MATIU 18
18
Nggamu marihi bokulu?
(Mrk. 9:33-37; Luk. 9:46-48)
1La rehi nu da ma-kikungu damai lai Yehu hi da-paàra-nya, “Nggamuya na pareki na marihi bokulu la honga banjaru-na i Ala?” wàdanya.
2I Yehu napaau-nya na haàtu na anakeda kudu, hi na-pandolaku-ya la hanggada nyuda. 3Hàla hi napanii i Yehu, “Langatàka ka kupeka-nggai! Mbulungu jàka mi-panjilungu kai dedi hama tuna anakeda bàdi hi angu banjaru-na i Alakai. 4Na tau na ma-pawawa wikina dàngu na madedi hama tuna na anakeda yiana, nyuna duna na marihi bokulu la honga banjaru-na i Ala. 5Dàngu na tau na mainga-ya na anakeda hamangu yiana lumungga Nyungga, inga-nangga Nyungga-maka,” wàna.
Da ma-pawitingu hi kiri tuna manjala na tau
(Mrk. 9:42-48; Luk. 17:1-2)
6“Nggamu ma-pawiti-nja yiada da tau kudu tungu yia hi kiri nda hili pawaida lai Nyungga, rihingu hàmu na watu nggihu ka tiwalu-nya la nggoruna ka puhaya la libu muru. 7Ura pàku-anaka na pinu tana yiana ruku hangia - hangia ma-pawitingu hi kiri njalana na tau. Tubana da hangia - hangia da matungu nu ba ni mànu-manja, na nyuna ura pàku-ananya na tau na ma-pawitingu!
8Jàka na limamu jàka ndia na wihimu na ma-pawitingu hi kiri njalamu, kadipu-ya ka wàrunya. Rihingu hàmu kau luri lai Ala dàngu nda ninya na hapapa na limamu jàka ndia na wihimu, welingu napa ba wàrunggau la epi naraka dàngu dua mbungu limamu jàka ndia wihimu. 9Jàka wua mata-munya na ma-pawitingu hi kiri tumu manjala, hikuya ka wàrunya. Rihingu hàmu kau luri lai Ala dàngu wua mata hapapa-mu, welingu napa ba wàrunggau la epi naraka ba dàngu dàmbuda da wua matamu,” wàna.
Na pangerangu mbimbi na ma-mbulangu
(Luk. 15:3-7)
10“Pananjarungu! Àmbi pawawa-ya na haàtu welingu la tau yiada da maana kududa. Nadu kanandi-nya, da papalewa ndumada nyuda ba ni mànunja padua la hanggana na Amanggu la awangu.
[11Nadu na Ana Tau ba maina pa-pamàna-nya na tau na ma-njàrangu!]
12Màla nggikina na pa-pangàda-mi? Jàka ningu haàtu maningu mbimbingu hangahu ngiu, tàka na heu welingu nu la mbimbi dangu na-mbulangu, nggikina wànaka nuna na tau? Jiangu-maka duna ba na-dunjaku-nja nuda da mbimbi hiwa kambulu hiwa la tandula hi nalaku pahimbu-ya na ma-mbulangu. 13Tàka jàka nahunggu beli-yaka nuna na mbimbi – langatàka ka kupeka-nggai – napa nyuna nambaha ningupa na etina rukuna nuna na mbimbi na ma-mbulangu welingu la mbimbi hiwa kambulu hiwa da manda mbulangu. 14Tuna numbu na Amami#na Amami: da lawiti ndai da manda pirada: na Amanggu. la awangu ba nda na-mbuhangu ka ningu haàtu welingu da tau da mabidi pawai lai Nyungga ka na-njàrangu,” wàna.
Era njalana na angu dedimu
15“Era njalana na angu dedimu lai nyumu,#La lawiti ndai da manda pirada nda ningu-a kareuku tungu yia: lai nyumu. lua lai nyuna kau paita-nya na njalana. Ba tumu nu wàngu pa-kangunduhu-a ka didi dua-akai. Jàka na-patundu-nya na paniimu, ka ondungu-dumu-nyaka bau ngala belinya na angu dedimu. 16Tàka jàka ndia, kariangu haàtu madua-ki angumu. Nadu la Huratu Matua ninya na pa-tulihu, ‘Nawawa-mana ningu madua ma-tailu bàdi ma-hakahii ràka na ma-wàlahu-ya na njalana na tau pa-panjala.’ 17Jàka nda na-wàrihu-mayai na panaungu-da da tau nuda, pekanya na kabungguru. La malamiri, jàka jia-mayai ba nda na-wàrihu-ya na panaungu kabungguru, reki bia-yawa ba tau ma-pahurungu hilu katiku-ya jàka ndia ba tau manda tandaya i Alaya,” wàna.
Na pa-hiringu dàngu na pa-pahiangu
18“Kai pinya: Nggàraya na pahiri-mi la pinu tana, pa-hiringu-mbuya la awangu. Dàngu nggàraya na ma deningu ba wàmi la pinu tana, pa-padeningu-mbuya la awangu.
19Dàngu kai pimbunya: Era ningu la hongami nyimi tau madua ma-pahama la habata dàngu ka da-hamaya-mbunya ndumana, napa nakataku-maya duna paraïna Amanggu la awangu. 20Nadu jàka la ngginiha da tau madua ma-tailu ma-pauhi lumungga Nyungga, nimangga duku Nyungga la hongada,” wàna.
Na pangerangu rukuna na ata na manda bihu pa-jàmangu anguna
21Tunaka nu mai-nanyaka i Peturu lai Yehu hi na-paàrangu, “Miri, màla na angu dedinggu jàka nanjala lai nyungga, ku-pambira wundangu-ka bàdi pajàma-nya? Ku-papihungu?” wàna.
22Nahema i Yehu, “Ndia-a, ndau papihu wundangu bia, tàka upapihu kambulungu pa-papihu wundangu bàdi!#upapihu kambulungu pa-papihu wundangu bàdi! jàka ndia: papihu kambulu pihu wundangu. 23Nadu jàka na-pareta i Ala, na hadana hama tuna yiana na pangerangu: Na haàtu na maràmba ka ku-panjàpu-ha da pawuta-da da atanggu, wàna. 24Ba na-pakiringu-ka pa-manginjiru-ha, pahuru-danyaka na haàtu na ata na mawuta pada - dangu ba wàngu panda pira pàku biada 25dàngu nda namàka-apa pahilu-ha. Jia-duya, hi napanii na maràmba, dangga bianya nuna na tau ata dàngu anana papahana, lupa mbuu ndàbada da banda da pa-bànjalu-na ka na-hiulu-ha da wutana, wànaka. 26Ka patika maràbaku-nanyaka nuna na ata la hanggana na maràmba, hi na-kamahingu, ‘Dou miri, najaru àrungga, napa kuhilu hàlama-ha duku da wutanggu,’ wàna. 27Ka mila-nanyaka eti paraïna maràmba, hi najàma hàla-ma-anja da wutana
28Ba naluhu-ka na ata nuna, tàbuku-nanyaka na anguna paata-mbu, na maningu wutangu lai nyuna ana pira rata. Ka yàpa-nanyaka na anguna, hi na-kàhilu-ya, ‘Mbayaru hàla-maha da wutamu!’ wànanya. 29Ka patika-nanyaka na anguna la hanggana hi na-kamahi-nya, ‘Puli pàkungga angu, napa ku-mbayaru hàla-maha duku,’ wànanya. 30Tàka na ata nuna, ndia, wànama-a. Na panjànganguna, patama-ma-ananya la uma kapàtangu ka lupa na-mbayaru-ha da wutana. 31Nu da ata hawiangu ba daita-yaka na matuna nu namila na etida hi da-patàka-nya na rukuna nuna la maràmba. 32Ka paau-nanyaka paraïna maràmba na ata na ma-akatu hi nahàngga-nya, ‘Ha ata akatu! Mbuu ndàbada da wutamu kujàma-njaka, rukuna bau kamahi-ngga. 33Nda pekuna làti nyumu kau milanya eti na angumu hama tuna nyungga duku ba kumila-nggau eti?’ wànanya. 34Lalu mbana hànggaya na maràmba. Na ata na ma-akatu nuna napuhi-ya la uma kapàtangu ka lupa nahilu hàlaha da wutana,” wàna.
35I Yehu na-panjàpu-ya na papeka-na wàngu paniina, “Tuna numbu napa na Amanggu la awangu na pawàna lai nyimi haàtu - haàtu, jàka ndai jàma weli etinya na angumi,” wàna.
Currently Selected:
MATIU 18: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
