MÀRUKU 14
14
Na wulu akanya i Miri Yehu
(Mat. 26:1-5; Luk. 22:1-2; Yuhn. 11:45-53)
1Dàmbu lodu kinaka na rapa remi Lodu Paha dàngu na Mbabu Roti Nda Patai Wolungu. Tàka da ratu pangora dàngu da ngguru anggama himbu pàku-danya wihuna la payàpa kangunduhu-nya i Yehu, dàngu ka pameti-ya ba wàda. 2“Na nyuna àmbu la lodu remidu na yàpa-ndanya, ka àmbu natumbu na kanyaüru,” wàda.
Ba burinya mina mbi kati i Miri Yehu
(Mat. 26:6-13; Yuhn. 12:1-8)
3Ba la Mbetani-ya i Yehu, la umana i Himungu na mahidu manula pa-mayitangu àmangu, namai na haàtu kawini lai Nyuna. Nu na kawini nangàndi hau boti pualamu mina mbii kati mambotu wilina, papandoi welingu la amu mbii kati. Ba talànga mandapu-na pangangu i Yehu, bera-nanyaka na boti paraïna nu na kawini, hi naburi-ya na mina mbii kati la katiku-na i Yehu. 4Tàka ninjai duda hawiangu lai nu da mapulu hoputu hi dapanii dàngga anguda, “Nggara lingu-naka ba padima-nya ni na mbii kati? 5Jàka dangganya làti narihi welingu la tailu ngahu àmahu bara#àmahu bara: Tàngaru-ya la 6:37. wilina, tàka da àmahu wilina ka wuanja da tau mamila,” wàda. Ka mbeni-danyaka nu na kawini.
6Nanapa-ya i Yehu, “Màta bianya! Ka nggikina hii paratahu-nya? Ba tunangga mahàmu duku na papanii wànya. 7Jàka jiaha da tau mamila ni mànu-manja duda lai nyimi. Jàkai mbuhangu pandula-ha, peku mànu biami duna la pandula-ha. Tàka Nyungga yia nda ni mànu-angga lai nyimi. 8Yiana na kawini tuda ràka pamàka-mana duna na pawunda-na. Tuu haha-nangga mbii kati ndumana ba taningga la ndedi rehina. 9Langatàka ka kupeka-nggai, la nggi - nggini la pa-nggubulu awangu, la ngia pa-bobaru-ya na Lii Mànangu welingu lai Ala, jiangu-ma paniiya na pawunda-na na kawini yiana, hi pangàda wànya,” wànanja.
Na-patunju i Yundahu pa-kaleka-nya i Miri Yehu
(Mat. 26:14-16; Luk. 22:3-6)
10Tàka i Yundahu Ihikariu, na haàtu la hongada da ha-kambulu madua papanau-na i Yehu, lua toma-nahaka da ratu pangora, ka ku-kaleka-nya i Yehu lai nyuda ba wàna. 11Dira hàmuha da etida da ratu pangora ba darongu-yaka nuna hi daràndi-ya la pawua-nya àmahu i Yundahu. Ka himbu-nanyaka rehi ma-manggawangu i Yundahu na rapa kaleka-nanya i Yehu.
Ba nangangu pangangu Paha i Miri Yehu dàngu da papanau-na
(Mat. 26:17-25; Luk. 22:7-14, 21-23; Yuhn. 13:21-30)
12La lodu kawunga-na na Mbabu Roti Nda Patai Wolungu – na rapa rupuya na mbimbi Paha – paàrangu-danyaka lai Yehu da papanau-na, “La nggini wàmu Umbu na ngia pa-paloku-manggaunya na pangangu Paha?” wàdanya.
13Ka paràha-nanjaka paraïna i Yehu da tau madua la hongada nyuda, “Iluawa la paraingu, napa na-hàmburu-kai lai nu na haàtu mini na mangàndi kadihi maningu waingu, kai tundunya 14la uma ngia patama-na kai paàra-nya na mangu umangu, ‘Nggii-yaka na kurungu ngia pangangu-ma pangangu Paha dàngu da papanau-nggu, wànanggau i Umbu Ngguru’, wàminya. 15Napa na-paita-nggainya na hau kuru dita ma-bokulu. Nuna na kurungu pambàda àhalu-mayaka, dàngu nggànapu ihi manaka. Paloku ndàba-yawa lai nu ndumanda nyuta,” wànanja.
16Ka laku-danyaka la paraingu nu da tau madua papanau-na i Yehu. Ba datàka-ka la paraingu jia ndàba-maya hama tuna na papanii-na i Yehu na patoma-da, hi da-paloku-ya lai nu na pangangu Paha.
17Ba na-rudungu-ka, mai-nanyaka i Yehu dàngu da ha-kambulu madua papanau-na. 18Ba da-mandapu-ka pangangu, panii-nanyaka i Yehu, “Màla ipatingingu: napa na-kaleka-ngga na haàtu la hongami nyimi, na angu ngangunggu nàhu,” wànanja.
19Ba darongu-yaka nu, dira hawina-ha da papanau-na i Yehu. Hi da-nimbihu wikida pa-paàra-nya i Yehu, “Nda nyunggaki nu hiana palaamu Umbu?” maràngga wàdanya.
20Nanapa-ya i Yehu, “Jiaya na haàtu la hongami nyimi ma-hakambulu madua-mi, na angu ngangunggu la hau kawinga. 21Jiangu ba nameti-ma duna na Ana Tau hama tuna na pa-tulihu la Huratu Matua. Naa-aka nyuna, hanggàmaru nda najaru-na na tau ma-kaleka-nya na Ana Tau! Nahàmu-mapa duna jàka nda pa-paana-nya làti na tau nuna!” wànanja.
Na pamangu-na i Miri
(Mat. 26:26-30; Luk. 22:14-20; 1 Kor. 11:23-25)
22Nu ba talànga nganguda, piti-nanyaka na roti i Yehu hi na-pamalangu-nya i Ala. Hàlaka nu, hi nakawi - wita wànya limana hi nawua-nja da papanau-na ba dàngu paniina, “Keiya kai ngaanya, yiana jiaya na ihinggu,” wànanja.
23Ba hàlaka nu, piti-nanyaka hau kaba wai angguru. Na-hamaya pamalangu-nya i Ala, hi napakei-nya nu na kaba wai la papanau-na. Hi daunu-nya nu na wai angguru nyuda mbuu ndàbada. 24Ba tunaka nu, panii-nanyaka i Yehu, “Yiana jiaya na wai rianggu na ma-pamàndu-nya na panjanji-na i Ala, na wai ria na pabungu ndumana i madangu. 25Langatàka ka kupeka-nggai: Nda kuhili unu-anyapa yiana na wai angguru, lundu toma la rehi unungu-nggu angguru bidi dàngu nyimi, la Tana Bidina na Amanggu,” wànanja.
26Tunaka nu ludungu-danyaka hau ludu wotungu. Hàla, hi dalaku la Tandula Haitungu.
Ba nyuraya na pahiningu-na i Peturu
(Mat. 26:31-35; Luk. 22:31-34; Yuhn. 13:36-38)
27Tunaka nu panii-nanjaka paraïna i Yehu, “Napa nyimi ipalai wàrungga mbuu ndàbami. Maa ba nimanya la Huratu Matua, ‘Napa i Ala na-pameti-ya na mini pawangu, hi napai - ihangu na kabàba mbimbina,’ ba wàna. 28Na nyuna ba pahada beli-nggaka, kulaku mangilu-nggai napa la Nggalilia,” wànanja.
29Nanapa-ya i Peturu, “Nyungga duku ndia-a, jiapa ka da-dunjaku ndàbanggau kadu Umbu, nyungga duku nda hidama,” wànanya.
30Tàka i Yehu, “Nàhu kau pinya wànggunggau ba ndedi na-panduangu pa-hakuku na manu, pandilungu-munyaka pa-pahini-ngga,” wànanya.
31Hema handàkangu-ma-ananya i Peturu, “Jiapa ka lupa kumeti karia-nggau-kai nda hidama duku Umbu, la papanii ba nda kutanda-kau!” wànanya.
Jia-mayai duda na paniida da pa-panaungu hawiangu.
Ba na-hamayangu i Miri Yehu la woka Nggehimani
(Mat. 26:36-46; Luk. 22:39-46)
32Nu ka tàka-danyaka la hau pangia ma-tamungu Nggehimani, hi napanii i Yehu la papanau-na, “Imandapu-kawa yiahu, ba lua-nggunyapa pa-hamayangu,” wànanja.
33Tàka hi nawànda-ha i Peturu, i Yakombu dàngu i Yuhani palua-karia-nya Nyuna. Ka hawina-nanyaka ba dira nda nguduya na etina. 34Hi napanii-nja, “Dira hawina-ya na etinggu,” wàna, “kutika pameti-ka-amangu. Indàdiku-kawa lai yiahu kai pawàla!” wànanja. 35Ba nalaku-kika hakudu marubuku-nanyaka la tana i Yehu hi na-hamayangu. Nu la hamayangu-na nakarai-ya jàka pekuna làti ka àmbu naera-nya nu na rehi mayila. 36“Ama! Dou Ama!” wàna. “Nda nggàra-a manda peku dumu lai Nyumu. Ba tuna payila-ngganya làti yiana na mayila. Na nyuna àmbu namatu niduya na pa-mbuhanggu Nyungga, mbulungu na pambuha-mu Nyumua dumu Ama,” wàna.
37Hàlaka nu beli-nanyaka i Yehu, hi natàka-nja ba katuda-da padua-ka da papanau-na. Hi napanii dànya i Peturu, “Katuda bia munya Himungu? Ndau màkama nu papawàla ana hau njàmu?” wànanya. 38Hàla hi napanii-nja paraïna i Yehu. “Pawàla-ma dàngu kai hamayangu ka àmbu naera-nggai ma-pakamangu. Na-mbuhangu-maka duna pawunda ma-deningu na ngahumi, tàka ndai dàdungu-a ba nda namàka-a na huri tolu,” wànanja.
39Hili laku-nanyaka i Yehu pa-hamayangu ba hili jia-mayai na hamayangu-na kawai. 40Hàlaka nu, nahili belinja da papanau-na. Hi natàka-nja ba katuda-mada-nyapa, maa ba tàtiku hawàla-madanya. Hi nda dapinya jàka nggikina wàda bàdi nahema-danya i Yehu.
41Ba nabeli-nja i Yehu la pandilungu wàna napanii dànja, “Katuda-mami-nyapa dàngu hangahu-mami-nyapa? Jiaka-ka duna! Toma-nanyaka na rehina la pa-pakata-nya na Ana Tau la limada da tau njala. 42Hadangu-wa, màla-ndawa ka talaku. Tàngaru! nàmu-nyaka na ma-kaleka-ngga!” wànanja.
Ba yàpaya i Miri Yehu
(Mat. 26:47-56; Luk. 22:47-53; Yuhn. 18:3-12)
43Nu ba talànga paniina i Yehu, tàka-nanyaka i Yundahu na haàtu la honga ha-kambulu madua papanau-na. Dadangu-ma da karia-na da mangàndi hapanda dàngu kadipu ai. Papalewa-da da ratu pangora, da ngguru anggama dàngu da liku uru Yahundi-ha. 44Mbàda pambulu-nanjaka tanda paraïna ma-kaleka, “Na pa-puduku-nggu taï, jia-mayaka kai yàpa niya, dàngu kai mangga pahàmu-manya bai karia-nya,” mbàda wàna-njaka.
45Ba natàka-ka i Yundahu, pangalangu-mananya lai Yehu, “Ai, Umbu Ngguru!” wàna, hàla hi na-puduku-ya i Yehu. 46Ka yàpa-danyaka i Yehu paraï da karia-na i Yundahu hi dahondu-ya. 47Tàka na haàtu na maninya lai nu na-binjiru hapanda-na hi na-làndahu-nya na atana na ratu bokulu, nahàpu-maya na kahilu-na. 48Hi napanii i Yehu, “Ka tau kajàliku-makaka Nyungga yia, hii wàngu pangàndi-ma-aka hapanda dàngu kadipu ai la payàpa-ka? 49Nimbihu lodu ba ku-papekangu la Umana i Miri, la hanggami, tàka ndai yàpa-aka. Na nyuna ràka-manaka ba tuna nu, ka na-hàrangu na pa-tulihu la Huratu Matua,” wànanja.
50Mbuu ndàbada da papanau-na dapalai wàrunya i Yehu.
51Ninya na haàtu bidi mini, na matundu-nya i Yehu. Hawàla-ma-ana na tera pa-maringgi juana pa-pandàdangu wàna wikina. Ka yàpaya ba wàna-nyaka tau, 52nggepi pahàla-ma-ananya nu na tera pa-maringgi-na, hi napalai kalulu.
Ba la hangga Timbangu Anggama-ya i Miri Yehu
(Mat. 26:57-68; Luk. 22:54-55, 63-71; Yuhn. 18:13-14, 19-24)
53Nu laku ngàndi-danyaka i Yehu la umana na ratu bokulu. Pauhi ndàba-danya lai nu da ratu pangora, da liku uru Yahundi, dàngu da ngguru anggama. 54I Peturu duna natundu maraunya i Yehu lundu natama-ma la talora umana na ratu bokulu. Lai nu na-mandapu padiru epi anguda da tau madai. 55Da ratu pangora dàngu mbutana na ma-mandapu la Timbangu Anggama, himbu-madanya wihuna la pa-ngalangu mbuti pa-panjala wànya i Yehu ka peku ratanya hukungu meti. Tàka nda ana haumbu mbuti pangala-da. 56Dangu hakahii papaau-da la pa-wuangu taranga kambàliku hangganya i Yehu, tàka da maràngga pahili da taranga-da.
57Ka hadangu-danyaka ba nda pirada da hakahii da ma-wuangu taranga kambàliku rukuna i Yehu, 58“Marongu-ya na paniina na tau yiana, ‘Napa ku-nyungguru-ya yiana na Uma Ala na ruku lima tau, tàka palàngangu tailu mbua lodu, kuhili pahadangu haui, na nda ruku lima tau,’ wàna,” wàda. 59Tàka na taranga-da nuda da tau da maràngga pahili dua wikida.
60Ka hadangu-nanyaka na ratu bokulu la hanggada mbuu ndàbada hi na-paàranya i Yehu, “Ndau hema-aha na pakàla wàdanggau?” wànanya.
61Tàka pàdi wàna bia i Yehu nda ana hema-mana. Hi nahili paàrangui na ratu bokulu, “Jiakau-dumu na Hanganji Ma-pamànangu, Anana i Ala Mahupu Matua?” wànanya.
62Nanapa-ya i Yehu, “Jia-maduka,” wàna. “Napa nyimi mbuu ndàbami mi-itaya na Ana Tau ba na-mandapu la kawana#mandapu la kawana: Tàngaru-ya la 12:36. -na i Ala Hupu Mambiha dàngu ba namai la karumangu welingu la awangu,” wànanja.
63Ka bàriku madua-nahaka da pakina#Ka bàriku madua-nahaka da pakina: wàngu-mada ba tuda nu da tau Yahundi jàka dambeni. na ratu bokulu hi napanii, “Nda nggàra taihi wàngu-apa hakahii! 64Mbàda rongu wiki-mami-nyaka na papeka-na ba nalapi-ya i Ala. Màla nggikina wàmika nàhu bai rataya?” wànanja.
Mbuu ndàbada nyuda, darata-ya ba nanjala i Yehu, dàngu ba ràka-mana ka ratanya hukungu meti.
65Ba tuna hawiangu da tau lai nu da-pangànji-ya i Yehu, da pandàbi-nya na matana hi da-nàhaku-ya, “Màla kamangu-nu kau katutu-ya jàka nggamu ma-nàhaku-kau?” wàdanya. Màlamai duda da tau madai ba datàba-ya i Yehu.
Na-pahini-nanya i Miri Yehu i Peturu
(Mat. 26:69-75; Luk. 22:56-62; Yuhn. 18:15-18, 25-27)
66Ba la talora-yapa i Peturu, lua-nanyaka lai nu na haàtu tau kawini ma-paloku la uma ratu bokulu. 67Ba naita-yaka diruna epi i Peturu, kinju kanàndaru-nanyaka na matana i Peturu hi napanii, “Hi anguna i Yehu tau Naharitu-mbudukau nyumu, wàngguka?” wànanya.
68Ka pahiningu-nanyaka i Peturu, “Nda kupi-anya dàngu nda ku-jàngapu-aya na pawuku-mu,” wànanya. Ka luhu-nanyaka i Peturu la pindu talora-na na ratu bokulu. [La rehi nu hakuku-nanyaka na manu.]
69Ka hili ita-mananyai i Peturu paraïna nu na kawini ma-paloku, hi napanii-nja da tau lai nu, “Yiana anguda nyuda-maya dimi!” wànanja. 70Nu, ka hili pahiningu-mananyai Peturu.
Ndedi nggi tuna mandaina, dahili panii da tau lai nu, “Langatàka angu-madanggau nyumu, ba tau Nggalilia-madukau,” hili wàdanya i Peturu.
71Nu ka-harangu-madua-nanyaka i Peturu, “Nda kutanda-aya duku nu na tau papanii-mi,” wàna.
72La rehi nuna hakuku-nanyaka na manu la panduangu wàna. Nu ka namu-nanyaka paraïna i Peturu na pambàda paniina i Yehu. “Ndedi na-panduangu pa-hakuku na manu, pandilungu-munyaka pa-pahini-ngga,” ba mbàda wànanya. Ka ngi - ngiba-madua-naka pahii i Peturu.
Currently Selected:
MÀRUKU 14: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
