu, hi kiri hangàtaru-na i Pilatu.
Ba ratanya hukungu meti i Miri Yehu
(Mat. 27:15-26; Luk. 23:13-25; Yuhn. 18:39–19:16)
6Kàli wàngu-mana la nimbihu Mbabu Paha ba na-pahàla haàtu tau pa-tahangu i Pilatu, pa-namatu-nya na papindi tau dangu. 7Nu la uma kapàtangu ninya na haàtu na ma-tamungu Mbaramba la hongada da ma-patula ngganggangu, da mambàda pameti tau ba jiaya na pariu raüngu. 8Ka pauhi-nanyaka na tau dangu hi dakarai-ya i Pilatu, ka na-pahàla haàtu tau pa-tahangu hama tuna na pakàli wàngu. 9Na-paàra-nja paraïna i Pilatu, “Màla, imbuhangu-nu ka ku-pahàla-nggainya na Hanganji tau Yahundi?” wànanja. 10Maa ba pi-mananya paraïna i Pilatu ba ruku malara-danya eti i Yehu hi da-pakata-nya lai nyuna paraï da ratu pangora.
11Tàka da ratu pangora da rundaya na tau dangu la pakarai-ya i Pilatu, ka jiaya i Mbaramba na pa-pahàla-nanja. 12Ka hili panii-nanyaka na tau dangu i Pilatu, “Jàka tuna nu, nggiki-nggunyaka bàdi na Hanganji tau Yahundi ba wàminya?” wànanja.
13Ka wara-danyaka, “Harika-nya,” wàda.
14Nanapa-ya i Pilatu, “Ka nggàra-mayaka na akatu-na?” wàna na paàra-nanja.
Tàka parukangu-madanya pawara parihi pa-kodungu, “Harika-nya!” wàda.
15Kukiku-nyaka bàdi na pambuha-da, ka nahàmu wàngu na etida ba wànaka la eti i Pilatu, ka pahàla-nanyaka i Mbaramba. Tunaka nu paràhangu-nanyaka tau la pa-ràmbahu-ya i Yehu, hi namangu papuli-nya ka harika-nya.
Na pajulu wàdanya i Miri Yehu paraï da panjuri
(Mat. 27:27-31; Yuhn. 19:2-3)
16Tàka da panjuri hi dalaku ngàndiya i Yehu la talora uma timbangu la uma nggumbunuru. Hi paau ndàbanya pa-pauhi na pamba panjuri. 17Hi dapahau-nya kalembi malai mbaü atu, i Yehu, dauna-nya tubuku rii madàka, hi da-patàngapu-nya la katiku-na i Yehu. 18Hàlaka nu hi datembi-ya, “Oha-amuka dumu ou Hanganji tau Yahundi,” wàdanya. 19Dapalu wànya tokungu na katiku-na i Yehu hi da-pangànji-ya, hi damangu pa-patika la hanggana pa-marubuku-nya. 20Ba dahàla-ka pa-pajulu wànya kalàba-danyaka na kalembi malai mbaü atu hi dapahau belinya da paki-mana duna. Tunaka nu hi dangàndi-ya la hambeli ka harika-nya.
Ba harika-nya i Miri Yehu
(Mat. 27:32-44; Luk. 23:26-43; Yuhn. 19:17-27)
21Nàhu la ngarangia dahàni-ya na haàtu la paduku-ya na ai harika-na i Yehu. Nuna na tau talànga belina welingu la ndeha, laku-nanya la paraingu (Na tamuna Himungu-ya – tau Kireni-ya – Amana i Alihandaru dàngu i Rupuhu.) 22Dangàndi-ya i Yehu la hau pangia ma-tamungu Nggolunggota jia-duyaka la “Kaba Kotu” ba wàna, jàka haleli-ya. 23Lai nu dawua-nya wai angguru pa-pakorungu muru, tàka nda nabihu-a i Yehu paunu-nya. 24Tunaka nu harika-danyaka, hi dapabe - berinja da pakina ba dawàngu patunya undi ka pinya na ndumada haàtu - haàtu. 25Njàmu hiwaya la mbaru ba da-harika-nya. 26La ai harika-na mbara dita patuya na pa-tulihu nu na pa-panjala wànya, “Na Hanganji tau Yahundi,” wàna. 27Anguna i Yehu da-harika-mbunja da madua da tau rambangu; haàtu la kawana-na, haàtu la kalaina. [28Ba tuna nu hàrangu duna-nyaka na pa-tulihu la Huratu Matua, “Padiha pa-pohungu la tau akatu-ya,” ba wàna.]
29Da tau da mali lai nu dapi - pimbilungu katiku-da#dapi - pimbilungu katiku-da: wàngu-mada ba tuda nu da tau Yahundi jàka da paakangu tau. hi da-paaka-nya i Yehu, “Ha dumu, ma-mbuhangu pa-nyungguru Uma Ala, ka ku-pahada belinya la tailu mbua lodu ba wàmu ànga. 30Kamangu nu papuru weli la ai harikangu kau pamara wikimu!” wàdanya.
31Jia-mayai duda da ratu pangora dàngu da ngguru anggama ba dayiki-ya i Yehu. Dapanii dàngga anguda, “Na tau hawiangu na-pamara biaya, tàka nda namàka-ai pa-pamara wikina. 32Jàka Hanganji tau Ihirailu-duya, Jàka Hanganji Ma-pamànangu-duya, màtawa nàhu ka napuru pàku welingu la ai harikangu, ka maita-ya ka peku waimanya!” wàda.
Da tau, angu harikangu-na da-paaka-mbunya i Yehu.
Na metina i Miri Yehu
(Mat. 27:45-56; Luk. 23:44-49; Yuhn. 19:28-30)
33La tidu lodu, tailu mbua njàmu mandaina ba na-kapàtangu ndàba na tana lai nu. 34Tàka la njàmu tailu la maringu lodu, nawara pa-kodungu i Yehu,
“Eloi, Eloi lama sabakhtani?” wàna, jia-duyaka, “Dou Alanggu, Dou Alanggu nggikina hiu dunjaku-ngga?” wàna jàka haleli-ya.
35Hawiangu da maninja lai nu darongu-ya nu na warana hi dapanii, “Patingi-nya, paau-nanya i Elia” wàda. 36Ka manyamalu-nanyaka na haàtu la hongada hi nahàbu lumutu la wai angguru mayilu. Hàlaka nu hi natuya la hupu ai, hi na-pajola-nya la ngaruna i Yehu, ba dàngu paniina, “Màta ka ta-patia wànya jàka namaidu i Elia pa-papuru-nya welingu la ai harikangu,” wàna.
37Ka wara-nanyaka i Yehu, nu mbota wàngu madua-nanyaka.
38Na tera padira daa la Umana i Miri na-kahira padua weli ditangu lundu hu wawa-maya. 39Na ngora tanatara na ma-ndolaku la tuba ai harikangu, naita-ya jàka nggiki hama metina#nggiki hama metina: da lawiti ndai da manda pirada: nggiki hamana nu ba nawara dàngu ba nameti. i Yehu. Hi napanii, “Ai, deningu-mana ba Ana Alaya na tau yiana,” wàna.
40Nimbunja lai nu da kawini da maita marauya mbuu ndàbana nuna na matumbu. La hongada nyuda nu jiaha i Halomi, i Maria Mandalena, i Maria inada i Yakombu kudu dàngu i Yohi. 41Jiaha nyuda-maka da makiku-nya dàngu da mainga-ya i Yehu ba la Nggalilia-yapa. Dàngu dadangu-mapa da kawini hawiangu lai nu da mamai karia-nya i Yehu la Yeruhali.
Ba taninya i Miri Yehu
(Mat. 27:57-61; Luk. 23:50-56; Yuhn. 19:38-42)
42-43Rudungu-ama-nanyaka ba natàka i Yuhupu na tau welingu la Arimatia. Anggota Timbangu Anggama paràka patembi-maya nyuna. Nedi-mananyai duna na rehi pareta-na i Ala ba Hanganji-ya. Na lodu nu lodu Hawanjiru-ya (nu na lodu pandutu-na na lodu Hangahu). Jia-duyaka hi natoru mbenima palua la hanggana i Pilatu pakarai-ya na metina i Yehu. 44Nawàngu pa-hangàtaru biaka i Pilatu ba narongu-ya ba mbàda meti-naka i Yehu. Ba tuna paràhangu-nanyaka tau palua papaau-nya na ngora pamba tanatara ka paàra-nya jàka mbàda mandai-naka pameti i Yehu. 45Ba narongu-yaka la ngaruna nu na ngora tanatara paraïna i Pilatu, pamàja-nanyaka na metina i Yehu ka napiti-ya paraïna i Yuhupu. 46Ka kei-nanyaka yubuhu tera linangu malunyaru i Yuhupu, tàka ba na-papuru-nyaka na metina i Yehu kayubuhu wàna-nyaka nu na tera. Hàlaka hi na-bànjalu-ya la reti pa-toraku la tandula watu. Tunaka nu hi nakilu-nya watu bokulu ndàbina na ngaru reti. 47Nu nu, hamata-madanya paraï da i Maria Mandalena dàngu i Maria inana i Yohi, jàka nggiya na ngia pa-bànjalu-danya na metina i Yehu.
Currently Selected:
MÀRUKU 15: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
