MATIU 26
26
Na kahili-danya i Miri Yehu
(Mrk. 14:1-2; Luk. 22:1-2; Yuhn. 11:45-53)
1Ba nahàla-ka i Yehu pa-ajaru hàlaha nudaka hi napanii-nja da makiku-nya. 2“Mipinya dàmbu lodu-kiaka jiaya na Lodu Remi Paha, na Ana Tau napa pa-pakatangu-ya la pa-harika-nya!” wàna.
3La rehi nuna pauhi-danya da ratu kapala dàngu da ama bokulu Yahundi la umana na Ratu Bokulu Kayapàhu. 4Batangu-danya payàpa kangunduhu-nya i Yehu, ka pameti-ya, wàda. 5“Tàka, àmbu talaku-dunya na ngerana nuna la rehi mbabu, napa napariu-raüngu-du na madangu,” wàda.
I Miri Yehu ba burinya mbii kati la Mbetani
(Mrk. 14:3-9; Yuhn. 12:1-8)
6Ba jiaya na ninya i Yehu la Mbetani, la umana i Himungu na mahidu manula pa-mayitangu amangu, 7tàka-nanyaka na haàtu na kawini lai Yehu. Nangàndi hauna na boti na maningu ihingu mbii kati mambana wilina. Ba talànga mandapu-naka pangangu i Yehu, nuna na kawini naburi-nya mina mbii kati na katiku-na i Yehu. 8Da makiku-nya i Yehu ba daita-ya na matuna nu dambeni. “Nggàra linguna ba padima-nya na mambana wili tuna nu?” wàda. 9“Na mina mbii kati tungu nu ka dangganya nahei wilina, dàngu da àmahu wilina ka wuanja da tau mila,” wàda.
10I Yehu napinya na pa-pangàda-da, jia hi napanii, “Nggikina nyimi hi mi-pahanduka-ya nina na kawini? Nyuna tunanya na mahàmu dàngu na pa-wotungu ndumanggu Nyungga. 11Na mamila ni mànu-manya duna lai nyimi, tàka Nyungga nda ni mànu-angga lai nyimi. 12Ba tuna nu ba naburi-nya mina mbii kati na ihinggu, payema-nangga napa ba taningga. 13Langatàka ka kupeka-nggai! La nggubulu pinu tana, la nggi bia na ngia pa-bobaru niya na Lii Mànangu welingu lai Ala, na rukuna na kawini yiana papanii mànuya ka pangàda wànya nyuna,” wàna.
Na-patunju i Yundahu la pa-kaleka-nya i Miri Yehu
(Mrk. 14:10-11; Luk. 22:3-6)
14Hàla na haàtu welingu la tau hakambulu madua makiku-nya i Yehu, na ma-tamungu Yundahu Ihikariu, lua-nanyaka la ratu - ratu kapala. 15Napanii lai nyuda, “Nggàraka pawua-mingga jàka ku-pakata-nggainya i Yehu lai nyimi?” wàna. Ka diha-danyaka tailu kambulu àmahu bara, hi dawua-nya nyuna. 16Piti welingu la rehi nu himbu-nanyaka pekuna i Yundahu la pa-kaleka-nya i Yehu.
I Yehu ba nanga dànja pangangu Paha da ma-kikungu lai Nyuna
(Mrk. 14:12-21; Luk. 22:7-14, 21-23; Yuhn. 13:21-30)
17La lodu kawunga la Mbabu Roti Nda Patai Wolungu, da ma-kikungu lai Yehu damai lai Nyuna. Da-paàrangu, “Màla umbu nggi paloku niya wàmu na pangangu Paha ndumamu Nyumu?” wàdanya.
18Nahema i Yehu, “Luawa la haàtu tau la paraingu kai paniinya, ‘I Umbu Ngguru, toma-nanyaka na rehinggu wàna; ku-mbuhangu pambabu-nya na Paha dàngu da makiku-ngga la umamu nyumu, wànanggau i Umbu Ngguru,’ wàminya,” wànanja.
19Da ma-kikungu lai Yehu danunju-maya na pa-paràha wànanja paraïna i Yehu lai nyuda. Hi dalua pa-paloku-ya na pangangu Paha.
20Ba na-rudungu-ka, i Yehu dàngu da hakambulu madua makiku-nya mandapu ngangu-danyaka. 21Ba talànga ngangu-daka, panii-nanyaka i Yehu, “Pa-tingingu: Na haàtu welingu la hongami nyimi napa na-kaleka-ngga,” wàna.
22Ba darongu-yaka nuna, da makiku-nya i Yehu hawina halawàla-danyaka. Hàla, maràngga paàra-danyaka i Yehu, “Nyuna, ndiadu wàmungga?” maràngga wàdanya.
23Nahema i Yehu, “Na tau na ma-pahàbu dàngga roti la kaba moku, nyuna na ma-kaleka-ngga napa,” hi wàna. 24“Jiangu-maka duna ba nameti na Ana Tau hama tuna na maninya la Huratu Matua. Tàka ura pàku-ana-nyaka na tau na ma-kaleka-nya na Ana Tau! Làti nahàmu-kiapa na tau nuna ka àmbu nadedi ndoku!” wàna.
25Hàla i Yundahu na ma-kaleka napanii, “Ndiadu nyungga nu palàmu Umbu Ngguru?” wàna.
Nahema i Yehu, “Hama tuna ba wàmu!” hi wànanya.
Na Pamangu Rudungu
(Mrk. 14:22-26; Luk. 22:14-20; 1 Kor. 11:23-25)
26Ba jia-yaka na nganguda, i Yehu napiti-ya na roti, hàla hi na-hamayangu ba na-pamalangungu. Tunaka nu hi nakawita - witaya na roti wàngu limana hi nawua-nja da ma-kikungu, hi napanii-nja, “Pitiwa, nganguwa, yiana jiaya na taunggu,” wàna.
27Hàlaka nu hi napiti hau kaba wai angguru, hi na-pamalangu-nya i Ala. Tunaka nu hi nawua-nja nu na kaba wai la ma-kikunya hi napanii, “Unungu hàlawa nyimi! 28Nadu yiana jiaya na wai ria-nggu na ma-kawuku-ya na pa-ràndingu-na i Ala – na wai ria pabungu ndumana na tau dangu nduma pa-jàmangu wàngu njalada. 29Langatàka ka kupeka-nggai: Nyungga napa nda kuhili unu-anyapa na wai angguru yiana lupa tomaya na rehi ba kuunu dànggai nyimi la Pinu Tana Bidina na Amanggu,” wàna.
30Tunaka nu wunda-danyaka hau ludu wotungu. Hàlaka patuna nu laku-danyaka la Tandula Haitungu.
I Miri Yehu ba nanyura-ya na pahiningu-na i Peturu
(Mrk. 14:27-31; Luk. 22:31-34; Yuhn. 13:36-38)
31Hàla i Yehu hi napanii-nja da makiku-nya, “La rudungu nàhu-maka nyimi mbuu ndàbami bai palai wàrungga Nyungga; nadu daa la Huratu Matua ni-manyaka na pa-tulihu: Napanii i Ala, ‘Nyungga napa ku-pameti-ya na ma-pawangu, tàka da kabàba mbimbina hi dapai - ihangu,’ wàna. 32Na nyuna jàka pahada beli-nggaka, napa kulaku mangilu-nggai la Nggalilia,” wàna.
33Ka panii-nanyaka i Peturu lai Yehu, “Jiapa mbuu ndàbada yiada hawiangu ka dalaku wàrunggau Nyumu, nyungga ndiama duku!” wàna.
34Napaya i Yehu, “Namuya,” wànanya, “La rudungu nàhuma, ba ndedi da-hakuku da manu mbàda pa-ndailungu-muka pa-pahini-ngga,” wànanya.
35Nahema i Peturu, “Jiapa ka kumeti karia-nggau kadu, nyungga nda ku-pahini-anggau la patanda-kau!” wàna.
Tàka mbuu ndàbada da ma-kikungu hawiangu, jia-mayai duda ba dapanii tuda nu.
I Miri Yehu ba na-hamayangu la Nggehimani
(Mrk. 14:32-42; Luk. 22:39-46)
36Hàlaka nu laku-nanyaka i Yehu dàngu da makiku-nya la hau pangia la Nggehimani ba wàdanya. Lai nu hi napanii-nja nyuda, “Mandapu kàdi yiahu nyimi, Nyungga luanggu pa-hamayangu,” wànanja. 37Hàla hi nawànda-ya i Peturu dàngu da madua da anana i Hambandiu palaku karia-nya Nyuna. Ka pa-kiringu-nanyaka pa-hawina dàngu panda ngudu na etina. 38Hi napanii-nja da makiku-nya, “Lalu handuka-ya na etinggu, kutika pameti-ka-amangu. Ndàdiku-wa nyimi lai yiahu, dàngu màta kai màra pawàla dàngga,” wànanja.
39Tunaku nu laku marau-nanyaka i Yehu hawutu, hi na-maràbaku la tana ba na-hamayangu, “Dou Ama,” wàna, “jàka pekuna pamarau àruya yiana na ma-handuka na pa-hambeta-nggu. Na nyuna àmbu jiaya na pambuha-nggu Nyungga, tàka na pambuhamu Nyumuka dumu Ama,” wàna.
40Hàlaka nu beli-nanyaka i Yehu la ma-kikungu da madua haàtu-da, tàka ba natà-kanja katuda-da padua. Hi napanii-nya i Peturu, “Ana hau njàmua nyimi tau madua haàtu nda peku pawàla dà-mbumingga? 41Imàra pawàla-wa dàngu kai hamayangu ka àmbii hunggu ma-pakamangu. Làti na ngahumi ka kuliya na ma-deningu wàna-maka duna, tàka nyimi ndai màkangu wikimi, nadu na hada tau ba na-malijangu,” wànanja.
42Hili lua-nanyai handàkangu i Yehu pa-hamayangu, “Dou Ama, na mayila yiana jàka lupa ku-hambeta-maya bàdi, ba nda peku payila-nya, màlawa na pambuha-mu Nyumu bia na ma-padeningu,” wàna. 43Hàlaka nu i Yehu hi nabeli tomaha da makiku-nya, tàka ba natoma-nja katuda-mada-nyapa, nadu ba lalu tàtiku-da.
44Handàkangu-ki hili dunjaku-mananjai nyuda paraïna i Yehu tàka la padailungu wàna ba na-hamayangu, hi napeka hama tuna na pawunda-na kawai. 45Hàlaka nu hili beli-nanyaka la makiku-nya hi napanii-nja, “Katuda-mami-nyapa nu bai hangahu? Tàngaru, jia-yaka na rehina na Ana Tau ba pakata-nya la limada da tau njala. 46Hadanguwa ka talaku. Tàngaru! Na tau na ma-kaleka-ngga nàmu-nyaka!” wànanja.
I Miri Yehu ba yàpaya
(Mrk. 14:43-50; Luk. 22:47-53; Yuhn. 18:3-12)
47Ba talànga panii-i-napa nu i Yehu, nàmu-nyaka i Yundahu, na haàtu welingu la tau hakambulu madua ma-kikunya. Da mamai karia-nya nyuna, nadangu-mbu na tau mangàndi hapanda dàngu kadipu ai. Nyuda pa-paràha-da da ratu kapala dàngu da ama bokulu Yahundi-ha. 48Na ma-kaleka mbàda panii hàla-mana-njaka na tanda yiana, “Na tau na pa-puduku-nggu, jia-mayaka Nyuna. Yàpaya Nyuna!” wànanja.
49Ba natàka-ka lai nu i Yundahu, pangalangu lua toma-madua-nanyaka i Yehu hi napanii, “Peku hàmuwa, Umbu Ngguru!” wàna. Ka puduku-nanyaka i Yehu.
50Nahema i Yehu, “Ha ànda, nggàra maimu lai yiahu?”#Ha ànda, nggàra maimu lai yiahu? jàka ndia: Pahàra parengga-nyawa jàka nggàraya na pa-pahàrangu ba wàmu. hi wàna.
Tunaka nu ndàharungu-nanyaka na tau, tàka hi dayàpa-ya i Yehu. 51Na haàtu na ma-kikunya na maninya lai nu dàngu i Yehu, na-butuhu-ya na hapanda-na hi na-làndahu-nya na haàtu na atana na ratu bokulu, nahàpu na kahilu-na. 52I Yehu napanii-nya na ma-kikungu, “Patiku belinya na hapanda-mu la tikuna, nadu mbuu ndàbana na tau na mawàngu hapanda-na napa na-pameti-ya hapanda. 53Bau rekiya nda kumàka pakarai pa-ndulangu la Amanggu, ka na-paràha parenggangu hakambulu dua pa-jurungu rihi tanatara papalewa? 54Tàka jàka tuna nu, nggiki hama pa-tutungu-naka na pambàda nyura daa la Huratu Matua, ba jiangu-maka bàdi duna ba na-deningu hama tuna nàhu ni?” wàna.
55Hàla i Yehu hi napanii-nya na tau dangu, “Nggikina, Nyungga yia ka tau akatu-ka, hi mihada ngàndingga hapanda dàngu kadipu ai la payàpa-ka Nyungga? Hau lodu - hau lodu ningga ba ku-papekangu la Umana i Ala, tàka nyimi ndai yàpaka. 56Na nyuna tuna numaka bàdi duna na madedi hama tuna na pa-tulihu-da da wunangu la Huratu Matua,” wàna.
Hàlaka nu, mbuu ndàbada da makiku-nya palai dunjaku-danyaka i Yehu.
I Miri Yehu la hangga Bata Bokulu Anggama
(Mrk. 14:53-65; Luk. 22:54-55, 63-71; Yuhn. 18:13-14, 19-24)
57Da tau da mayàpa-ya i Yehu dangàndi-ya la umana na Ratu Bokulu Kayapàhu. Lai nu pauhi-mada-nyaka da ngguru anggama dàngu da ama bokulu Yahundi. 58I Peturu kiku-mananya i Yehu welingu la mamarau lundu la talora umana na ratu bokulu. Hàla hi natama daa la talora, hi na-mandapu dànja da tau manggangu. Na-rinjungu papinya jàka nggiki-naka napa na hupu njàpuna mbuu ndàbana. 59Da ratu kapala dàngu mbuu ndàbana na Bata Bokulu Anggama dahada ngàndingu pahimbu hakahii kabàli ka peku puhanya hukungu meti i Yehu ba wàda. 60Tàka nda dahunggu ndokumbu hau lata, jiapa ka dadangu da ma-hurungu la pa-hakahii kambàliku. La malamiri ninja ba tau maduaha da ma-ndàharungu la hangga. 61Dapanii, “Na tau yiana napanii, ‘Nyungga kumàka pa-nyànggaru-ya na Uma Ala, tàka la dalu tailu mbua lodu kumàka pa-pahada belinya,’ wàna,” wàda.
62Hàla na ratu bokulu na-hadangu hi napanii lai Yehu, “Màla ka ndau hema-aha nu na pakàla wàdanggau Nyumu?” wàna-nya. 63Tàka i Yehu pàdi wànama-a. Hili handàkangu panii-nanyai na ratu bokulu, “Parongu-na i Ala na maluri,” wàna, “peka-nggama jia-kauka nu Nyumu Hanganji Ma-pamànangu?” wàna.
64Nahema i Yehu, “Jia-maduya hama tuna ba wàmu. Tàka langatàka ka kupaka-nggai: Pa-kiringu welingu nàhu, napa nyimi ita-minyaka na Ana Tau ba na-mandapu la kawana-na#mandapu la kawana: Tàngaru-ya la 22:44. i Ala Mahupu mbiha, dàngu namai la pinu karumangu la awangu!” wàna.
65Ka bàriku-madua-nanjaka da pakina#Ka bàriku-madua-nanjaka da pakina: wàngu-mada ba tuda nu da tau Yahundi jàka dambeni. na ratu bokulu, “Lapi-nanyaka i Ala! Nggàra ihi wànguipa hakahii! Nyimi rongu wikimami-nyaka mbuu ndàbami ba napanii lapiya i Ala.
66Nàhu nggikina wànaka na pa-kanandi-mi nyimi?” wàna.
Dahema nyuda, “Njala-nanya, nameti-ma bàdi,” wàda.
67Hàla hi da-pangànji-ya na matana i Yehu, dàngu hi dapalu-ya. Ningumbu matàba-ya, 68da mapanii, “Kamangu pa-manyura kau panii-nggama, ha Hanganji Pa-mànangu!” Nggamu na matàba-kau?” wàdanya.
I Peturu ba na-pahiningu rukuna i Yehu
(Mrk. 14:66-72; Luk. 22:56-62; Yuhn. 18:15-18, 25-27)
69I Peturu mandapu-na padua lua la hambeli, la talora. Na haàtu na papalewa kawini namai hi napanii-nya i Peturu, “Ka nda jia-mbukau dumu nyumu anguna i Yehu tau Nggalilia?” wànanya.
70Tàka i Peturu na-pahiningu la hanggada nyuda mbuu ndàbada, “Nda kupi-anya jàka nggàra wàmu,” wàna i Peturu ba nahema, 71hàla hi nalaku la pindu talora. Na haàtu na papalewa kawini haàtu naita-ya i Peturu, hi napanii-nja da tau da maninja lai nu, “Na tau yiana karia-mada dàngu i Yehu welingu la Naharitu,” wàna.
72Hàla hili pa-hiningu-nanyai i Peturu ba na-harangu. “Langatàka nda kutanda-aya duku na tau nuna,” wàna.
73Ndedi nggi mandai, da tau da ma-ndolaku lai nu mai-danyaka lai Peturu, “Langatàka, nyumu-maka na haàtu welingu la anguda nyuda. Tatanda welinya na hilumu,” wàdanya.
74Hàla pa-kiringu-nanyaka pahara pati - tiri, “Nda kutanda-aya duku na tau nuna!” wàna.
Na mbàdiku-na nuna hakuku-danyaka da manu. 75Ka namu-nanyaka i Peturu ba mbàda panii-mana-nyaka paraïna i Yehu, “Ba ndedi da-hakuku da manu mbàda pa-dailungu-muka nyumu pa-pahini-ngga,” ba wànanya. Hàla luhu-nanyaka i Peturu, ba dàngu ngi - ngibana pahii.
Currently Selected:
MATIU 26: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
