MATIU 27
27
Ba ngàndiya lai Pilatu i Miri Yehu
(Mrk. 15:1; Luk. 23:1-2; Yuhn. 18:28-32)
1La mba - mbaru mbuu ndàbada da ratu kapala dàngu da ama bokulu Yahundi mbàda bota-mada-nyaka la pa-pameti-ya i Yehu. 2Datunya nggili bàhi, hi dakaria-nya, ba da-pakata-nya lai Pilatu, na nggumbunuru ma-pareta Roma.
Na metina i Yundahu
(Pphr. 1:18-19)
3I Yundahu na ma-kaleka, ba naita-yaka i Yehu ba mbàda rata-danyaka hukungu, peka-nanyaka halaera. Hi na-pabeli-nja da tailu kambulu àmahu bara la ngara ratu Kapala dàngu ama bokulu Yahundi. 4Napanii, “Njala-manggu-nyaka ba kaleka-nya na tau nda ningu njalangu, hi lupa huku pameti-ya!” wànaka.
Tàka dahema nyuda, “Nda ma-wàrihu-ayapa duma. Ehinggau dumu!” wàdanya.
5I Yundahu na-kawuka-nja nuda da àmahu hu daa la Umana i Miri, hàla laku hi na-kandila wikina.
6Da ratu kapala putu-danjaka nuda da àmahu hi dapanii, “Da àmahu yiada àmahu riaha. Tundunya na uku anggama, da àmahu tungu nu nda uku pa-patama-nja la pàti pangia tanda maraku la Umana i Miri,” wàda. 7Hàlaka nu ba da-pahamangu-ka, paki-dahaka nuda da àmahu pakei wàngu tana na Tana Mapipi Wurungu ba wàdanya ka tuya reti tau weli nàmungu. 8Nuna-duyaka na pakiri-na Tana Ria hi wàdanya lundu nàhu nuna na tana.
9Ba tuna nu, pa-tutungu-nanyaka na paniina na Wunangu Yerimia, “Nyuda dakei tailu kambulu àmahu bara, nu na wili na pa-pahama-na na banjaru Ihirailu na bila wilina Nyuna. 10Tàka da àmahu nuda dakei wànya Tana Mapipi Wurungu, hama tuna na pareta na pawua-nangga nyungga i Miri,” wàna.
Ba na-pareha-ya na palakara-na i Miri Yehu i Pilatu
(Mrk. 15:2-5; Luk. 23:3-5; Yuhn. 18:33-38)
11Ba na-hurungu-ka i Yehu lai Pilatu, na nggumbunuru la tana lai nu, paàra-nanyaka, “Màla hanganji tau Yahundi-kau dumu?” wànanya.
“Hama tuna ba wàmu,” hi wàna i Yehu. 12Tàka da ratu kapala dàngu da ama bokulu Yahundi ba da-jakaru-njaka da pakàla wàda-nya i Yehu ba hau danguda, nda nawàngu pahema ndokuha.
13Jia-duyaka i Pilatu hi napeka-nya, “Màla ka ndau rongu-aha nu mbuu ndàbada da pakàla wàdanggau?” wànanya.
14Tàka i Yehu nda nawàngu pahema-ma hakudu, hi lupa na-hangàtaru na nggumbunuru.
Ba ratanya hukungu meti i Miri Yehu
(Mrk. 15:6-15; Luk. 23:13-25; Yuhn. 18:39–19:16)
15La handàka - handàka Pamangu Paha, na nggumbunuru nakàli pahàla haàtu tau pa-tahangu tundunya na papindi-na na tau dangu. 16La rehi nu ninya na haàtu na tau pa-hukungu na mawuwa la pa-akatu. Na tamuna: Yehu Mbaramba-ya. 17Jia-duyaka, ba na-pauhi ndàbaka na tau dangu, i Pilatu hi na-paàra-nja, “Nggamuya wàmi na pambuha-mi ka ku-pahàla-nggainya? I Yehu Mbaramba jàka ndia i Yehu na Karitu ba wàdanya?” wàna. 18Hi napanii tuna nu i Pilatu ba napi-dunya da tau Yahundi da ma-pangaru hi da-pakata-nya i Yehu lai nyuna kiringu ba karaü-danya eti.
19Ba talànga mandapu-naka i Pilatu la kanjàka timbangu-na, pangàndi-nanyaka kareuku paraïna papaha-na, “Àmbu tikadu patama-nya na palakara-na nana na tau, ba tau nda njalaya, nadu ba rukuna Nyuna kamodu ku-manggadipangu ma-pa-mangginggitungu,” wàna. 20Tàka da ratu kapala dàngu da ama bokulu Yahundi, nutakungu-madanya paru-ndaya na tau dangu la pakarai-ya i Pilatu ka na-pahàla-ya i Mbaramba tàka i Yehu ka nahuku pameti-ya, wàda. 21Hàla na nggumbunuru nahili paàra-nja nyuda, “Welingu nuda da tau madua, nggamuya wàmi ka ku-pahàla-nggainya?” wàna.
“I Mbaramba,” hi wàda ba dahema.
22“Jàka tuna nu nggikina wànggu-nyaka i Yehu na Karitu ba wàdanya?” hi wàna i Pilatu ba na-paàra-nja.
Dahema, “Harika-nya!” hi wàda.
23“Ka nggàra-maka duna pa-akatu-na?” hi wàna i Pilatu.
Ka manaü wara pa-kodungu-madua-danyaka, “Harika-nya!” wàda-madua-ka.
24La malamiri pi-nanyaka i Pilatu ba nda hili nggikina wàna-apa, dàngu peku-mbuna napa na tau dangu la pa-patula ngganggangu. Jia hi napiti wai, hi nabaha limana la hangga tau dangu hi napanii, “Nyungga nda kutanggu hema-ayapa na rukuna na metina na tau yiana! Nuna patanggu-mi nyimi-mayaka dimi!” wàna.
25Mbuu ndàbana na tau dangu, handàka pa-rànjangu-madua-naka pahema, “Màla nyuna, nyuma duma dàngu da anama matanggu-nya na hukungu kiri pameti wàna!” wàda.
26Hàla i Pilatu hi na-pahàla-nja i Mbaramba, dàngu hi na-paràhangu pa-paràmbahu-nya i Yehu; hi na-pakata-nja la pa-harika-nya.
Ba da-pajulu wànya panjuri i Miri Yehu
(Mrk. 15:16-20; Yuhn. 19:2-3)
27Tunaka nu da panjuri-na i Pilatu dangàndi-ya i Yehu patama la umana na nggumbunuru, dàngu mbuu ndàbada da pamba panjuri pauhi-madanya ba da-winggiru-nya i Yehu. 28Daàli-nja da pakina i Yehu, hi da-panggàna-nya kalembi bokulu mbaü atu. 29Da-pandoi-nya tubuku karàngga rii madàka, hi da pa-tàmbaku-nya la katiku-na i Yehu. Tunaka nu hi da-pakata-nya tokungu la lima kawana-na, hi da-patika la hanggana ba da-payudi-ya, “Oha-amuka Hanganji Yahundi!” wàdanya. 30Da-pangànji-ya dàngu hi dawàhi-ya na tokungu-na hi dapalu wànya na katiku-na. 31Ba dahàlaka pa-pajulu wànya, da-bunggahu-ya na kalembi bokulu mbaü atuna hàla hi da-panggàna belinja da paki wikina. Tunaka nu hi dangàndi-ya la hambeli la pa-harika-nya.
Ba harikanya i Miri Yehu
(Mrk. 15:21-32; Luk. 23:26-43; Yuhn. 19:17-27)
32La padua ànda tàbuku-danyaka na haàtu na tau welingu la Kireni, na ma-tamungu Himungu. Da-pambana-ya na tau nuna paduku-ya na harika-na i Yehu. 33Tunaka nu tàka-danyaka la hau pa-ngiangu na ma-tamungu, Nggolunggota, Pangia Kaba Kota wàna-duka nu. 34Lai nu wua-danyaka i Yehu pa-unungu angguru pa-pakorungu mapaita. Tàka i Yehu ba na-tupuku-yaka na angguru nuna, nda nabihu-a paunu-nya.
35Tunaka nu ka harika-danyaka, hi dapabe - berinja da pakina ba dawàngu undi. 36Hàlaka nu mandapu-danyaka ba dadaiya Nyuna lai nu. 37Dita la tuba pinu katiku-na datuya na pa-tulihu na pa-panjala wàdanya, “Yiana i Yehu, Hanganji Tau Yahundi,” wàna. 38Nimbunja da pa-harika angunya ba tau madua-ha da makàli rambangu, haàtu la kawana hi haàtu la kalaina.
39Da tauka da malaku li lai nu dapi - pimbilungu katiku-da#dapi - pimbilungu katiku-da: wàngu-mada ba tuda nu da tau Yahundi jàka da-paakangu tau. ba da-paaka-nya i Yehu. 40Dapanii, “Nyumu ku-nyànggaru-ya na Uma Ala, hi ku-pahada belinya la tailu mbua lodu ba wàmu. Màlapa jàka Ana Ala-dukau, puruwa nu welingu la harikangu, kau pamara wikimu,” wàdanya.
41Màlamai duda da ratu kapala, da ngguru anggama dàngu da ama bokulu Yahundi ba da-payudi-ya i Yehu. Ba dapanii, 42“Nyuna na-pamara-ya na tau hawiangu, tàka na wikina Nyuna nda namàka pa-pamara-ya! Nyuna jàka hanganji Ihirailu-duya, napuru-wa nu welingu la ai harikangu, hina nyuna hi mawaiya. 43Nyuna nawaiya i Ala, dàngu Ana Alaka ba wàna. Màlapa nu, ka taita-aya jàka na-pamara-duya paraïna i Ala nàhu?” wàda.
44Da tau rambangu da pa-harika angunya, màla-madui duda ba da-paaka tudanya nu.
Na metina i Miri Yehu
(Mrk. 15:33-41; Luk. 23:44-49; Yuhn. 19:28-30)
45La tidu lodu, tailu mbua njàmuna, ba na-kapàtangu nggubulu-na na tana lai nu. 46La njàmu tailu, wara pa-kodungu-nanyaka i Yehu, “Eli, Eli lama sabakhtani?” wàna. La hilunda nyuta, “Dou Alanggu, dou Alanggu, nggikina Nyumu hiu dunjaku bia-ngga?” wàna.
47Da tau ba mapira-ha lai nu darongu-ya na kamaliku-na hi dapanii, “Paau-nanya i Elia,” wàda. 48Na haàtu na anguda, napiti pa-renggangu lumutu, hi nahàbu-ya na lumutu la wai angguru mayilu. Tunaka nu hi natuya la hupu ai hapungu, hi na-pajola-nya la tàda ngaruna i Yehu.
49Tàka na tau hawiangu dapanii, “Patiangu, napa hi nàmu bianya i Elia la pa-pamara-ya nyuna!” wàda.
50Tunaka nu i Yehu hili wara pakodungu-nanyaka, hi na-pahàla-nya na kayekuna.
51Na tera dimbaku daa la Umana i Miri kahira padua-nanyaka weli ditangu lupa hu wawa. Na tana na-kanggauhaku dàngu da palindi watu da-tawanggahu. 52Da reti da-tabunggahu, dàngu nadangu la angu banjaru-na i Ala da mambàda meti da pa-paluri beli. 53Nyuda daluhu welingu la reti la hambeli hadangu-na i Yehu welingu la meti, hi datama la Yeruhali. Lai nu dangu tau maita-ha nyuda.
54Na kapala pamba hamanai da panjuri anguna padaiya i Yehu mangàdatu nda ukuha ba daita-ya na upungu, dàngu mbuu ndàba-naka na matumbu nu. Ka panii-danyaka, “Langatàka, Nyuna yiana Ana Alaya,” wàda.
55Lai nu dadangu-mbu da kawini da maninja ba dàngu tàngaru marau-danya. Nyuda-maka da makiku-nya i Yehu da mandula-ya piti welingu la Nggalilia. 56La anguda nyuda jia-duhaka i Maria Mandalena, i Maria inana i Yakombu dàngu i Yuhupu, dàngu na inada da anana i Hambandiu.
Na taninya i Miri Yehu
(Mrk. 15:42-47; Luk. 23:50-56; Yuhn. 19:38-42)
57Nu la rudungu mai-nanyaka na haàtu na tau wulu welingu la Arimatia, na ma-tamungu Yuhupu. Nyuna ma-kikungu lai Yehu-mbuya. 58Nyuna nalua lai Pilatu, hi nakarai-ya na metina i Yehu. Tàka i Pilatu hi na-wuangu pareta ka wuanya nyuna na metina i Yehu. 59Ka piti-nanyaka i Yuhupu na mameti, hi na-payubuhu-nya yubuhu tera linangu bidi. 60Hàla hi na-bàjalu-ya na metina i Yehu daa la reti mangu wikina, na pa-pandoi daa la hau tandula watu. Hàlaka nu hi nakilu-nya hau na watu bokulu hi na-pandàbi-nya na ngaru reti, ka laku-nanyaka. 61I Maria Mandalena dàngu i Maria haàtu da-ndàdiku-pa lai nu ba da-mandapu hangga-nya na reti.
Da madai reti
62Hadangu harii, la lodu Hangahu, da ratu kapala dàngu da tau Parihi lua kariangu-danyaka pa-hurungu lai Pilatu, 63hi dapanii, “Umbu, manamu-ya nàhu na ma-palapingu ba naluri-pa napanii, ‘Pa-làngangu tailu mbua lodu napa ku-hadangu beli,’ ba wàna. 64Jia ba tuna, paràhangu àru madai pahàmu-nya nuna na reti lundu lodu patailu wàna, ka àmbu napeku da makiku-nya la pa-manganga-ya na metina, hàla napa panii-danyaka la tau, nahada belingu-ka welingu la meti, napa wàdadu. Na pa-lapingu yiana na ma-malamiri manaü nda hàmu-napa welingu la wungana,” wàda.
65Napaya i Pilatu, “Ka ba ningu-madu tanatara manggangu-mi, luawa nu kai dai pa-jàritu-manya nuna na reti,” wànanja.
66Ka lua-danyaka la reti, hi da-henggilu-ya na watu ndàbina dàngu hi da-bànjalu tau madaiya la hanggana, ka àmbu ningu ma-kumilu-ya ba wàda.
Currently Selected:
MATIU 27: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
