MATIU 28
28
Na hadangu-na i Miri Yehu
(Mrk. 16:1-10; Luk. 24:1-12; Yuhn. 20:1-10)
1Ba na-làpahu-ka na lodu Hangahu, la lodu Minggu la mba - mbaru hada rudungu, i Maria Mandalena dàngu i Maria haàtu dalua pa-tàngaru-ya na reti. 2Hi jia tungu biana na upungu nda najaru. Na haàtu na papalewa-na i Miri napuru welingu la awangu, nakilu-nya na watu ndàbi reti, hi nauhuku la pinuna. 3Na matana nuna na papalewa hama tuna kabilaku-ya, tàka da pakina dabara burahu. 4Da tanatara manggangu da madai lai nu kanjupu mangàdatu-ha hi lupa ta - tàtada, dàngu ba hama tuna mameti bia-haka.
5Nuna na papalewa napanii-nja da kawini, “Àmbi mangàdatu! Nyungga kupinya nyimi ba himbu-minya i Yehu na pa-harikangu. 6Nyuna nda ni-anyapa yiahu. Na-hadangu-ka hama tuna na pambàda paniina àmangu. Mai kai tàngaru-ya na ngia pa-bànjalu-ya, wànanja. 7Nàhu, laku pa-renggangu, kai pekanja da makiku-nya, ‘Na-hadangu-ka Nyuna, tàka laku mangilu-nanggaika la Nggalilia. Lai nu napa kai itaya!’ Namuya na pambàda panii-nanggai nyimi,” wàda.
8Ka pare - renggangu-danyaka da tau kawini ba da-dunjaku-nya na reti. Pa-kariangu mangàdatu dàngu pa-korungu nggaüru etida, palai - lai-danyaka la papeka-nja na rukuna nuna la makiku-nya i Yehu.
9Hi jia ni bianya i Yehu ba natàbuku-ha da tau kawini hi napanii, “Peku hàmuwa,” hi wànanja. Ka mai lihi-danyaka hi darohu-ha da wihina ba da-maràbaku-nya. 10“Àmbi mangàdatu,” hi wànanja paraïna i Yehu, “lakuwa kai pekanja da angu dedinggu ka dalaku la Nggalilia; lai nu napa ka daita-ka,” wànanja.
Na pa-patàka-da da tanatara manggangu
11Ba talànga nàhu-njaka da tau kawini ba dalaku, ba tau mapira-ha welingu la tanatara manggangu da madaiya na reti, beli-danyaka la paraingu, hi da-patàka-nya la ratu - ratu kapala rukuna nuka kawai na matumbu. 12Ka batangu-danyaka da ratu kapala dàngu da ama bokulu Yahundi, hàla hi dawua-nja ba hau da bia-daka da àmahu la tanatara manggangu, 13hi dapanii-nja, “Màta kai panii nyimi, da makiku-nya i Yehu damai la rudungu hi da-manganga-ya na metina i Yehu, ba talànga katuda-ma nyuma, wàmi bia. 14Tàka jàka narongu na nggumbunuru na rukuna nuna, nyuma duma ma-pamanda-nya ka àmbi hunggu ngga - nggàra ma-kalutu nyimi,” wàdanja.
15Ka kei-danjaka nuda da àmahu paraï da tanatara manggangu, tàka hi dawànya hama tuna na pa-paihi-danja nyuda. Jia ba tuna nuduka na rukuna nuna hi nakada pangala-nya la honga tau Yahundi lundu la lodu nàhu.
I Miri Yehu ba na-pawuwangu wikina la tau makiku - makiku-nya
(Mrk. 16:14-18; Luk. 24:36-49; Yuhn. 20:19-23; Pphr. 1:6-8)
16Da ma-hakambulu haàtuda da makiku-nya i Yehu laku-danyaka la palindi la Nggalilia, pa-jàngapu-nya na hupu liina i Yehu lai nyuda. 17Ba daita-yaka i Yehu lai nu, patika-danyaka pa-marubuku-nya Nyuna. Ba tuna ningu biapa la anguda nyuda na mali lua. 18Hi nalua lihinja paraï-na i Yehu, hi napeka-nja, “Mbuu ndàbana na kuaha la awangu dàngu la tana pa-pakata hàlangu-yaka lai Nyungga. 19Jia-duya nu milaku-wa la mbuu ndàbana na banjaru la nggubulu pinu tana, kai tuha nyuda ma-kikungu lai Nyungga. Parunu-nja bai wàngu patiki-ya na tamuna i Ama, i Ana dàngu Ngahuna i Ala. 20Papeka hàlanja nyuda la panunju ndàba-ha da pareta pambàda wua-nggunggai nyimi. Dàngu kanandi-nya, napa Nyungga ku-karia mànunggai lundu hupu njàpu rehi,” wàna.
Currently Selected:
MATIU 28: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
