MATIU 15
15
Na huri boku la mangilu
(Mrk. 7:1-13)
1Ha pajuru-da da tau Parihi dàngu ngguru anggama welingu la Yeruhali damai lai Yehu. Da-paàra-nya, 2“Nggikina da tau makiku-nggau Nyumu hi dapangga-ya na huri boku la mangilu-nda? Nganguwa jàka wàda ba nda dabaha pàku limada hama tuna na kalaratu!” wàdanya.
3Nahema i Yehu, “Ka nu nggikina nyimi mipangga-ya na pareta-na i Ala, paraï ruku la pakiku-nya na hurida da boku la mangilu? 4Nadu napanii i Ala, ‘Tembiha da amami da inami,’ wàna, dàngu ‘Nggamu ma-paaka-nya na amana na inana, huku pameti-maya bàdi,’ wàna. 5Tàka nyimi na pa-ajaru-mi: jàka napanii dànja da ina amana na tau, ‘Làti da ràka pawua-nggunja da ina amanggu, ku-maraku-njaka lai Ala,’ jàka wana, 6na tau nuna nda pa-patanggungu-ayapa la patembi-ha da ina amana.#da ina amana: da lawiti ndai da manda pirada: amana jàka ndia inana. Ba tuna, mulana na huri boku la mangilu, pa-halela-minyaka na puluna i Ala. 7Nyimi yia tau kapelu-kai! Pa-deningu-nanyaka na panyura-na i Yahaya na ngerami nyimi:
8‘Tuna yia wàna i Ala:
da tau nuda ba dalumu-ngga
ngaru jua-ma-ada,
tàka da etida damarau welingu lai Nyungga.
9Parahumangu ba dalumu-ngga,
kalaratu tau-ma-aya na pa-ajaru-da hama tuna kalaratu-nggu
Nyungga-yaika, wàna,’ ba wàna,” wànanja.
Ma - màtu ma-pairaku-ya na tau
(Mrk. 7:14-23)
10Tunaka nu i Yehu hi na-paaunja da tau hi napanii-nja, “Rongu kai pinya! 11Da ma-tama la ngaru nda da-pairaku-aya na tau; tàka da maluhu welingu la ngaruna nudaha da ma-pairaku-ya na tau,” wàna.
12Hàla mai-danyaka da makiku-nya i Yehu hi dapanii-nya, “Mupinya umbu da tau Parihi ba dakaraü-nggau eti ba darongu-kau bau panii tumu nu?” wàda.
13Nahema i Yehu, “Da matumbu-ka jàka nda pa-pamula-na i Amaya la awangu napa pabuta-ha. 14Àmbi kawela-nja da tau Parihi. Nyuda liku uru pokiha; na tau poki ka nairu ngàndi tau poki, maràngga kanabu-danyaka la lambongu,” wàna.
15Napanii i Peturu, “Màla umbu, kaloka-nggamanya nuna na pangerangu!” wàna.
16Napaya i Yehu, “Ka nu nyimi ndedi mi-jàngapu-mayai dimi? 17Ndai pinya dimi, na matama la ngaru ba napuru la kambu, hàla hi nahili luhu? 18Tàka na maluhu welingu la ngaru, ma-pawelingu la etiya; ka jia-duyaka nuna na ma-pairaku-ya na tau. 19Nadu welingu la eti datumbu da ka-nandingu ma-akatu, na ma-pawiti-nya na tau hi na-pameti tau, nanjuraku, nakiu kaü, na-manganga, na-hakahii kambàliku dàngu na-papulungu. 20Jia-duhaka nuda da ma-pairaku-ya na tau, nda jia-aya ba ngangu wàngu lima panda baha,” wàna.
Na pawaina na kawini Kanaàngu
(Mrk. 7:24-30)
21Tunaka nu i Yehu hi na-dunjaku-nya lai nu hi nalaku la ngabana na malihi-nja da paraingu Tiruhu dàngu Hindungu. 22Na haàtu na kawini Kanaàngu lai nu, namai lai Yehu ba nawara, “Dou Anana i Ndautu, mila àrungga eti! Na ananggu kawini na-huruku-ya wàndi akatu. Na ngerana nyuna pa-dàkangu-mananya,” wàna.
23Tàka i Yehu nda nahema ndokuya na kawini nuna. Hi damai lai Yehu da makiku-nya dakarai-ya, “Umbu paràha-nya na kawini ka nalaku. Karepaku pàku-ananya la kajia-nda!” wàda.
24Nahema i Yehu, “Nyungga papalewa la tau Ihirailu-aka, ri - rihi nyuda da ma-njàrangu,” wàna.
25Ka mai-nanyaka nuna na kawini hi na-marubuku la hanggana i Yehu, “Màla àru Miri pa-ndulangu!” wànanya.
26Napaya i Yehu, “Nda nahàmu-a ba pitiha da pangaa anakeda hi nduhanja da ahu,” wàna.
27“Tubana Miri,” hi wàna na tau kawini, “tàka da ahu dangangu-mbu kamumu ma-kanabu welingu la lenangu mirida,” hi wàna.
28Ka panii-nanyaka i Yehu, “Ina, ma-bokulu-duya na pawaimu! Màtawa ka na-patutungu hama tuna na pamonu-mu,” wànanya. La rehi nu màlaru-madua-nanyaka na anana nuna na tau kawini.
I Miri Yehu ba na-pamàlaru-ha da tau hidu dangu
29I Yehu na-dunjaku-nya lai nu, hi nalaku tundu pipitu la Tàma Nggalilia. Tunaka nu hi nahei la tandula hi na-mandapu lai nu. 30Dangu tau mamai lai Nyuna da mangàndi tau kanjiku, tau poki, tau kaliparu, tau kambiu, dàngu da dangu-maipa da tau hidu hangia - hangia. Da-bànjalu-ha nuda da mahidu la hanggana i Yehu, hi na-pamàlaru-ha da tau nuda. 31Na tau dangu na maninya lai nu da-hangàtaru langatàka, ba daita-haka da tau kambiu ba peku kareuku-da, da tau kanjiku ba dahàmu, da tau kaliparu ba dapangga, dàngu da tau poki ba dangita. Ka wotu haila-danyaka na Ala banjaru Ihirailu.
I Miri Yehu ba nawua-nja pangangu da tau patu rata
(Mrk. 8:1-10)
32Tunaka nu i Yehu napaau-nja da makiku-nya hi napanii, “Kumila-nya eti Nyungga yia na tau dangu. Mbàda tailu mbua lodu-daka ba dakaria-ngga Nyungga, tàka nàhu nda ningu-apa pangada. Nda kupuli-anja palaku dàngu nda ningu ihi kambuda, napa da-haluputu-du la ngara-ngia,” wàna.
33Ka paàrangu-danyaka da makiku-nya i Yehu, “Nggi ta-ngalangu ningu biaka pangangu lai yiahu la pangia ma-indiku tungu yia ka tawua-nya pangangu yiana na tau dangu?” wàda.
34“Pirada da roti lai nyimi?” hi wàna i Yehu ba na-paàra-nja.
“Pihu mbuada, dàngu ana iyangu ana pira ngiuda,” wàda.
35Ka paràha-nanjaka i Yehu da tau dangu pa-mandapu la tana. 36Hi napiti-ha da roti pihu mbua dàngu da iyangu, tunaka nu hi na-pamalangu-nya i Ala. Hàlaka nu hi nakawita - wita wànja limana da roti hamanai da iyangu hi nawua-nja da makiku-nya. Tàka nyuda hi dapabe - berinya na tau dangu. 37Ngangu hàla-danyaka lundu dambihu. Hàlaka nu da makiku-nya i Yehu hi da-pauhi-nja da rihi nganguda. Mbuu ndàbada pihu mbua mbola mbinuda. 38Nggubulu-na na tau mini jua-a na mangangu la rehi nu ningu patu rataya, nda padiha-ya na kawini dàngu anakeda. 39Tunaka nu i Yehu paràha-nanyaka na tau pabeli. Nyuna wiki hei-nanyaka la tena hi nalaku la ngaba Manggandàngu.
Currently Selected:
MATIU 15: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
