MATIU 21
21
I Miri Yehu ba natama pa-mbabungu la Yeruhali
(Mrk. 11:1-11; Luk. 19:28-40; Yuhn. 12:12-19)
1Ba da-mareni-nyaka la Yeruhali, tàka-danyaka la Mbetupanggi la Tandula Haitungu. Lai nu i Yehu na-paràha-nja da tau madua makiku-nya la palaku mangilu. 2“Ilua la kotaku ni lua la hangga,” wàna i Yehu lai nyuda. “Ndedi tiangu napa miita-ya na heu kalandai pahondu dàngu anana la lihina. Wàkahu-ya kai ngàndiya nàmu! 3Jàka ningu ma-paàra-nggai ngga - nggàra, pekanya na tau nuna, ‘Ningu paihi wàngu wàna i Miri,’#i Miri: jàka ndia: na Mamangu-nya. wàminya, napa nalu puli-manggai duna pangàndi-ya nuna na kalandai,” wànanja.
4Nu hi tuna nu ka na-padeningu na papanii-na na wunangu,
5“Pekanya la Hiungu,
na Hanganji-mu nàmunya lai nyumu,
Nyuna na-karàda etina dàngu na-kaliti heu kalandai,
heu ana kalandai larii-nanya,” wàna.
6Tunaka nu laku-danyaka nuda da tau madua ma-kikungu, hi dalaku-nya hama tuna ba wànanja i Yehu nyuda. 7Ka ngàndi-danyaka nuna na kalandai dàngu anana. Hàla wàlahu-danjaka da hinggida la kajiada da kalandai. Tunaka nu kaliti-nanyaka i Yehu. 8Dangu tau da maninja lai nu da ma-wàlahu-ha da hinggida la ànda, tàka hawiangu dahàpi lai ai hi da-wewaru-nja la padua ànda. 9Na tau dangu da malaku mangilu la hangga dàngu na ma-malamiri la kajia-na i Yehu dalaku warangu, “Oha-anaka na Anana i Ndautu! Na-mànjaku maringu-wa Nyuna na mamai wànya na tamuna i Miri. Wotunya i Ala Mahupu jangga!” wàda.
10Hàla, ba natama-ka i Yehu la Yeruhali, kangguhuku-nanyaka na ihi paraingu nggubuluna, “Nggamuya yiana yia?” wàna na tau la paraingu.
11“Jiaya i Wunangu Yehu welingu la Naharitu la Nggalilia,” wàna na tau dangu na matundu-nya i Yehu.
I Miri Yehu ba natama la Umana i Miri
(Mrk. 11:15-19; Luk. 19:45-48; Yuhn. 2:13-22)
12Tunaka nu i Yehu tama-nanyaka la Umana i Miri, hi nawàngga hàlaya na tau na ma-danggangu dàngu na madingi lai nu. Na kabe - beliha da menja tau manjepa ndui dàngu da nggala ngia pa-danggangu kulundiha. 13Hàla hi napanii-nja nuda da tau “Daa la Huratu Matua ninya na-patulihu ba napanii i Ala, ‘Na umanggu uma ngia pa-hamayangu-ya wàda làti.’ Tàka nyimi mituya hibu tau rambangu!” wànanja.
14Da tau poki dàngu tau kaliparu damai lai Yehu la Umana i Miri, hi na-pamàlaru-ha. 15Tàka da ratu kapala dàngu da ngguru anggama dambeni ba daita-ha nuda da pa-hangàtarungu da paruku-na i Yehu. Dàngu dambeni-mbu ba darongu-ha da anakeda ba da-kayaka la Umana i Miri, “Oha-anaka na Anana i Ndautu!” ba wàda.
16Dapanii-nya i Yehu, “Murongu-duha ni jàka nggàra wàda?” wàdanya.
“Wua kurongu-maduha,” hi wàna i Yehu. “Ndedi mi-handàkangu-a dimi pambaha-ya na handalaru yiana la Huratu Matua, ‘Da anakeda dàngu da ana rara ku-ajaru-mahaka la pawunda wotungu ma-lànyapu,’ ba wàna?” hi wànanja.
17Tunaka nu i Yehu dunjaku-nanjaka, hi naluhu welingu la paraingu nalaku la Mbetani hi natodu lai nu.
I Miri Yehu ba naràtunya na pingi ai kapilitu
(Mrk. 11:12-14, 20-24)
18La mba - mbaru hadangu harii, nàhu la ànda ba nabeli la paraingu, manjuu-nanyaka i Yehu. 19Naita-ya na hareti na pingi kapilitu la hingi ànda. Hi nalua la pingina, tàka nda nahunggu ana haumbu wuana, ruu jua-ma-aya. Hàla i Yehu hi napanii-nya nuna na pingi ai, “Nyumu napa ndau hili wua-apa” wànanya. Ka hàngu malaï-madua-nanyaka na pingi kapilitu.
20Nu da makiku-nya i Yehu ba daita-yaka na matuna nu, hangàtaru nda ukuha, “Nggikina ni na pingi kapilitu hi pa-ngalangu meti hàla-ma-ananya?” wàda ba da-paàrangu.
21“Langatàka,” wàna i Yehu. “Jàka mipawai dàngu ka àmbi ndua ndandi, pekuna nyimi la pawànya hama tuna na pawànggu Nyungga la pingi kapilitu yiana. Dàngu nda didi biaya nuna, jiapa peku-mbuna nyimi jàka mipanii-nya na tandula yiana, ‘Talunggahu-wa kau kawukangu wikimu la tehiku,’ jàka wàminya, napa na pa-deningu-ma duna. 22Nggàra biaya na pakarai-mi la hamayangu-mi, napa mingala-manya duna mili mipawai,” wànanja.
Na paàra-danya na hàkuna i Miri Yehu
(Mrk. 11:27-33; Luk. 20:1-8)
23Tunaka nu i Yehu hi nabeli la Umana i Miri, hi natama pa-ajaru lai nu. Ba talànga ajaru-naka nu, mai-danyaka da ratu kapala dàngu da ama bokulu Yahundi lai Nyuna hi da-paàra-nya, “Nggàra latana Nyumu hiu wundaya yiana mbuu ndàbana? Nggamu mawua-nggau hàku tungu nu lai Nyumu?” wàdanya.
24Nahema i Yehu, “Nyunggai duku ka ku-paàra-nja nyuda wànggunggai. Dàngu jàka mihema-duya, napa ka kupeka-nggai jàka nggamu hàkuna Nyungga hi kuwunda-ha yiada mbuu ndàbada. 25I Yuhani ba na-parunungu, nggamu hàku-naka? I Ala jàka ndia hi tau?” wànanja.
Tàka da ratu - ratu kapala dàngu da ama boku - ama bokulu Yahundi bata-danyaka dàngu anguda, “ ‘Wàngu hàkuna i Alaya,’ jàka wàndanya Nyuna napa, ‘jàka tu maduna ka ni hi ndai waiya?’ wànandai. 26‘Hàku tauya,’ jàka wànda, ta-mangàdatu-nya na tau dangu, nyuda mbuu ndàbada ba dareki-ya i Yuhani ba wunangu-ya,” wàda. 27Jia-duyaka hi dahema, “Nda mapi-anya,” hi wàda-ma-a.
Hàla i Yehu hi napanii-nja, “Jàka tuna nu Nyunggai duku nda kupeka-anggai jàka nggamu hàkuna hi kuwunda-ha nuda mbuu ndàbada,” wàna.
Na pangerangu da anakeda madua
28“Màla nggikina wàna na pa-patanda-mi na ngerana yiana?” hi wàna i Yehu ba na-pangala-nya na paniina. “Ninya na haàtu ama na maningu anangu mini madua. Na tau nuna nalua la anana na ma-maaya, ‘Ana, la lodu nàhu kau lua paràma la woka angguru,’ wànanya. 29Napaya na anakeda, ‘Nda kubihu-a duku,’ wàna. Tàka ba tunaka nu, napa-njilungu na pa-tandangu-na, hi nalua paràma la woka angguru. 30Tunaka nu na ama lua-nanyaka la anana na padua wàda, hi napanii hama tuna kawai, ‘Jiaya ama,’ hi wàna nuna na anakeda. Tàka nda nalua-a. 31Màla nu, welingu nuda da anakeda madua nggamuya na ma-patundu-nya na pambuha-na na amana?” wàna.
“Na ma-maaya,” wàdaka da ratu kapala dàngu da ama bokulu Yahundi.
Ka panii-nanyaka i Yehu lai nyuda, “Langatàka ka kupeka-nggai: da ma-pahurungu hilu katiku dàngu da kawini pahunda napa nyudaka da ma-mangilu patama la angu banjaru-na i Ala welingu lai nyimi, wànanja.#La lawiti ndai da manda pirada, ningu matuna yia na haleli-danya: 28 “Màla nàhu nggikina na pa-tandangu-mi na rukuna yiana?” hi wàna i Yehu ba na-pangala-nya na paniina. “Ninya na haàtu ama na maningu anangu mini tau madua, nalua la anana na ma-maaya, ‘Ana, la lodu nàhu kau lua paràma la woka angguru,’ wànanya. 29 Napaya na anakeda, ‘Tu biana duna ama!’ wàna. Tàka nda nalua-a. 30 Tunaka nu na amana lua-nanya la anana na padua wàda, hi napanii hama tuna kawai. Napaya na anakeda, ‘Nda kubihu-a duku,’ wàna, tàka ba tunaka nu na-panjilungu na pa-tandangu-na hi nalua. 31 Màla nu, welingu nuda da anakeda madua, nggamuya na ma-patundu-nya na pambuha amana?” wànanja. “Na padua wàda,” wàdaka da ratu kapala dàngu da ama bokulu Yahundi. 32Nadu i Yuhani Pa-runungu ba namai, hi na-paita-nggai huri luri na pambuha-na i Miri, ba tuna nyimi ndai waiaya na pa-ajaru-na; tàka da ma-pahurungu hilu katiku dàngu da kawini pahunda dawaiya nyuna. Tàka jiapa kai itayakadu mbuu ndàbana, nyimi ndai ngalangu-ma pa-panjilu-nya na kanandingu-mi dàngu ba nda waiya i Miri,” wànanja.
Na pangerangu rukuda da maràma woka angguru
(Mrk. 12:1-12; Luk. 20:9-19)
33“Ronguya na pangerangu hau yiana,” wàna i Yehu, “Na haàtu na mangu tanangu na-pamula-nya na hau na woka angguru. Natunya oka winggiru-na dàngu naàki lambongu ka pohu ningu angguru, hàlaka nu hi na-pahadangu lewatu uma dai. Hàlaka hi na-pakata-nya la tau mahewa-ya nuna na woka angguru; tunaka nu laku-nanyaka la hau paraingu. 34Ba natoma-ka na rehi pàpu wua angguru, na mangu tanangu na-paràhangu papalewa-na la tau maràma-ya na woka la pakei ndumana. 35Tàka da maràma woka dayàpa-ma-aha nuda da papalewa-na na mangu tanangu: Na haàtu dapalu-ya, hawiangu da-pameti-ha, hilu hawiangui da-nàhaku-nja watu. 36Na mangu tanangu hilu paràhangu-mananyai tau papalewa, rihi danguipa welingu la ma-wungangu. Tàka jia-mayai ba tudanja nu. 37La malamiri na mangu tanangu na-paràha-nya na ana wikina. Na pareki-na, ‘Ba ngaha paana-nggunya datembi-mayaka duna,’ wàna làti. 38Tàka nuda da maràma woka ba daita-yaka na anana na mangu tanangu, panii-danyaka dàngga anguda, ‘Na, jia-yaka yiana, na ma-kahenga-nya. Màlawa ka ta-pameti-ya, ka peku màngindanya na kangeha-na,’ wàdaka. 39Ka yàpa-danyaka na anana, hi da-kawuka-nya la hambeli, hi da-pameti-ya,” wàna.
40Hi na-paàrangu i Yehu, “Màla, jàka nabeli-ka duna nuna na mangu woka anggurungu, nggikina wàna-njaka nuda da tau madai woka?” hi wàna.
41Dahema nyuda, “Ka na-pameti-mahaka duna nuda da tau akatu, hi na-pakata-nya tau hawiangu nuna na woka angguru, na ma-mbuhangu pa-wuangu ihi tana lai nyuna na mangu wokangu jàka jia-yaka na rehina,” wàda.
42Ka panii-nanyaka i Yehu lai nyuda, “Ndedi mi-handàkangu nyimi pambaha-ya na pa-tulihu daa la Huratu Matua?
‘Na watu na panda wàda da tukangu wulu uma,
jia bia-yaika na watu tunggulu.
Nuna paruku-na i Miriya,
ai, kanjupu manandangu-ya!’ ” wàna.
43“Jiaya nu kanandi-nya,” wàna i Yehu, “mbuu ndàbana da ngabami nyimi ba banjaru-na i Alakai napa na-pukalu hàlaha welingu lai nyimi tàka napa hi nawua-nya na banjaru na manunju-ha da pareta-na i Ala. [44Na tau ma-kanabu lai nu la watu napa na-kaweraku; dàngu na tau na pa-pinjalu-na nuna na watu napa na-muburu hi kumburu tanaya]” wàna.
45Nu da ratu kapala dàngu da tau Parihi ba darongu-ha da pangerangu pawunda-na i Yehu, dapi-manya ba jiaha nyuda da palana i Yehu. 46Jia-duya hi da-patikingu la payàpa-ya. Tàka da-mangàdatu-nya na tau dangu, nadu ba wunangu-ya i Yehu wàdanya tau dangu.
Currently Selected:
MATIU 21: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
