MIKA 7

Na tambirihu-na na wànggu lurina na Ihirailu

1Ai-inai nyungga! Nyungga hama tuna tau rimbangu malua papàpu wua ai ba na-làpahu-ka na rehina. Nda ningu-apa wuada da pingi ai. Da wua angguru dàngu da wua kapilitu mahàmu mbàda pàpu ndàba-haka. 2Namohu-ka na tau pa-tutungu welingu la tana, nda pa-jàngapu-apa tau ma-tuturu lai Ala. Nimbihu-na na tau na-patiangu ma-nggawangu la pa-pameti. Haàtu - haàtu da-batangu oka kahili la anguda. 3Mbuu ndàbada manyàmungu-mada-nyaka pawunda ma-akatu. Da maningu wai ngabangu dàngu da hakimu dakarai àmahu pawua pa-runungu, tàka na ngora la panggolu na-pahàni ka kikunya na pambuha-na, tuna nuduka ba da pa-akurungu ndàba. 4Da madira hàmu dàngu da madira patutungu-mbu welingu lai nyuda nda da-palingu-a hama tuna rumba rii madàka manda palingu.

Toma-nanyaka na rehina i Ala la pahuku-nya na banjaru-na hama tuna na pa-panamu-nanja la ngaruda da wunangu-na. Nàhu mbàda tumbu-naka na payiti-yaüngu lai nyuda. 5Àmbu waiya na lihi umamu, àmbu handera la angumu. Pananjarungu la kareuku-mu jiapa-kai ka jiaya na papaha wikimu na marongu-ya. 6Nadu, la rehi tungu nàhu da-maràngga pa-muhungu da ma-paangu umangu: na anana mini na-pawawa-ya na amana, na anana kawini na-ndubaku-ya na inana, na rii anana na-patayaku dànya na ina yenuna.

7Na nyuna nyuta duta tamonu-nya i MIRI; wàngu kawàndi-na na etinda tanedi-nya na Alanda. Nyuna natingi-ya na hamayangu-nda dàngu hi na-pahàla-ta.

I MIRI na-pahàla

8Nda ningua latana ka da-hawola da muhunda rukuna na hadànjalu-nda. Nadu jiapa-kai ka tanjoru, napa ta-hadangu beli. Nàhu ninda la kapàtangu tàka napa na-paharii-ta i MIRI. 9Nyuta mbàda njala-ndaka lai MIRI, tuna nuduka nàhu hi lupangu tapàda-nya na hànggana. Na nyuna nda namandai-apa napa na-kahiri-ta dàngu hi nawua-nda mola. Napa naluhu ngàndita la harii; napa tadeni wikinya ba na-pahàla-ta. 10Àmangu na-pawawa-ta muhu ba dapanii, “Nggiya i MIRI na Alamu?” wàda. Tàka nàhu napa daita-ya jàka nggàraya na pawunda-na i MIRI ndumanda nyuta, dàngu hi da-makia. Napa ta-hakahii-nya ba pakàku-ha da muhunda dàngu hi taro - rohaku-ha hama kapihaku la ànda.

11Oi Yeruhali! Toma-nanyaka na rehina na pahada beli-minja da kangeli paraingu-mi. La rehi nu na ngaba tanami pa-palerangu-ya. 12Welingu la nggi - nggini dabeli da taumu lai nyumu – welingu la Ahuru la pahunga lodu, weli lurungu la Mehiru, welingu la ngaba luku Epuràtu, welingu la hapapa tehiku dàngu welingu la pali - lindi ma-marau. 13Tàka na nyuna napa nabulu na pinu tana ruku njalada da mangia-nya.

Na hamayangu karai mila etina i MIRI nduma Ihirailu

14Ou MIRI pawa-nyawa na banjaru-mu, na banjaru paleha-mu. Nyuda da-ndàdiku ndora meha la omangu, la padua tana kamboka. Màtawa ka da-ngalangu pangangu la maràda rumba Mbahàngu dàngu la Nggiliatu hama tuna la handàka-na.

15Wundawa pa-hangàtarungu ndumama nyuma, ou MIRI, hama tuna na pawunda-mu la handàka-na bau luhu ngàndi-kama welingu la Mehiru. 16Napa daita-ya nuna paraï da banjaru dàngu hi da-makia rukuna ba dapàda-nya ba nda ningua linguna mbuu ndàbana na kapingatu-da nyuda. Nyuda nanjàpu-nja kanandingu tàka hi nda peku kareuku-da. 17Napa nyuda dabei hama tuna ularu la tana. Dàngu kandàndaku-da daluhu-ha welingu la ngia pa-torungu-da, hi damai lai Nyumu, ou MIRI Alama.

18Nda ningua Ala hamamu Nyumu, ou MIRI, majàma-nja da njalada da banjaru-mu da pa-manjabii. Ndau mbeni pa-lupangu-a; tàka na panjàngangu-na, umbuhangu pa-paitangu-ya na mbuhangu-mu na manda ningu dirana. 19Napa Nyumu uhili mila-nggama eti nyuma dàngu hiu jàma-nggama. Da njalama utaro - rohaku-ha tàka hiu patàda-nja la lata tehiku! 20La banjaru-mu da wàla wuana i Ambarahàmu dàngu i Yakupu, napa upa-itangu-ya na tuturu-mu dàngu na mbuhangu-mu na manda ningu dirana, hama tuna na panjanji-mu la boku la mangilu-ma la handàka-na.

Currently Selected:

MIKA 7: KAM

Highlight

Compare

Copy