MATIU 13
13
Na pangerangu ma-hàbarungu wini
(Mrk. 4:1-9; Luk. 8:4-8)
1La lodu nunama i Yehu ba na-dunjaku-nya nuna na uma hi nalaku la hingi tàma hi na-mandapu lai nu. 2Lalu danguya na tau ma-pauhi winggiru-nya i Yehu, jia-duyaka hi nalaku pa-mandapu ningu la tena, tàka na tau dangu ndolaku-danya la hingi wara. 3Ma - màtuka pa-papeka-nanja nyuda paraïna i Yehu ba nawàngu pangerangu.
“Na haàtu na mini tungu woka nalua pa-hàbarungu wini,” wàna i Yehu ba napa-kirinya na pangerangu-na. 4“Ba talànga hàbarungu-naka nu, ningu wini ma-kanabu la ànda. Datàka da ma-hawurungu hi da-nàhiku pambuta-ya na wini.
5Ninja da ma-kanabu la ma-pawatungu, na tanana na-manipa-a. Darengga tumbu ba na-manipa na tanana. 6Tàka ba najangga-ka na lodu, malaï-danyaka da tumbuda, ka màdu-danyaka hi dameti, nadu ba nda da-tanjiku da amuda. 7Ninjai da wini da ma-kanabu la manggawa rii madàka. Datumbu da rii madàka ka kapidihu-danjaka da tumbuda da wini hi lupa dameti. 8Tàka ningumai nyuna wini ma-kanabu la tana hàmu ma-kamboka, ka wua-danyaka; ningu ma-pahangahungu, ningu ma-panomu kambulungu, dàngu ningumbu ma-patailu kambulungu,” wàna.
9Ba na-wàlahu-yaka na pangerangu nuna i Yehu, “Jàka ningu kahilu-mi jia hi mirongu!” wàna ba napanii.
Nggikina hi nawàngu pangerangu i Miri Yehu
(Mrk. 4:10-12; Luk. 8:9-10)
10Tunaka nu mai-danyaka da makiku-nya i Yehu hi da-paàra-nya, “Ka nggikina Nyumu umbu hi muwàngu pangerangu bau panii dànya na tau dangu?” wàdanya.
11Nahema i Yehu, “Nadu nyimi ba pa-wuangu-makaika la papinya na pa-kàpingu jàka nggiki wàna na pareta-na i Ala, tàka nyuda ndia-a, 12Nadu na tau na mambàda ningungu, napa ba pahili wua padangu-duyaipa, hi lupa na-parihingu. Tàka na tau na manda ningu ngga - nggàrangu, na ma-hawutu-na na maninya lai nyuna napa ba papiti-duyai-pa. 13Tuna nu hi kuwàngu pangerangu, jàka kupanii dànya na tau dangu, nadu ba daita, ba hama tuna manda ita-duha; nyuda ba darongu ba hama tuna manda rongu-duha dàngu nda da-hàmburu-ya. 14Jia ba tuna nu pa-deningu-nanyaka hama tuna na panyura-na i Wunangu Yahaya:
‘Napanii i Ala:
Nyuda napa nuangu-mana ba darongu
tàka nda da-hàmburu-ya;
nyuda napa nuangu-mana ba da-hamata
tàka nda dapinya jàka nggàraya na madedi.
15Nadu na kanandingu-da da tau nuda ba mbàda buli-madaka,
da kahilu-da da-kawanga-ka
dàngu da matada da-kapudangu-ka.
Yiana hi tuna nu ka àmbu peku itada da matada,
da kahilu-da ka àmbu peku ronguda,
da kanandingu-da ka àmbu dahàmburu-ya
dàngu ka àmbu dabeli lai Nyungga
hi ku-pamàlaru-ha,’ ” ba wàna.
16“Tàka wangu ailulu-na nyimi,” wàna i Yehu la makiku-nya, “nadu ba ma-langatàka-ya na rongumi dàngu na ngitami. 17Kanandi-nya, dangu wunangu dàngu tau manundu lai Ala da ma-rinjungu paita-ya na paita-mi nyimi nàhu, tàka nyuda nda daita-ya. Nyuda da-rinjungu parongu-ya na pa-rongumi nyimi nàhu, tàka nyuda nda da-ronguya,” wàna.
I Miri Yehu ba na-kaloka-ya na pangerangu rukuna na ma-hàbarungu wini
(Mrk. 4:13-20; Luk. 8:11-15)
18“Ronguya na ihina na pangerangu rukuna na ma-hàbarungu wini. 19Da wini da ma-kanabu la ànda pangera jia-haka da tau da marongu-ya na lii jàka nggikina ba na-pareta i Ala, tàka nda da-hàmburu-ya. Nàmu-nyaka i Ma-akatu hi naramba-nya na pambàda hàbarungu daa la etida. 20Da wini da ma-kanabu la pangia ma-pawatungu, pangera jia-duhaka da tau da marongu lii, manyamalu kataku hàmu eti-ma-adanya. 21Na nyuna na lii nuna nda na-paamu daa la etida, jia hi nda ana torungu-na. Ba da-pàdangu ma-handuka jàka ndia ma-mayila rukuna na lii nuna, manyamalu kandulingu-ma-adanya. 22Da wini da ma-kanabu la ma-nggawa rii madàka, pangera jia-haka da tau da marongu-ya na lii, tàka da-kadiku-nya na paluri wàda dàngu da-rinjungu paluri mbokaru. Rukuna nuna, na lii langu welingu lai Ala pa-palàlu-ya daa la etida, hi nda datu wuada. 23Tàka da wini da ma-kanabu la tana kamboka, pangera jia-duhaka da tau da marongu-ya na lii nuna tàka hi da-jàngapu-ya. Ka wua padangu-danyaka, ningu ma-hangahu, ningu manomu kambulu dàngu ningu ma-patailu kambulu wundangu ihina,” wàna.
Na pangerangu rukuna na witu la honga uhu nggàndumu
24I Yehu nahilu pekaya na hau na pangerangu la tau dangu, napanii, “Jàka na-pareta i Ala, na hadana ngera hama tuna na pangerangu yiana: Na haàtu na tau tungu woka na-hàbarungu wini hàmu la wokana. 25Tàka la hau rudungu, ba talànga katuda hàla-naka na tau, tàka-nanyaka na muhuna hi na-hàbaru-nya wini witu la honga uhu nggàndumu, hàla laku-nanyaka. 26Nu ba datumbu-ka da uhu nggàndumu dàngu ba da-huburungu-ka da wilida, wuwa-danyaka da witu. 27Tàka da tau pahewa-na na mangu wokangu mai-danyaka lai nyuna hi dapanii, ‘Ha umbu hi wini hàmuha wàngguka da patumu la woka? Nggikina hi ninjaika ni da witu lai nu?’ wàda. 28Nahema na mangu wokangu, ‘Nuna paraï ruku muhuya,’ hi wàna. Hi da-paàrangu da tau pahewa, ‘Màla umbu ka malua làti pabuta-ha da witu?’ wàda. 29Nahema-ha, ‘Ndia-a, nadu jàka mibuta-haka da witu, napa datambuta pa-kariangu-duka da uhu nggàndumu. 30Màta bianja da witu ka datumbu pa-kariangu da uhu nggàndumu lundu tomaya na rehi muti. Napa ka kupeka-nja da tau mamuti: Pauhi mangilu pàkunja da witu, painja ka tunuha. Hàlaka nu ka pauhi-nja da uhu nggàndumu, ka pahàmu-ha la dàndaku,’ ka wànggu,” wànaka.
Na pangerangu rukuna na karohu wàla rii hawi
(Mrk. 4:30-32; Luk. 13:18-19)
31I Yehu nahili pekaya na hau na pangerangu la tau dangu, “Jàka jia-yaka na pareta-na i Ala, na hadana hama-naka na pangerangu yiana: Na tau napiti-ya na hau karohu wàla rii hawi,#hawi: hawi ba wàna lai yia, jiaya na hangia ngara rii pangangu na matoma ràkangu tailu metiru janggana. hi natuya la wokana. 32Na karohu hawi wini madira màraku-ya. Tàka jàka natumbu-ka hi rihi bokulu bia-nanya welingu la anguna patumbu. Ka hama pingi ai-yaka, hi lupa damaimbu da ma-hawurungu pawulu ningu hibuda la kahanga - kahanga-na,” wàna.
Na pangerangu rukuna na tai wolu
(Luk. 13:20-21)
33Ninya na nau ha pangerangu na papanii-na i Yehu la tau dangu, “Jàka na-pareta i Ala, na hadana hama tuna na tai wolu na papiti-na na haàtu tau kawini, hi na-uraku wànja da kanguta taringgu patu kambulu litaru hi lupa na-pupuhu hàla,” wàna.
Nggikina i Miri Yehu hi nawàngu lii pangerangu
(Mrk. 4:33-34)
34Mbuu ndàbada da pa-ajaru-na i Yehu la tau dangu nawàngu lii pangerangu. 35Nu ba tuna nu pa-deningu-nanyaka na papanii-na na wunangu,
“Nyungga kuwàngu lii pangerangu ba kupanii dànja nyuda;
napa ku-bobaru-nja mbuu ndàbada da pa-kàpingu weli mula weli tanangu, ba wàna,” hi wàna.
I Miri Yehu na-kaloka-nya na pangerangu witu la honga uhu nggàndumu
36Hàlaka nu i Yehu hi na-dunjaku-nya na tau dangu hi natama la uma. Tàka da makiku-nya hi damai papanii-nya, “Màla làti umbu kau kaloka-nggamanya na àndana na pangerangu witu la honga uhu nggàndumu,” wàdanya.
37Nahema i Yehu, “Na tau na ma-hàbarungu wini hàmu jiaya na Ana Tau. 38Na woka jiaya na pinu tana yiana. Na wini hàmu jiaha da tau da mambàda tama la banjaru-na i Ala. Da witu jiaha da anguna i Kambàliku. 39Na muhu na ma-habaru-nya na witu jiaya i Kambàliku-duka. Na rehi muti jiaya na Lodu Hupu njàpuna, tàka da tau da mamuti jiaha da papalewa la awangu. 40Hama tuna da witu ba pauhi-nja hi tunuha la epi, tuna numbu napa la Lodu Hupu njàpuna. 41Na Ana Tau napa na-paràha-nja da papalewa-na pa-pauhi-nya welingu la honga banjaru-na mbuu ndàbana na tau na ma-pawiti-nya hi kiri tuna manjala na tau, dàngu mbuu ndàbana na tau hawiangu na mawunda ma-akatu. 42Nyuda mbuu ndàbada napa pa-wàrungu-ha daa la tuluru epi ma-kandulangu, lai nu nyuda napa hii-danyaka dàngu mayila-danyaka. 43Tàka da tau da mawànya na pambuha-na i Ala napa kahilaku-danyaka hama tuna matalodu la Pinu Tana Bidi-na i Ala, Amada. Jia-duya jàka ningu kahilu-mi kai rongu!” wàna.
Na pangerangu na banda ma-tandaningu
44“Jàka na-pareta i Ala, na hadana beri hama tuna na pangerangu yiana: ninya na banda na ma-tandaningu la tana hi na-hungguya paraï na haàtu na tau, hi na-patama belinya la tana. Tunaka nu paraï ruku nggaüru etina, lua-nanyaka padangga hàlanja da mangu wikina, hàla hi nabeli padingi-ya nuna tana,” wàna.
Na pangerangu mutiara manandangu
45“Jàka na-pareta i Ala, na hadana beri hama tuna na pangerangu yiana: Na haàtu na mini danggangu himbu-nanya mutiara - mutiara mbana wili. 46Ba nahunggu-yaka ba hauna na mutiara manandangu nda uku, lua-nanyaka padangga hàlanja da mangu wikina, hàla hi nakeiya nuna na mutiara ba hauna,” wàna.
Na pangerangu njeringu
47“Jàka na-pareta i Ala, na hadana beri hama tuna na njeringu na pawàla la tàma, hi na-hanggaungu iyangu hangia - hangia. 48Ba nambinu-ka na njeringu, dandada-nyaka la mara paraï da mini yàpa iyangu. Tunaka nu mandapu-danyaka hi dapindi - pindiha da iyangu: Da mahàmu datuha la kanaingu tàka da manda hàmu dawàru-nja. 49Nuya na ngerana la Lodu Hupu njàpuna, napa da papalewa lua-danyaka pa-kawàri-ha da tau akatu welingu la tau da malumu-nya na pambuha-na i Ala. 50Tunaka nu da tau akatu hi wàrunja la tuluru ma-paepingu. Lai nu nyuda hii-danya dàngu mayila-danyaka,” wàna.
Na malanja bidi dàngu malanja ndai
51“Màla mi-jàngapu-duha nuda mbuu ndàbada?” wàna ba na-paàrangu i Yehu.
“Ma-jàngapu-ha umbu,” wàda.
52Hàla panii-nanyaka i Yehu, “Jia-duya nimbihu-na na ngguru anggama na mambàda njadi angu banjaru-na i Ala, beri hamana na haàtu mangu umangu na ma-paluhu welingu la kanai bandana malanja bidi dàngu malanja ndai,” wàna.
I Miri Yehu ba nda painga-ya la Naharitu
(Mrk. 6:1-6; Luk. 4:16-30)
53Ba nahàla-ka i Yehu papeka-ha da pangerangu-na, dunjaku-nanyaka lai nu, 54hàla beli-nanyaka la kotaku wikina. Lai nu hi nalua pa-ajaru la uma bungguru, tàka da tau da marongu-ya, lalu hangàtaru-danya. Dapanii, “Nggi welingu-ka ihu na tau yiana ba na-ngalangu manggàna tungu nu? Dàngu nggi welingu-ka ihu na-ngalangu ningu mbiha la pa-patumbu pa-hangàtarungu? 55Ka nda jiaya ni na anana na tukangu? Ka nda jiaya i Maria na inana ni, dàngu da angu dedina ba jiaha i Yakombu, i Yuhupu, i Himungu dàngu i Yundahu? 56Dàngu ka nda lai yiahu-mbuha da-ngiangu ningu da anawini-na? Nggi welingu hi nangala hàlanja nuda?” wàda. 57Ka jukaru-danyaka i Yehu. Hi napanii i Yehu lai nyuda, “Na haàtu na wunangu patembi-ya la nggi - nggi, hinggilu-na la kotaku dàngu la uma wikina,” wàna. 58Ka jia-duyaka i Yehu hi nda nawunda padangu pa-hangàtarungu lai nu nadu ba nda dawaiya.
Currently Selected:
MATIU 13: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
