MIKA 5

I Ala nanjanji-ya rukuna na haàtu ma-kawaha welingu la Mbetulehimu

1Napanii i MIRI, “Oi Mbetulehimu Epurata, nyumu paraingu makudu-mbukau la Yahunda! Na nyuna welingu lai nyumu ku-pahada-nya na haàtu ma-kawaha la Ihirailu na ngia paweli-na weli nungu-maka,” wàna.

2Ba tuna, napa i MIRI namàta-nya na banjaru-na, pa-kawaha-ya paraï da muhuna lundu na-habola-nya Nyuna paraïna kawini pa-pandumangu panjadi inana nu na ma-kawaha. Hàlaka nu da angu banjaru-na da maninja la tanawangu pa-pambulu belingu-ha dàngu banjaru-da nyuda. 3Jàka namai-yaka nu na ma-kawaha, napa na-pareta-ya na banjaru-na wàngu àtalu dàngu kawaha welingu lai MIRI, na Ala-mana-duna. Napa naluri mambiru na banjaru-na, nadu mbuu ndàba na tau la pinu tana nggubulu-na napa na-pajia-ya na bokulu-na Nyuna, 4-5tàka Nyuna hi na-wuangu peku.

Rukuna na pahàla dàngu na hukungu

Jàka nanjungu-nya tanatara Ahuru na tananda dàngu hi na-bàriku-ha da ngia pa-torungu-nda, napa ta-pamàtu-ha da liku uru - liku urunda da-maparii halawàla pa-pabera-dànja nyuda. Napa nyuda da-pakàku-ya na Ahuru wàngu kapingatu pambeni wàngu, tàka hi pahàla-ta nyuta welingu la limada nyuda.

6Na tau Ihirailu pa-manjabii, napa hama tuna wai hamburungu ma-mànjaku welingu lai MIRI-ya nduma banjaru dangu, dàngu hama tuna puru wai urangu-ya la ihi woka. Napa nyuda da-handera lai Ala, nda la tau pinu tana-a. 7Da tau Ihirailu da ma-ndàdiku-ipa la njonga hau banja - hau banjaru napa hama tuna hinga la njongada da banda la omangu jàka ndia la njongada da kabàba mbimbi la maràda rumba. Nuna na hinga natama la padua kabàba mbimbi hi nataro - rohaku-ha dàngu hi nahi - hiraha; nda ningua ma-ngalangu pa-pamara-ha nuda da mbimbi. 8Napa na Ihirailu na-pakàku-ha da muhuda hi da-pa-hadànjalu-ha mbuu ndàbada.

9Napanii i MIRI, “Napa la rehi nu ku-pamohu-ha mbuu ndàba da njarami dàngu ku-patàlaru-ha da kareta pabera-mi. 10Napa ku-pakabu-ha da paraingu la tanami, dàngu mbuu ndàba da ngia pa-torungu ku-nyungguru-ha. 11Da boharu-mi napa ku-pamolu-nja dàngu mbuu ndàba da tau manyura-mi napa ku-payila-nja. 12Napa ku-pakabu-ha da kahala hadami dàngu da katoda hàrimi; napa ndai hili lumu-anjapa da banda pa-pandoi lima wikimi. 13Da andungu-na na marapu kawini Ahera la tanami napa ku-punggilu-ha, dàngu da paraimi da maningu tindingu napa ku-pakabu-ha. 14La mbumbaru-na na mbeninggu napa ku-palimba-nya na akatu-na mbuu ndàba na banjaru na manda karadaku lai Nyungga,” wàna.

Currently Selected:

MIKA 5: KAM

Highlight

Compare

Copy