MATIU 19
19
Na lii pa-pekangu-na i Miri Yehu rukuna na pahewa
(Mrk. 10:1-12)
1Ba nahàla-ka i Yehu papeka ndàbaha nuda, dunjaku-nanyaka la Nggalilia hi nalaku la ngabana la Yundia la hapapa Luku Yorundangu. 2Nadangu na tau matundu-nya Nyuna, tàka Nyuna hi na-pamàlaru-ha lai nu.
3Ka mai-danyaka da tau Parihi pa-kahiliya. Hi da-paàra-nya, “Màla na uku anggama-nda nyuta, pekuna nu na tau ba na-pahewa dànya na papaha-na ruku màtu - màtu kiringu,” wàdanya.
4Nahema i Yehu, “Ka ndedii mbaha-aya la Huratu Matua nu na Ma-padikangu ba nawulu tau, la kawunga-na ba nawulu mini kawini? 5Ba nahàla-ka nu hi napanii, ‘Jia-duya nu na mini na-dunjaku-nja bàdi da ina da amana ka na-mbulungu dàngu papaha-na, nyuda ba dadua mbulungu-makia-daka,’ ba wàna? 6Jia ba tuna nyuda nda tau madua-ahapa, tàka mbulungu-ma-ada. Jia-duya nggàraya na pambàda pambulu-na i Ala nda uku pa-pahewa-nja paraï tau,” hi wàna.
7Hàla da tau Parihi hi da-paàra-nya, “Jàka tuna nu nggikina i Muha hi na-paràha-nya na tau la pawua-nya huratu pahewa na papaha na pa-pahewangu?” wàda.
8Nahema i Yehu, “I Muha hi na-pahia-nggai pa-pahewa dàngu papaha-mi nadu nyimi ba nda namuda la pa-papeka-nggai. Làti duna nda tuna nua la kawunga-na, hi wànanja. 9Jia-duya, ronguya yiana: Nggamu na ma-pahewa dànya na papaha-na – dàngu nda hanjàliru-na nuna na kawini – tunaka nu hi nahili piti kawini haàtu, na tau nuna njuraku-nanya,” wàna.
10Ka panii-danyaka da ma-kikungu lai Yehu, “Jàka tuna nu na àndana na lalei na mangoma, rihi hàmu ka àmbu lalei,” wàda.
11Nahema i Yehu, “Nda mbuu ndàba-ana na tau na mawànya na panii nuna, mbulungu-ana na tau màta ka tumu nu ba wànanya paraïna i Ala. 12Ba nidunya na tau na manda peku palalei, ka ba padedi ngàndi-mana-nyaka. Nimbunyai na tau na manda lalei paraï pahara wukunya tau. Dàngu nimanyai na mahara wuku la panda lalei, màta ka peku lumu-nggunya i Ala ba wàna. Na tau na mamàka panunju-ya na pa-pekangu yiana màta ka nanunju-ya,” wàna.
I Miri Yehu ba na-pakanyuru-nja da anakeda
(Mrk. 10:13-16; Luk. 18:15-17)
13Ninja da tau da mangàndi-ha da anakeda lai Yehu ka na-padambaku-nja lima la katikuda ba dàngu hamaya-nanja ndumada, wàda. Tàka da makiku-nya i Yehu dambeni-nja da tau nuda. 14Ka panii-nanjaka i Yehu da makiku-nya, “Pahia-nja da anakeda ka damai lai Nyungga! Àmbi hiri-dunja, nadu ba da tau hamangu tungu nu yiada da angu banjaru-na i Ala,” wànanja.
15Ka pa-dambaku-nanjaka lima da katiku-da da anakeda paraïna i Yehu dàngu hi na-pakanyuru-nja. Tunaka nu laku-nanyaka welingu lai nu.
Na bidi mini na mawulu
(Mrk. 10:17-31; Luk. 18:18-30)
16La hau lodu ninya na haàtu tau mini na mamai lai Yehu, “Umbu Ngguru, nggàra pawunda mahàmu-ka bàdi ka kulaku-nya, ka peku ngala-nggunya na luri na ma-langatàka dàngu na ma-palupangu?” wàna.
17Nahema i Yehu, “Nggikina hiu paàra-ngga Nyungga jàka nggàraya na mahàmu? Ba mbulungu Haàtu pàkuna na mahàmu. Jàka mbuhangu-munya paluri, mu-manundu bàdi la pareta-na i Ala,” wànanya.
18“Nggàra pareta-yaka nu?” hi wàna nuna na tau.
Nahema i Yehu, “Àmbu pameti tau, àmbu njuraku, àmbu manganga, àmbu hakahii kambàliku, 19tembiha da amamu da inamu; dàngu màta kau mbuhanya na angumu patau hama tuna bau mbuhangu tàda ihi wikimu, ba wàna,” hi wàna.
20“Mbuu ndàbada da pareta nuda mbàda tundu-manggu-njaka. Nggàra-ipa nu hangia,” hi wàna.
21Hi napeka-nya paraïna i Yehu, “Màta ka ku-malundungu hàmu jàka wàmu, lakuwa kau dangga hàlanja da mangumu. Wua-njawa nuda da àmahu-mu la tau mila, napa nyumu ngala-munjaka da banda la awangu. Hàlaka nu kau mai pakiku-ngga!” wànanya.
22Narongu-haka da panii nuda, nuna na bidi mini beli mangu handuka etingu-nanyaka, nadu ba lalu mbana wuluya.
23Ka panii-nanjaka i Yehu da makiku-nya, “Ka kupeka-nggai, harui langatàka na mawulu patama la angu banjaru-na i Ala. 24Dàngu yiana-mbu màta ka kupeka-nja wànggunggai, namuda ningupa na heu na ota patama la kubu utu, welingu la haàtu tau wulu patama la Pinu Tana Bidina i Ala,” wànanja.
25Nu da makiku-nya ba darongu-yaka nuna na papanii-na i Yehu, maratangu-danyaka, “Jàka tuna nu, nggamu-aka ràka ma-mànangu?” wàdaka.
26I Yehu napanau-ha nyuda hi napanii, “La tau, nda napeku-mapa duna! Tàka lai Ala napeku ndàba,” hi wàna.
27Ka panii-nanyaka i Peturu, “Màla, nyuma yia ma-dunjaku hàla-njaka hi makiku-nggau Nyumu. Nggàraka pangala-ma napa?” wàna.
28Hi napanii i Yehu lai nyuda, “Langatàka ka kupeka-nggai, La Pinu Tana Bidi napa na Ana Tau na-mandapu la kanjàka-na na ma-mangarangu. La rehi nu nyimi makiku-ngga napa mandapu-minyaka la hakambulu dàmbu kanjàka pareta, hi mitimba-nya na ngerada da hakambulu dàmbu kabihu banjaru Ihirailu. 29Dàngu nimbihu-na na tau mambàda du-njakunja da umana, angu dedina mini jàka ndia kawini, inana amana, anana, jàka ndia wokana lumungga Nyungga, na tau nuna napa na-ngalangu pa-hangahu wundangu. Dàngu nangala-mbunya na luri pa-langatàkangu dàngu pa-lupangu. 30Tàka napa nadangu na tau na ma-wungangu nàhu napa na-malamiri dàngu na tau na ma-malamiri nàhu napa na mangilu-ka,” wàna.
Currently Selected:
MATIU 19: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
