MÀRUKU 16
16
Na hadangu-na i Miri Yehu
(Mat. 28:1-8; Luk. 24:1-12; Yuhn. 20:1-10)
1Ba na-làpahu-ka na lodu Hangahu, lua-danyaka pakei mbii kati i Maria Mandalena, i Maria inana i Yakombu, dàngu i Halomi, ka lua patunya na metina i Yehu ba wàda. 2La mba - mbaru la hunga lodu, la kawunga lodu la minggu nuna lua-danyaka la reti. 3-4Dapanii dàngga anguda nàhu la ngarangia, “Nggamu-aka ihu ma-pandulangu pakilu-ndanya na watu la ngaru reti?” wàda. Maa ba bokulu nda najaru-mana na watu. Na nyuna ba datàka-ka la reti daita-ya ba mbàda nggilungu-naka na watu. 5Ba tuna, tama-danyaka la reti. Daa la reti la patuu kawana, daita-ya na bidi mini na mapaki mabara ba mandapu-na padua, ka katàtaku-danyaka.
6Napanii nu na bidi mini, “Àmbi mangàdatu-du. Pi-manggunggai ba himbu-minya i Yehu tau Naharitu na pambàda harikangu. Nda nianya yiahu. Mbàda hadangu-naka duna! Tàngaru-ya ni, na ngia pa-bànjalu-danya. 7Lakuwa nàhu, kai pekanja da papanau-na, hamangu i Peturu-mbu na rukuna yiana. Paniinja, ‘Nalaku mangilu-nggai la Nggalilia. Napa lai nu kai itaya hama tuna ba wànanggai,’ ” wànanja.
8Ka luhu-danyaka welingu la reti hi dapalai paraï pa-katàtaku dàngu mangàdatu-da. Nda ana nggàrama papanii-da la anguda na rukuna nuna paraï pa-mangàdatu.
NA HUPU NJÀPU RUKU LIMANA I MÀRUKU PA-NAMATU-NYA NA LAWITI NDAI
Na pa-wuwangu-na wiki i Miri Yehu lai Maria Mandalena
(Mat. 28:9-10; Yuhn. 20:11-18)
[9Ba na-hadangu-ka i Yehu welingu la meti, la mba - mbaru lodu Minggu na-pawuwa mangilungu wikina lai Maria Mandalena. (I Maria jiaya na pambàda paluhu-na wàndi i Yehu ba pihuda.) 10Tàka i Maria Mandalena hi nalua papanii-nja da anguna i Yehu na rukuna nuna nu, da maninja la ringu langu dàngu da mahii. 11Tàka ba darongu-yaka lurina i Yehu, dàngu ba mbàda ita-nanyaka paraïna i Maria nda dawai-aya.
Ba na-pawuwangu wikina i Miri Yehu la tau madua papanau-na
(Luk. 24:13-35)
12Hàlaka nu na-pawuwangu wikina i Yehu ba hau hadaya la tau madua papanau-na, ba talànga nàhunja la ngarangia ba dalaku la hau kotaku. 13Ba tuna beli-danyaka papanii-nja da anguda hawiangu tàka nda dawai-aha.
Ba na-pawuwangu wikina i Miri Yehu la papanau-na
(Mat. 28:16-20; Luk. 24:36-49; Yuhn. 20:19-23; Pphr. 1:6-8)
14La malamiri-na na-pawuwangu wikina i Yehu la papanau-na da ma-hakambulu haàtu-da ba talànga nganguda. Nahàngga-nja rukuna ba nda natoma na pawaida dàngu ba lalu katiku watuha hi nda dawaiha da tau da maita mataya na lurina i Yehu. 15Hi napanii-nja paraïna i Yehu, “Ilakuwa la pa-nggubulu awangu kai pakada-nya na Lii Mànangu welingu lai Ala la mbuu ndàbana na banjaru tauka. 16Na manda pawai napa pa-hukungu-ya. Tàka na mapawai dàngu na-paparunungu, napa namara. 17Na tanda pawaida da tau nuda, jiaya ba dawàngga wànya wàndi akatu na tamunggu; napa dapanii wàngu hi - hilu panda tandada. 18Jàka da-katangu ularu jàka ndia, jàka da-unungu pameti wàngu, nda jia manjurangu-ada. Jàka da-padambakungu limada la tau mahidu, da-màlaru-ma.”
Ba padita-ya la awangu i Miri Yehu
(Luk. 24:50-53; Pphr. 1:9-11)
19Ba nahàla-ka i Yehu papanii dànja nyuda da papanau-na, pa-padita-yaka la awangu. Lai nu na-katangu pareta dàngu i Ala. 20Ka laku-danyaka da papanau-na pa-pakada-nya la nggi - nggini na lii langu welingu lai Ala. Tàka naràma-daa-mbunja i Miri dàngu nawua-nja tanda nu da pa-hangàtarungu pa-màndungu wàna ba ma-deningu-ya na pa-bobaru-da.]
NA HUPU NJÀPUNA NA LAWITI NDAI HAWIANGU#La lawiti ndai dàngu da pa-haleli ndai da manda pirada da-bonjangu-mbu yiada da madua ndalaru-da.
[9Lua-danyaka nu da-kawini lai Peturu dàngu da anguna, hi dapanii piti kawongu-ya mbuu ndàbana na papanii-nanja paraïna nu na bidi mini. 10Ba tunaka nu i Yehu wikima ba nangaru-nja da papanau-na, na bobaru-ya la pahunga la patama na lii langu matua ma-palupangu rukuna na mànangu ma-palupangu.]
Currently Selected:
MÀRUKU 16: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
