MATIU 14
14
Na metina i Yuhani Pa-runungu
(Mrk. 6:14-29; Luk. 9:7-9)
1La rehi nu i Harondi, ma-pareta la tana Nggalilia, narongu-ya na rukuna i Yehu. 2I Harondi napanii dànja da panggawi-na, “Jia-mayaka yiana i Yuhani Parunungu na mambàda hadangu beli! Jiaya nu hi nambiha pa-patumbu pa-hangàtarungu,” wàna.
3Nadu ba ndedipa nu i Harondi ba na-paràhangu-du payàpa-ya i Yuhani, dahondu-ya hi da-patama-nya la uma kapàtangu. Hi tuna nu i Harondi, jiaya na rukuna i Harondia, papaha-na i Pilipu, na anguna paluhu wiki. 4Maa ba tuna yiadu na pambàda paniina i Yuhani la Harondi, “Nda uku nyumu papiti-ya i Harondia!” wànanya. 5Làti ka pameti-ya i Yuhani wàna i Harondi, tàka na-mangàdatu-nya na tau, nadu ba wunangu-ya wànanya tau.
6Ba jia-yaka nambabu-nanya na lodu dedina nyuna i Harondi, narenja la hangga mambabu na anana kawini i Harondia. Na renjana nu lalu pa-nggaüru-nanya na etina i Harondi, 7hi lupa na-paràndingu wàngu harangu-na i Harondi, nggàra bia pakaraimu, napa kuwua-manggau duku, wànanya.
8Ba na-titiru-yaka paraïna inana, nu ka panii-nanyaka, “Karaï-nggunya na katiku-na i Yuhani la pinu julangu lodu memana nàhu,” wàna-madua-ka.
9Narongu-yaka nuna na pakarai-na ka dira handuka-ya na etina i Harondi. Tàka ba mbàda harangu-naka la hangga ariyaa dangu-na, wuangu-nanyaka pareta ka patutu-nya na pakarai-na na anakeda kawini. 10Naparà-hangu tau palua la uma kapàtangu pakatiku-ya i Yuhani. 11Tunaka nu hi datuya na katiku-na i Yuhani la pinu julangu hi datama ngàndiya hi dawua-nya na anakeda kawini. Hàla na anakeda kawini nangàndi-nya na inana. 12Hàlaka nu da makiku-nya i Yuhani hi damai papiti-ya nakayumbu-na i Yuhani hi datani-nya. Ka lua-danyaka papanii-ya na rukuna nuna lai Yehu.
I Miri Yehu ba nawua-nja pangangu da tau lima rata
(Mrk. 6:30-44; Luk. 9:10-17; Yuhn. 6:1-14)
13Ba narongu-yaka na rukuna nuna i Yehu, hei meha-nanyaka la tena hi na-dunjaku-nya lai nu, nalaku la hau pangia ma-hinggilu. Tàka ba darongu-ka da tau rukuna nuna, dunjaku-madua-danjaka da parainguda hi dalaku ndutuya i Yehu ba dali la mara. 14Ba napuru-ka i Yehu welingu la tena, hi naita-ya na tau dangu, ka mila-nanjaka eti nyuda. Hàla hi na-pamàlaru-ha da mahidu la hongada nyuda.
15Nu la malingu, mai-danyaka da makiku-nya hi dapanii-nya, “Na lodu malingu-nanyaka tàka lai yiahu lalu hinggilu-ya. Nahàmu-pa kau paràha-nya na tau ka nabeli, ka peku keida pangangu nàhu la hau ndeha - hau ndeha,” wàdanya.
16Napaya i Yehu, “Àmbu dalaku-du. Miwua bianja nyimi pangangu,” wànanja.
17“Lai nyuma ana lima mbua-ada da roti hi dua ngiuda da iyangu!” hi wàda da makiku-nya.
18“Ngàndiha nàmu,” hi wàna i Yehu. 19Tunaka nu paràha-nanyaka na tau dangu pa-mandapu la rumba. Hàla hi napiti-ha da roti lima mbua dàngu da iyangu dua ngiu, hi na-tangara la awangu ba na-pamalangu-nya i Ala. Hàlaka nu hi na-kawita - witaha da roti hi nawua-nja da tau makiku-nya la papabe - berinya na tau dangu. 20Ka ngangu ndàba-danyaka lundu mbihuda. Hàlaka nu da makiku-nya i Yehu da-pauhi-nja da rihi ngangu; ningu hakambulu dàmbu mbola mbinuda. 21Na tau na mangangu la rehi nu ràkangu lima rataya, ndedi padiha-ya na kawini dàngu anakeda.
I Miri Yehu ba nali la pinu wai
(Mrk. 6:45-52; Yuhn. 6:16-21)
22Hàlaka nu i Yehu na-paràha-nja da makiku-nya pahei la tena ka da-mangilu la hapapa tàma, ba talànga puli-nanyapa na tau dangu pabeli. 23Ba nalaku-ka na tau dangu, i Yehu nahei la hau tandula, didi-aya pa-hamayangu. Ba na-rudungu-ka ni bia-nyapa lai nu ba didiya. 24Ba talànga tunaka nu, na tena na paheida da makiku-nya i Yehu, mbàda la padua tehiku-mayaka. Na tena napa - parahungu ba na-làndahu-nya ngalingu, nadu na ngilu ba na-ndubaku-ya na ngora tena. 25La manggawa njàmu tailu dàngu njàmu nomu la mba - mbaru, mai-nanyaka i Yehu lai nyuda ba nali la pinu wai. 26Ba daita-yaka i Yehu ba nali la pinu wai, kanjupu kandaudaku-ha. “Na patau tehiku,” wàda ba da-kaladaku paraï pa-mangàdatu.
27Tàka i Yehu ailulu hema-naha, “Kawànaru! Jiaka Nyungga Yehu ka! Àmbi mangàdatu!” wànanja.
28Ka panii-nanyaka i Peturu, “Jàka jia-dukau Yehu pahia-ngga ka kumai tomakau ba kuli ningu la pinu wai,” wàna.
29“Mai-wa!” hi wàna i Yehu. Ka puru-nanyaka i Peturu welingu la tena hi nalaku li ningu la pinu wai ba nalua lai Yehu. 30Tàka ba naita-yaka paraïna i Peturu ba lalu mbangatuna na ngilu nu la tàma, mangàdatu-nanyaka hi na-pakiringu pa-hadànjalu. “Miri, ndulaka!” hi wàna ba nawara.
31Ka pajola parengga-nanyaka lima paraïna i Yehu hi najàmba-ya, “Peturu, Peturu, najapu na pawaimu. Nggikina hiu ndua nda-ndingga?” wànanya.
32Ka hei-danyaka la tena, dàngu kandà-dahu-nanyaka na ngilu. 33Tàka da makiku-nya maràbaku-danyaka la hanggana i Yehu, “Langatàka Nyumu Miri Ana Alakau!” wàdanya.
I Miri Yehu ba na-pamàlaru mahidu la Nggeniharitu
(Mrk. 6:53-56)
34Ba datàka-ka la hapapa tàma, hei-danyaka la Nggeniharitu. 35Da tau lai nu ba daita-yaka ba jiaya i Yehu na manàmu-nya, pakada-danyaka na rukuna nuna la ngabana lai nu la winggiru-na la paraingu nuna. Mbuu ndàbada da mahidu hi dangàndi-ha lai Yehu. 36Hi dakarai-ya ka pekuna ka da-jonggaru-ya na kalembi-ana, mili na hupuana. Hàla mbuu ndàbana na ma-jonggaru-ya na kalembi-na màlaru-ma-ananya.
Currently Selected:
MATIU 14: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
