MÀRUKU 13
13
Napanii i Miri Yehu rukuna na tanyungguru-na na Umana i Miri
(Mat. 24:1-2; Luk. 21:5-6)
1Ba naluhu i Yehu welingu la Umana i Miri, ka panii-nanyaka na haàtu papanau-na, “Ai, Umbu Ngguru, tàngaru-ha nida da uma, hamangui da watuna kanjupu manandangu-ha!” wànanya.
2Nanapa-ya i Yehu, “Uita-duha ni da uma da ma-bokulu, wàngguka? Nda ana haua watuda napa da uma nida da ma-padaingu pa-panunggulungu la pangia-da. Pa-nyungguru ndàba-maha,” wànanya.
Na handuka dàngu na jàra
(Mat. 24:3-14; Luk. 21:7-19)
3Tunaka nu lua-nanyaka la Tandula Haitungu i Yehu, hi na-mandapu#hi na-mandapu: La rehi nu da-mandapu da tau Yahundi jàka da-wuangu lii pa-pekangu. la tubana na Umana i Miri. Ka mai meha-danyaka i Peturu, i Yakombu, i Yuhani dàngu i Andaria papanii dànya i Yehu ba hapajia-aha. 4“Màla panii nggamanya làti Umbu, jàka pirangu nu na rapa njadina mbuu ndàbana? Dàngu jàka nggàraha da tandana, mareni-nanyaka na rehina ka wànda wàngu?” wàda.
5“Rimangu-ma!” wàna i Yehu, “Ka àmbu jia ningu bia ma-panyonga-kai, wàna. 6Nadangu napa na tau na mamai wànya na tamunggu na mapanii, ‘Jiaka Nyuna-maka yia!’ na mawàna; tàka hi nadangu na tau pa-panyonga-na. 7Jàkai rongu lii pa-kabungu dàngu na katururu-na na ma-pakabungu, àmbi mangàdatu-du. Maa ba lupangu datumbu-ma bàdi nuda, tàka ndedi jia-aya na rehi hupu njàpuna. 8Napa na hau banjaru nabera-ya na hau banjaru. Na hau nanggara na-kaluluku-nya na hau nanggara. Natungu na upungu dàngu na rimbangu la nggi - nggini. Nuda mbuu ndàbada pakiri-ana-nyapa, hama tuna na katiu na paera-na na haàtu kawini ma-habola.
9Ipananjarungu-ma bàdi ba payàpa-kai napa, hi ruruhu-kai la hangga ma-timbangu. Napa papalu-kai la uma bunggu - uma bungguru. Napa dangàndi-kai la hanggada da ma-pareta dàngu da hanganji, mulana ba papanau-nggunggai. Nuna nu rehi manggawangu-mayaka ndumami nyimi la pa-hakahii-ngga Nyungga lai nyuda. 10Lupangu pakada-manyapa bàdi na Lii Mànangu welingu lai Ala, la mbuu ndàbana na banjaru-ka. 11Tàka jàka dayàpa-kai hi dangàndi-kai la ma-patandangu ngera àmbu da-kadukungu da etimi, nggikina wànda-aka bàdi taï àmbi jia wàmika. Jàka jiaya-yaka na rehi kareuku, panii biaya duna na pa-paniingu-kai nu la rehina. Nadu na kareuku patiki-mi nda kareuku wiki-aminya, tàka ma-welingu la Ngahuna i Ala-maya. 12Ningu napa ma-kalekangu anguna paluhu ka pameti-ya ba wàna. Tuna numbu napa na manjadi la haàtu ama dàngu anana. Napa da anada da-ndubaku-ha da inada da amada, hi da-pakata-nja ka pameti-ha ba wàda. 13Napa mbuu ndàbana na tau na-karaünggai eti mulana ba papanau-nggunggai. Tàka na ma-torungu lundu hupu njàpuna, jiaya duna na pa-pamara,” wànanja.
Na akatu na ma-patàlaru
(Mat. 24:15-28; Luk. 21:20-24)
14“Napai itaya ‘na Akatu Ma-patàlaru’ ba na-ndolaku la pangia manda hida lai nyuna. (Na madiha-ya yiana, màtawa ka naeti wànya jàka nggàraya na ihina.) La rehi nu na tau na maninya la Yundia napalai-ma bàdi la ma-palindingu. 15Na tau na maninya la bangga àmbu natama-dupa papiti ana ngga - nggàra la uma. 16Na tau na maninya la woka àmbu nabeli-dupa papiti pakina. 17Kanjupu pa-haringgingu hamangu-ha da lodu nuda la kawini mbotu ihi dàngu la kawini ma-pahuhu ana rara! 18Hamayangu-ma ka àmbu da-hanggànangu la wula urangu nuda. 19Nu la lo - lodu ma-pa-haringgingu hamangu, natungu na mayila mandedi ningu hamangu, piti weli mulangu ba na-padikangu tana i Ala lundu nàhu, dàngu nda hili ningu-mbupa ngeru matungu nu. 20Jàka nda na-padànggitu-ya nu na rehi i Ala, nda jia ningua haàtu mamara. Tàka lumuna na banjaru-na, na-padànggitu-maya duna na rehi i Ala.
21Jàka ningu tau mapanii-nggai la rehi nu, ‘Tàngaru, yiahu-ya ni na Hanganji Ma-pamànangu’ jàka ndia, ‘Tàngaru, lai nuya ni’ jàka wànanggai – àmbi waiduya na tau nuna. 22Nadu ba nàmunja napa da kabuka ma-pamànangu dàngu da kabuka wunangu. Napa da-patumbu manda ningu hamangu dàngu pa-hangàtarungu pa-panyonga wàngu tau, jàka pekuna ka panyonga-mbuya na banjaru-na i Ala. 23Ba tuna rimangu-ma! Mbàda panii haha-nggunggai-njaka nuda mbuu ndàbada ba ndedi danjadi,” wànanja.
Na tàkana na Ana Tau
(Mat. 24:29-31; Luk. 21:25-28)
24“Jàka na-làpahu-ka na mayila, kapàtangu-nanyaka na mata lodu, dàngu nda nahambila-apa na wulangu. 25Damunju da kandunu welingu la awangu, dàngu na pa-haürungu hàla na pa-kapingatu wàna na kuru awangu-ka. 26Hi itaya la rehi nu na Ana Tau ba namai nàmu la karumangu, wàngu kodi màka dàngu mangunju-na. 27Napa na-paràha-nja da papalewa-na ka da-pauhi-nya na tau papindi-na, welingu la pahunga la patama, weli dia weli lurungu, welingu la hupu tana lundu la kiri awangu,” wànanja.
Na ngerangu welingu la pingi kapilitu
(Mat. 24:32-35; Luk. 21:29-33)
28“Pitiwa ngerangu la pingi kapilitu. Jàka damuru dàngu da-kanguraku da laina dàngu ba da-kahulaku da kalunga-na, pi-madua-minyaka ba mareni wandu-nanyaka. 29Tuna numbudu nyimi, jàkai ita-haka njadida nuda, pi-madua-minyaka ba mareni halawàla-mana-nyaka na rehina.#mareni halawàla-mana-nyaka na rehina: jàka ndia: mareni-nanyaka Nyuna, mareni mai-nanyaka. 30Kai pinya! Napa danjadi ndàba nuda ba ndedi dameti ndàba da tau da maluri la rehi nàhu. 31Na awangu dàngu na tana napa na-molungu, tàka na pulu-ngguka na-padaingu lundu nu - nu,” wànanja.
Nda haàtu-a mapinya na lodu dàngu na njàmuna
(Mat. 24:36-44)
32“Na nyuna ba tuna, nda jia haàtu-a mapinya jàka pirangu nu na loduna jàka ndia pirangu nu na njàmuna. Da papalewa la awangu nda dapi-mbunya, na Anakai, ndiambu, mbulungu i Ama-a duna na mapinya. 33Ba tuna, lupangu imangga rimangu dàngu ibutingu mànu-maka bàdi, nadu ba ndai pianya jàka pirangu nu na rehina. 34Na ngerana hama tuna na tau na ma-dunjakungu umana hi na-pàlaku la tana mamarau. Na-paràha-nja da tau papalewa-na ka da-paloku-ya na umana, dàngu na maràngga wua-manja ngerada. Dai pa-hàmungu-ma, wànanya na madai pindu. 35Jia ba tuna, lupangu-maka bàdi imangga rimangu, ba ndai pianya na rapa belina na mangu umangu – jàka malingu, jàka mandalora, jàka marai romu, jàka ndia la honga lodu. 36Jàka era tàka harabàndangu-na, ka àmbu natoma-nggai katuda-mi. 37Na papanii-nggunggai nàhu nyimi, panii-mbunggunya la mbuu ndàbana na tauka: mangga rimangu-ma ba wànggu!” wànanja.
Currently Selected:
MÀRUKU 13: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
