MATIU 22
22
Na pangerangu rukuna na mbabu lii lalei mangoma
(Luk. 14:15-24)
1I Yehu nahilu paniinya na tau dangu ba nawàngu pangerangu. 2“Jàka na-pareta i Ala, na hadana hamana na pangerangu yiana: Na haàtu na maràmba nawulu mbabu ba lalei-nanya na anana. 3Na maràmba na-paràha-nja da papalewa-na palua papiti-ha da tau pa-dundangu la mbabu nuna. Tàka da tau pa-dundangu nda dabihu pamai. 4Tunaka nu na maràmba hili paràha-nanjai da papalewa-na hawiangu. Napanii-nja: ‘Pekanja da pa-dundangu: Da pangangu ba mbabu màtudaka. Hapi dàngu da ana hapinggu da mahàmu halawàla, parupu-mahaka. Màtu ndàba-madaka maiwa nu la mbabu lii lalei mangoma, wàminja,” wànanja. 5Tàka da ariyaa da pa-dundangu nda da-wàrihu-aya. Nyuda lua biadanya la paràmada haàtu - haàtu – na haàtu la woka-nanya, hawiangu la paràma himbu utu; 6tàka ninjai hawiangu da mayàpa-ha da papalewa-na na maràmba, dapalu-ha dàngu da-pameti-ha. 7Nu ba narongu-ka na maràmba na rukuna nuna, hàngga nda ukuya. Na-paràha-nja da tanatara-na pa-pameti-ha da ma-pameti tau dàngu hi tunuha da paraingu-da. 8Hàlaka nu paau-nanjaka da papalewa-na, hi napanii-nja, ‘Na mbabu lii lalei mangoma màtu-naka, tàka da ngara pa-dundangu nda ràkada. 9Nàhu luawa la ànda - ànda bokulu, kai dunda pada - dangu tau mamai la mbabu lii lalei mangoma yiana,’ wànanja. 10Ka laku-danyaka da pa-palewa-na. Dalaku la ànda - ànda bokulu hi da-pauhi-nya mbuu ndàbada da tau patoma-da lai nu, ka tau hàmu ka tau nda hàmu-yakai. Ka mbinu-nanyaka ariyaa na pangia ngia pambabu lii lalei mangoma nuna.
11Tunaka nu tama-nanyaka na maràmba pa-hamata-ya na ariyaa. Naita-ya na haàtu la ngia paremi na manda paki papaki ba mbabu. 12Hi na-paàra-nya, ‘Ha angu, nggikina nyumu hi peku biana bau tama lai yiahu dàngu nda pakimu paki ba mbabu?’ wànanya. Na tau nuna nda nggàra ndoku pahema wàna. 13Hàla na maràmba hi na-paràha-nja da papalewa-na, “Honduha da wihi da limana na tau yiana, dàngu kai kawuka-nya la hambeli la pangia kapàtangu. Lai nu napa hii dàngu mayila-nanyaka,” wàna.
14Hàla i Yehu tuna yia ba na-panjàpu wànya na pangerangu, “Dangu pa-paaungu, tàka hawutu-ana na papindi,” wàna.
Na ruku wuangu hilu katiku
(Mrk. 12:13-17; Luk. 20:20-26)
15Tunaka nu da tau Parihi dalua pa-batangu ba da-pahamangu jàka nggikina wàda ka peku kahili-danya i Yehu ba dawàngu pa-paàra - paàra-nya. 16Ka palewa-danjaka da makiku-nja nyuda lai Yehu pa-kariangu ba ma-piraha da angu kalibaru Harondi. Da tau nuda dapanii, “Umbu Ngguru, mapinggau Nyumu bau tànji. Na pa-ajaru-mu na pa-ailulungu rukuna na pawuku-na i Ala la tau, ba ndau patingi-nya na panii tau jiapa nda nggamuya. Nadu Nyumu ba ndau tàngaru kaba mata tau. 17Jiaya nu umbu, kau kamangu papanii-nggama: Tundunya na kalaratu anggama-nda nyuta, napeku ba ta-wuangu hilu katiku la Hanganji Bokulu napa hi ndia?” wàdanya.
18I Yehu napi-manya na pawuku akatuda, jia-duyaka hi napanii, “Ha nyimi tau kapelu! Nggikina nyimi hi mi-kahili-ka? 19Màla paita-ngga àmahu da pa-wuangu wàmi hilu katiku!” wànanja.
Ka wua-danyaka hau àmahu bara. 20Hi na-paàra-nja paraïna i Yehu, “Nggamu nggambaru dàngu nggamu tamuna yiana yia?” hi wàna.
21“Na Hanganji Bokulu,” hi wàda.
Ka panii-nanyaka i Yehu lai nyuda, “Jàka tuna nu na manguna na Hanganji Bokulu wua-manya na Hanganji Bokulu, na manguna i Ala wua-manya i Ala,” wànanja.
22Nu ba darongu-yaka ba na-pakalokangu tuna nu, hangàtaru-danyaka. Ka laku wàru-danyaka i Yehu.
Na ruku hadangu welingu la meti
(Mrk. 12:18-27; Luk. 20:27-40)
23Nu la lodu nunama, ba mapira-ha da tau Handuki damai lai Yehu. Nyuda jiaha da kalibaru tau makata-nya na panii, na tau nda na-hadangu belia welingu la meti, wàda. 24“Umbu Ngguru,” wàda, “I Muha na-ajaru tunanda yia: Jàka nameti na haàtu tau mini, dàngu nda ningu anana, na anguna paluhu na-kanoma-duyaka bàdi na kawini na pameti wàru lei, ka natunya wàlana na anguna paluhu na mambàda meti,’ wàna. 25Handàka ninja ba tau mapihu-ha da ma-paangu paluhu da ma-ngiangu lai yiahu. Na ma-wungangu na lalei hi nameti dàngu nda ningu anana. Na papaha pameti wàruna ndumana na anguna paluhu-yaka. 26Nuna na anguna paluhu meti-mananyai dàngu nda ningu anana. Hili tumanai dàngu na anguna paluhu na padua haàtu wàda lundu tomaya na papihu wàda. 27La malamiri meti-mananyai nuna na tau kawini. 28Nu, la lodu pahada belinya na mameti, nggamuka bàdi ma-papaha-nya nuna na tau kawini? Nadu ba pihuda ba mbàda kanoma hàla-duda-nyaka,” wàda.
29Nahema i Yehu, “Kambura ailulu-minya nyimi, nadu ba ndai jàngapu-ya na Huratu Matua, hamanai na mbihana i Ala. 30Nadu jàka da-hadangu beli napa da mameti, nyuda nda dalalei mangoma-apa, ba tuna nyuda daluri hama tuna papalewa la awangu-haka. 31Ndedi mi-handàkangu-mapa dimi pambaha-ya jàka nggàra wàna i Ala rukuda da tau meti ba pahada belinja? I Ala napanii, 32‘Nyungga Alana i Ambarahàmu, Alana i Ihàku dàngu Alana i Yakupu-ka’ ba wàna? I Ala nda Ala tau meti-aya. Nyuna Ala tau luriya duna,” hi wàna.
33Nu na tau dangu ba darongu-yaka na pa-kalokangu-na i Yehu, maratangu nda uku-danya na pa-ajaru-na.
Na pareta na ma-papingi
(Mrk. 12:28-34; Luk. 10:25-28)
34La rehi nu da tau Parihi darongu-ya i Yehu ba na-pakandii-haka da tau Handuki hi nda dahilu kaminya, pauhi-danyaka. 35Na haàtu na ngguru anggama anguda nyuda, na-kamangu pa-kahili-ya i Yehu la paàrangu, 36“Umbu Ngguru,” wàna, “nggi pareta-yaka na marihi papingi la uku anggama?” wànanya.
37Nahema i Yehu, “Mbuhanya i Miri Alamu wàngu mbulungu etimu, mbulungu hamangu-mu dàngu mbulungu pangàdangu-mu. 38Nunayaka na pareta na ma-papingi dàngu na ma-mbàtingu. 39Na pareta na padua wàna mahama-nya na kawunga-na: Mbuhanya na angumu patau hama tuna bau mbuhangu wikimu. 40Mbuu ndàbada da uku anggama da pawua-na i Muha hamanai da pa-ajaru-da da ngara wunangu palata-danja la dàmbu pareta nuda-maka,” wànanja.
Rukuna na Hanganji Ma-pamànangu
(Mrk. 12:35-37; Luk. 20:41-44)
41Ba talànga pauhi-daka da tau Parihi lai nu i Yehu na-paàra-nja. 42“Màla nggàra wàmi nyimi rukuna na Hanganji Ma-pamànangu? Nggamu wàlada wàmi nyimi?” wàna.
“Wàlana i Ndautu-ya,” hi wàda.
43“Jàka tuna nu, nggikina na Ngahuna i Ala ba napuru pekanya i Ndautu ‘Miri’ hi wànanya na Hanganji Ma-pamànangu? Nadu i Ndautu napanii,
44‘I Miri napanii-nya na Miringgu:
mandapu-wa la kawana-nggu,#mandapu-wa la kawana-nggu: Pa-namatu-nya na huri Yahundi, na tau patembi dàngu na pa-wuangu kawaha, na-mandapu ningu la kawana.
hi lupa ku-panyàku-ha da muhu-muka lai nyumu,’ ba wàna?
45Jia ba tuna ‘Miri’ jàka wàna-madunya na Hanganji Ma-pamànungu paraïna-na i Ndautu, nggiki pekuna Nyuna hi wàlana i Ndautu-ya,” wànanja.
46Nda ningu haàtu mapeku pahema-ya i Yehu. Piti welingu la lodu nuna, nda ningu-apa matoru mbeni pa-paàra-nya ngga - nggàra Nyuna.
Currently Selected:
MATIU 22: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
